Ralzam ca kan ruat lai lo maw?

UN nih register an tuah lai tinak hmunhma paoh ah rian kaltak in kan rak kal tawn kha ka thei. Chunzan dang loin Saremban le Malaka tiang kan rak choi ve bal.

Cheukhat cu zankhuadei hna hngilh loin UN zung ah kan itlar hna. Palik tlaih lai zong ttih loin lampi khat in, le a runrun in kan kan izul hna.

Register tuah dingmi ah kan min ai tel lo cun zung lutcia midang min tal um hnga maw tiah kan hlat, a um si le kan hal, kan icaw, zeidang ruang si lo, zung luh duh ruang si ko.

Cheukhat lebang TB zawtnak ngeih kan rak duh hna. A ruang cu TB zawtnak ngeimi register tuah a um ca si ko. Zawtnak kan icheck i kan ngeih lo hmanh ah kan thinhang. Cun zunglut cia hna zawtnak an ngeih ahcun an x-ray tiang kan icaw hna.Naupawi pawl register an tuah hna le va ngei lo zong nau an rak pawi viar deng. Cu zong cu zung luh duh tthiamtthiam.

Thong tlami paoh register tuah an si hmanh ah thongtlak a duhmi le a ngamhmi pazeizat ko dah kan rak si?UN luh duh ah lam tanttim ah a thimi, Malay, Delhi ah a thimi kan miphun hawi pa zeizat remruam dah kan si.

Cu vialte harnak a tong i US hna a phan vemi nih ralzam ca lawng ruah ding si lo, tiah US thimnak ah tlang kan au ngam hi a mak ka ti tuk. Pawcawmnak tlamtling te he citizen hna kan hun si ruang ah kan lungput ai dang colh. US hna hi rak phan ve rih hlah usihlaw hi bantuk bia hi kan au ngam hnga maw?

Kanmah bak nih kan ton cangmi harnak bantuk a tong vemi kan miphun hawi hmanh an zawn kan ruah khawh hna lo ahcun kan ton bal ve lomi harnak le fahnak a tongmi pawl zawn va ruah ding cu a har ko lai.Credit-Van C Mang

Be the first to comment

Leave a Reply

Your email address will not be published.


*