Sagaing Ramtthen Pengkulh 6 Ah Phone line le Internet Line An Phih.

Sagaing ramtthen chung SAC ralhrang a dohkalhtu pengkulh 6 cu September 14 chun hnu in SAC ralhrang nih Internet line an phih tiah theih asi.

Kani- Zinmapin-Bohtalin-Ayataw-Watlet le Palay pengkulh hna hi SAC ralhrang nih internet line a phih piak hna i Tthen khat pengkulh hna le bang ahcun internet line lawng hmanh si loin Phone line tiang in a phih piak hna.

Hi pengkulh chung ahhin SAC ralhrang biatak deuh in cawlcangh an i tim timi thawngpang zong theih asi i Phone line he internet line he phih a si caah mipi lungrethei ngai in an um. Ref: Khet Thit Media Chin Morning Satar

UN nih NUG hi phungning cozah ah kan cohlan piak sual hlah sehlaw kan Dothlen nak kan ngol lai maw?By Salai Ngun San Aung

Zahan tlaipi tiang, cun nihin ka thawhka in tutiang hi kong hi ka ruat..UN nih nihin chun meeting ah NUG hi phungning cozah ah cohlang sual hlah sehlaw ti ruah ah mizapi kan lung a zor tuk sual lai maw ti ka phang.

Mi raltha Con Bik, Lal Luai, Vomthu Maung, Hrang Nawl chan in Vawlei nih an um ve ti hmanh an kan hngalh hlan zongah Minthang Mirang ralpi hmanh phaw le nam he a rak dirh ngammi Miphun kan si nak philh riangmang in kanmah lawng cun kan tei bal lai lo, kan thazaang aa thlau tuk, kan hriamnam aa thlau tuk, kan ba tuk tiah kan lungdong sual lai maw ti ka phang.

UN nih a kan cohlan zongah China le Russia sin dah loin hriamnam cawkzalhnak hi thilfawi a si hlei lo caah an kan cohlan zongah vukvek tiah zingzan in kan thawng colh kho hlei lai lo. China, Russia le US, EU pawl kar i entainak tu a thawng lai i Cold War lio bantuk khan anmah le interest cio ruat pah in an chuncaw vaihlam fang khi kan si pah thiam ko lai.Cucaah kan innpa voksa chumhmi hngar i rawlei kathaw loin um nak cun kan ngeihmi bawnbok meh te kha a thaw bik in zeitin kan chumh lai timi tu kan ruah kha kan pawkhim deuhnak a si ko lai.

UN cu kan bochan, Vawlei pi kan bochan hna. Asinain kan ruahning bang si sual hlah kun kan lungpur lo ding a biapi tuk. Kan chung thari kan ithawnter a herh. WA, Kokant, Mailar, Shan, Karenni, Kachin, Karen, Shan, Mon, Chin, PDF vialte kan ttan tti ahcun hi MAH le a minung pawl kan tei hna lo nak ding sullam a um lo. Cucaah NUG nih UN lawng bawh siloin hi tlangcung hriamtlai vialte hi a kuutriit khawh hna, a komh khawh hna ding a biapi tuk. Tlangcung hriamtlai pawl nih NUG zong hi USDP te NLD te em ang in kawl thotho an si ko tiin hmuh loin zumhngamhnak (Trust) an ngeih khawhnak ding a biapi.

UN zong nih kan cohlang loin Miphun vialte zong nih hnu kan chit hna hmanhseh a Nung Pathian kan lei a ttan ahcun ho nih dah an kan tei khawh lai. Zeipaoh tlung ai kun Bawipa thawngin kan dirhmun fek sehlaw kan lungthin le thazaang thawng ko seh!
Teinak cu Bawipa ta a si.

Be the first to comment

Leave a Reply

Your email address will not be published.


*