SAC ralkap nih Hakha in tlaihkhih mi minung 183 chung ah 90 renglo hren rih, pahnih nunnak a liam

The Hakha Times, May 31 SAC phu nih nawlngeihnak a laak hnu 2021 February 1 in nihin tiang ah Hakha in minung 183 an tlaih cang hna i minung 92 cu thlah an si rih lo, cu hna lak ah pahnih cu an thi, tiah kan theih.

“Kanmah nih kan zulhdawi khawhtawk le kan khawmhsuat khawhtawk ah nihin tiang tlaihkhih mi hi minung 183 an si. Cu hna lak ah minung 92 hi an hren rih hna. Kan hngalhlo kar in an thlah mi zong an um kho ko. Cun, Hakha Palek Sakhaan le Rungtlang Ralkap umnak 266 in hmun dang, khua dang ah an thial hna maw thial hna lo tu cu kan hngal kho lo. Hakha ah an hren ko hna lai dah,” tiah CHRO in tuanvo ngeitu upa pakhat nih The Hakha Times ah a chim.

SAC phu nih Myanmar ramchung ah Chinmi an tlaih mi hna hi May 31 tiang ah 380 an si i, cu chung ah Hakha in minung 183 an si. 183 chung ah minung 92 an taang rih i an thlah than cang mi hna hi minung 91 a si cang.

Hi chung ah Pu Tler Ling (Hakha) le Pu Khamh Bawi Lian (Thangzang) cu an hrem hna ning a fah ca ah Kalaymyo lampi ah an thi i nihin tiang an ruak hmuh khawh an si thai lo.The Hakha Times

Be the first to comment

Leave a Reply

Your email address will not be published.


*