Rihkhawdar khuapi COVID-19 zawtnak ngei he naihniam in a ummi an tam ca ah chawhvah an khap hna

January 18, 2021 (Chin) Chin Ramkulh, Falam Pengkomh Rihkhawdar khuapi ah January 17 in khuachung ah chawhvah an khap hna tiah Rihkhawdar No.1 sang khuabawi Pu Chanliana sin in thawng kan theih.

Rihkhawdar khuapi ahhin January 15 i COVID-19 zawtnak hmuh mi minung panga hna he naihniam in a ummi le aa pehtlai mi an tam ca ah runvennak ca ah tiin atu bantuk in chawhvah an khap hi a si.

“Rihkhawdar khuapi chung chawhvah kan khap hi nizaan January 17 in a si. Zeitik tiangdah kan khap lai ti kan i caihmi le kan i chimhruah mi a um rih lo. A tlawmbik zarhkhat hrawng hi cu a si te ko lai. Cun, zawtnak hmuh mi hna he naihniam in a ummi (contact) hna i swab zong laak dih a si cang. Swab kan laak mi hna zong a dihlak in Tedim sii-inn lei ah kan kuat dih cang,” tiah Pu Chanliana nih a chim.

January 15 i zawtnak an hmuh mi minung panga chung ah minung pathum hi Rihkhawdar bial sii-inn (Taih-nay) ah rian a tuanmi siibawi pi le sii lei sayama minung pahnih an i tel tiah kan theih.

Cun, chawhvah khap a si nain, sangchung ah a biapi tuk mi a herh tuk mi a um a si cun mask i huh hnu lawng ah chawhvah ding in Pu Chanliana nih a chimchap. Photo/ Internet Credit-CBN

Be the first to comment

Leave a Reply

Your email address will not be published.


*