Senthang Peng Khua 7 in Minung 6,000 Hrawng an Zaam Hna

May 31 ah SAC ralhrang pawl Senthang peng ah an rak phak caah Surkhua telh khua 7 in khuami 6,000 hrawng an zaam hna, tiah thawng kan theih.

Surkhua ah cun SAC ralhrang nih khuachung ah meithal ningcang loin voi tampi an puah hnawh hna caah khuami an um ngam ti lo i an zaam dih hna.

The Chin Journal nih kan khawmhsuat khawh tawk ah Surkhua in minung 2,000, Lungkhin khua in minung 600, Phaizawng minung 500, Aikah minung 800, Siatlai minung 500 le Lungrang khua in minung 700 hrawng an zaam hna.

Loklung khuami minung 800 in 1,000 karlak hrawng zong May thla thih lei ah an zaam dih i atu tiang khua an hlam kho rih hna lo.

Khuachung ah a taangmi hna cu kum upa tar deuh lawng an si hna, tiah thawng kan theih.The Chin Journal June 5, Hakha

Adang relthan:NUG nih PDF hi hman aa palh sual cun kan lo cikcek te lai.Atu ah kan theih bantuk in NUG cozah thar nih Kawlram ram chung raldohnak kong thawng kan thanh zau lai an ti. Zeitin an thanh lai cu hngalh a si lo nain Mipi ralkap PDF hi kuttlaih  hriamnam tling  an ngeih hlan ah rampi raldohnak a onh sual cun kan i tinhmi kan nganh kho.

A ruang cu Kum 60 leng raldoh a cawng i rampi budget in hriamnam a caw mi i hriamnam tling ngeimi  fawizaang tuk in tei i timh cu si kho lo. Raldoh ah cun no.1 hriamnam a herh bik.

SAC ralkap cu ram pakhat pi hmanh a doh kho ve mi hriamnam tling a ngeimi an si caah minung tha kan i tluh zongah hriamnam thazaang an dan tuk cun final round ah mipi sungh a fawi te.

Cu ti kan ti tikah thachiatnak ca chimmi si bak lo. NUG nih a rannak in PDF hi hriamnam tling a damhpiak a herh ti nak si.

Cun tha tein PDF le NUG hi an i pehtlaih a herh fawn. Atu an dirhmun zoh ah cun lung an cing pah lo.

PDF raltuk a cawng i training a dihmi zong an tampi nain um sawhmi an tampi.  Atu PDF  training kai liomi hi hngak rih hna uh tiah an kan ti i kan um rih ko tiah PDF pakhat nih DVB interview tuahnak ah a chim.

Atu kan dirhmun in ralkap kan doh ning hin cun tei awk an har.  Kawl nih peuh- kyar-an ti bang thli thup bawh i kah lawng te a si tikah kan mino hna zaangfak tuk an si. A bat zong an ba. An nunnak tiang zong a liam thluahmah cang.

Atu lio PDF nih SAC an doh ning cun plan an suaimi kha an palh  lo bak hau. Hmunhma an theih dih hau fawn. Luh chuah thut dir thiam tak hau rih. An i palh sual cun chikhat lo ah thih dih an fawi. A ruang cu SAC nih hriamnam ngan an hman pah lengmang.

Cucaah a sikhawh chung in NUG nih hin PDF sipek tlangcung ralkap an si ah ralkap i hman a timh ko si cun hriamnam hme he a ngan he tling tein damh piak seh. Sii ai lei thlawp nak tiang in damh seh. Vanlong kahnak zong cawk piak hna seh. Cu hnu ah kahnak nawl hi chuah sehlaw PDF vialte nih anmah le umnak cio in voikhat ah SAC hi doh hna seh law an tla rup ko lai.

Atu cu hmun cheukhat lawng ah doh le thah an si tikah a si kho lo. SAC ralkap an dih cang ati mi kan um. An dih naisai lo. A thimi nak in a nungmi an tamtuk rih.

Cucaah tei nak hmuhnak ding ah  NUG kut ah tampi thil aa hngat. PDF hman a palh sual cun mipi tamtuk nunnak a liam lai. Kan duhmi democracy zong kan hmu kho lai lo.

Note. PDF timi ah tlangcung ralkap zong an i tel kho.Mipi ralkap poh kha chim duhmi cu a si.Credit-Tluang Ceu Thang

Be the first to comment

Leave a Reply

Your email address will not be published.


*