SAC Ralhrang nih Meithal in an Kah i an Kalpimi Chin Nungak a Nunnak a Liam

June 23, zaan sml. 9:00 hrawng ah Kalaymyo ah SAC ralhrang nih meithal in an kah i an kalpimi Chin nu Nuam Za Thiang cu a ruak rak hlam ding in SAC ralhrang nih nihin (June 24) ah chungkhar thawng an thanh hna.

Nuam Za Thiang hi Falam peng, Zawlnu khua in Kalaymyo ah a nu va tlawn ding in a kalmi a si.

June 23 zaan ah a hawipa Salai Ngun Nei Piang he Taungphilar sang in an rak tlun lei ah SAC ralhrang nih meithal in an kah hna.

A hawipa Salai Ngun Nei Piang cu a hmun ah a nunnak a liam. Nuam Za Thiang hi a phei ah meithal in an khen i SAC ralhrang nih an kalpi.

COVID-19 zawtnak in a nunnak a liam tiah nihin ah a ruak rak lak ding in SAC ralhrang nih chungkhar sin thawng an thanh hna hi a si.

Chungkhar nih a ruak a lak i COVID-19 zawtnak in a thi bantuk in a ruak cu an vuiter hna, tiah Falam CDM bawmhnak petu bu nih an langhter. The Chin Journal June 24, Hakha

Thantlang COVID-19 zawtnak chek mi minung 100 chung ah minung 21 zawtnak hmuh, pakhat thi.Chin Ramkulh, Thantlang khuapi chung ah COVID-19 zawtnak kong he pehtlai in nihin 2021 June 24 tiang zawtnak chekmi minung 100 chung ah minung 21 sin in zawtnak an hmuh i minung pakhat a nunnak a liam cang tiah theih a si.

Thantlang khuapi chung COVID-19 zawtnak an i runvennak kong he pehtlai in min langhter duh lo pakhat nih, “Zawtnak hmuh mi hna hi sii-inn lei ah chiah i thlopbul awk an that lo ca ah anmah le inn cio ah chiah an si. Sii-ai lei zong hi mizapi he i bawm in a si khawh chung tawlrel a si,” tiah a chim.

Cun, Thantlang khuapi chung COVID-19 zawtnak chekmi hi COVID 19 Emergency Response Committee Thantlang hruainak in an tuah mi a si tiah kan theih.

Thantlang khua chung i COVID-19 zawtnak hmuh mi minung 21 chung ah 2021 June 20 ni ah pakhat nunnak a liam. The Hakha Post

Be the first to comment

Leave a Reply

Your email address will not be published.


*