Saya Hoi Cung Tum nih a chim tawnmi cu peknak vialte lakah a niam bikmi peknak cu chawva peknak hi a si ee a ti tawn.

𝐂𝐡𝐢𝐧 𝐌𝐢𝐧𝐨 𝐊𝐚𝐧 𝐌𝐢 𝐑𝐚𝐥𝐭𝐭𝐡𝐚 𝐇𝐧𝐚.Nifatin Chin mino duh lonak a langhtermi pawl ka zoh hna le News ka rel poh ah ka lung ah a chuak tawnmi bia pakhat a um. Mah cucu US ralbawi Harold G. Moore nih Vietnam ral lio ah a ralkap pawl sinah a rak chimmi bia a tang i hi a si. Vietnam ral cu kum 20 an doh. US ralkap thong 60 leng an rak liam. Russia nih Vietnam kha biatak tuk in a rak bawmh tikah US ralkap tampi an rak liam. Tuhmawng cakei nih 500 fai a rak seh rih hna. Radio nih 100 an thih ah, 200 an thi tiah a rak thanh tawn ti a si. Cucaah Vietnam ram ah raldoh hi hohmanh nih kal an rak ngamh tilo. Cu lio ahcun ralbawi Harold G. Moore nih a ralkap pawl kha tu le tu a tang bia hin a rak hnemh tawn hna. Thazaang a rak pek peng hna. Cucaah a ralkap pawl thazaang an la tthan tawn i, an ral a rak ttha tthan tawn ti a si. A chimmi cu;

A nung in kan dihlak kan kir tthan dih lai tiah hohmanh bia kaan kamh ngam hna lo. Asinain nanmah hmai le Pathian hmai ah bia kan kamhmi hna cu mah hihi a si; ral hmun kan phak tikah nan hmai ah ka kal lai i, teinak kan hmuh tik ahcun nan hnulei in kaan zulh te hna lai, Bawipa tu nih kan bawm ko seh tiah a rak ti tawn hna ti a si.

Kan mino pawl hi Chin mipi caah Frontline ah a kalmi Harold G. Moore bantuk an si ve. Duh lonak heh tiah an langhter peng. Tih a nun tuknak hmun ah an kal. Tulio sandah piah cu nunnak thap tluk a si. An si taktak fawn.

Kan hmaisuang (Frontliner) pawl hi uar an um taktak. Kan in upat tuk hna. CDM a lutmi zong kan in upat hna. Rian ka ttuan lo caan poh ahcun Live ka zoh peng. Thawngpang ka dawi peng. Ka zoh pah ah Bawipa tiah thla ka cam tawn. Zan kan ih caan a tlawm. Kan ei chung tiang a pil kho lo. Kan tuar tuk cio. Ramleng in kan tuah khawhmi cu chim a tlak lo.

Saya Hoi Cung Tum nih a chim tawnmi cu peknak vialte lakah a niam bikmi peknak cu chawva peknak hi a si ee a ti tawn. Mah nak in a sang deuhmi peknak cu kan caan le kan thazaang i pek hi a si. Peknak vialte lakah a sang bikmi peknak cu Bawipa caah nunnak i pek hi a si tiah a chim tawn. Cu bantuk cun miphun caah a sang bikmi peknak cu nunnak pek ngam tiang in a dirmi le Frontliner pawl hi an si ve. Nunnak le caan pek in a ttang mi kan um lio ah, a niam bikmi chawva tal le thlacamnak tal in cun kan ti khawh bik cio in teimak thluk kan i zuam ve lai. Bawipa nih teinak kan pe hram ko seh!

A kan liam tak mi upatnak kan pek hna. Hrenmi le hmapu mi zong chuak in dam um zau hram seh. Kan Frontliner pawl zong hma put lo tein zaam a herh ahcun zaam tak a ttha bik. Hlan bantukin fahnak pek lo ten thongthlak sawhsawh si ti loin tlaih i velh le thongthlak i hrem le thah an hman cang caah i tlaih ter lo i zuam cio ko hna usih. Bawipa nih in kilveng cio hram ko hna seh!Kan Frontliner pawl le CDM a tuahmi vialte upat peknak caah.Credit-Mang Bawi Lian

Be the first to comment

Leave a Reply

Your email address will not be published.


*