Ralzaam zohkhennak kong ahhin Malaysia cozah le UNHCR karlak ah theihthiamlonak hi a chuak theo tawn.

Dawtnak maw Thleidannak: Covid-19 raikham sii chunhnak le Malaysia um ralzaam dirhmun.Malaysia cozah nih an rammi raikham sii chunhnak (National Immunization Program – NIP ) cu February 2021 in an vun thok. Hi timhtuahnak (program) tang ah Malaysia rammi kumtling milu zat  80% cu kumkhat chung ah chun kho ding in timhtuahnak an nei.

A tutiang ah Cozah nih raikham sii phun 3 a cohlan cangmi a um: US ser Pfizer, UK ser Astra Zeneca le Tuluk ser Sinovac an si. Hi raikham sii cu voihnih chunh dingmi an si. A tu tiang  (June 21, 2021) ah voihnih ning tein aa chun cangmi hi 1.6 million an si i chunh ding in min a pe cangmi hi 15 million an si cang.

Hi NIP (Nation Immunization Program) tang ah ram dangmi zong chunh duhmi cu min pek khawh asi. Asinain ralzaam le phungninglo (illegal) in a ummi hna caah cun min pek hi ngamh satsai asi lo. Aruang cu tlaihkhih kan tong sual lai ti phan asi. Covid pulrai chuah hnu in ramdangmi huat le thleidan a faak khun.

2020 lio ahkhan cun Malaysia Prime Minister Muhiyahin nih ram dangmi cu raikham sii chun an duh ahcun a man liamter an si lai tiah a rak ti nain a hnu ah manlo (free) in chunh ding tiah an ti than. Dawtnak le zawnruahnak an nei van ti awk cu si ngai.

June 21, 2021 ah Cozah nawngeitu lei in NIP i Coordinator (hrihruaitu) asimi Khairy nih ralzaam pawl cu CanSino Vaccine kan chunh hna lai tiah zapi sinah theihternak a tuah. Hi Cansino Vaccine (raikham sii) cu Tuluk sermi asi. A sertu hna hmanh cu Tuluk ralkap sii-ai lei cawnnak (Academy of Military Medical Science) le Beijing Institute of Biotecnology le CanSino Biologics Company an si.

Hi Cansino raikham sii cu a tutiang ah ram 5 (Pakistan, Chile, China, Hungary, Mexico) nih an cohlan. Malaysia zong nih ralzaam pawl kan chun hna lai an ti caah cohlan dawh asi cang tinak asi.

Ralzaam zohkhennak kong ahhin Malaysia cozah le UNHCR karlak ah theihthiamlonak hi a chuak theo tawn. A tu raikham sii chunhnak kong zong ah Cozah lei nih ralzaam an sining tling tein (detail) in rak kan pe uh tiah an hal hna. Malaysia cu ralzaam zokhenhnak a cohlang lomi ram asi caah tlaih le khih hi thinphan cio asi. A hlei in UN ah minkhumh asilomi ca ko ah a har thinphang asi khun.

Hi NIP tang ah ralzaam hna raikham sii chunh ding cu UNHCR zong nih a cohlanmi le duhpiakmi asi caah zeitindah minpek ningcang asi lai ti zong langhternak an tuah.

Malaysia ah UNHCR zohkhennak tang ah a ummi hi May 2021 tiang ah 179570 an um. Hi ahhin 154000 hrawng hi Myanmar (Kawlram) in a a rami an si. Hi chung ah 22000 renglo deuh hi Chin miphun kan si.

A hlan deuh ah khan cun minpek (register) tikah mah duhmi raikham sii phun thum (Pfizer, Astra Zeneca, Sinovac) chung ah pakhat khat poh rak i thim khawh asi nain a hnu ah thim a ngah than ti lo. Chunh hram an rak thokka hrawng ahkhan Tuluk sermi Sinovac cu an duh lo tiah tiah thawngpang a rak lengngai. Cun thawngzamh ca (media) pakhat nih a tialmi le bang ahcun Muslim pawl cu a thami (Pfizer vaccine) an chun hna i Muslim asilomi cu Tuluk ser Sinovac an chunh hna tiah a rak tial.

Ralzaam pawl cu a tu Malaysia ah a phan rihlomi Tuluk ser thiamthiam CanSino raikham sii kan chunh hna lai an ti tikah dawtnak le zawnruahnak ruangah maw asi hnga ruah len awk in a um. Tuluk ser cu ram rum le ram thangcho deuh nih cun an duh lem lo cu mu. A tutiang ah Tuluk nih mipi chunh ding an sermi khawh cangmi raikham sii hi phun thum a um: Sinovac, Sinopharm le CanSino an si. Cheukhat thiamsang pawl nih an hlathlainak ah an thatnak thazaang hi 50%, 60% hrawnghrang a si an ti. A tu Pfizer te pawl khi cu 90%, 95% hrawng bak a si cu mu.

Nai te ah Hong Kong University pakhat nih Tuluk sermi a min ka philh (Sinovac or Sinopharm) cu hlathlainak an tuah i voithum chunh a hau khomi si tibantuk an ti. 

Ralzaam chunh dingmi CanSino cu voikhat chunhmi lawng asi chinchap rih. Zei a va si ah timh asi cang ko caah an kan dawtnak asi pek silo pek ah WHO (World Health Organziation) nih a cohlan ve ko caah lunglawm tein teh kan cohlan ve ko lai. Chunh lo ah le riantuannak le kal umnak ah harsat ton si hoi lai. A hlan i Covid aa check lomi cu riantuan khawh si lo an rak ti bantuk kha si hoi lai. A sau pah cang le za rih seh. Lungsau tein a relmi nan cung ah kaa lawm.
Saya Ceumi Lian

Be the first to comment

Leave a Reply

Your email address will not be published.


*