Ralkap Uknak ka doh ve nak a ruang?

Ramkhel kongah keimah pumpak opinion tampi langhter le kap ngei ngai in biachim hi a si khawh chung hrial kaa zuam peng nain atu tan cu “kap ngeih lo kha duhthim awk chungah aa tel lo” tiah ka ruah ve ruangah tawite in ka ttial lai.

Ralkap nih kan ram cu chan tam tuk a uk cang i ralkap uknak tang i nun kha, a tthangcho tuk cangmi nihin kan vawleipi dirhmun in chim ahcun “nung na thih” a si ko. Kan kiangkap ram le miphun vialte mawtaw le vanlawng an ser i vawleipi an zaa pei chungah an rak chiah dih cang lio ah, ralkap ukmi kan nih Kawlram mipi nih A.D 2010 tiang ah Mobile phone hmanh kan rak hmu bal rih lo khah!

Vawleipi ah zei bantuk nuhrin covo dah a um? timi zong zeihmanh kan rak hngal lo. Tihnak in kan rak khat i ralkap nih chimmi le fialmi poh cu kan thihnak ding a si hmanh kan rak el ngam nemmam hna lo khah!

Ralchiatnak le ttihnak sal bak full-time bak in kan rak tang dih i ralkap hmuh poh ttihphannak in kan rak khat. Fimthiamnak lei ah le vawlei cung ram zeihmanh an cawn duh ti lomi curriculum pawl an rak kan cawnter i kan cawnmi dihlak thiam le hngalh dih cikcek zongah zeihmanh a rak si lo khah!

Chim cawk lo a si! Kha ralkap uknak i kan techin fapar tiang hun luh nolh tthan dingmi ruah tikah, a lam kip in hi uknak chiahru khaam le donh hi a hrut lomi nihcun kan rian hrinhrim a si, tiah ruah awk a si.

Inn chung i ka fale an i nuamh lulh lio ah, innkaa hram in Rul nganpi rak lut sehlaw, chungkhar pa bik dirhmun “rul cu ka ttih tuk ai; a ka cuk sual lai” tiah khaam le doh loin lanhter ning law, cu bantuk pa cu dah! Fa ngei ve ding zongah aa tlaak lo nan ka ti dih ko lai.

Cucu atu lio kan ram dirhmun cu a si caah ram mi vialte nih a lam kip in hi ralkap uknak lut kho lo ding i doh le khaam hi cu kan rian hrimhrim a si ko.

“Kan ttih lo ruangah a si lo. Kan tei lai kan ti ruang zongah a si bik hlei lo. Kan miphun dihlak chan tampi tiang dolh dih ding in a kan innkaa hram ah a hung lut cangmi, Rulpi cu zeitindah kan zoh sawhsawh khawh lai, titu khi a si deuh”‚ĶHrambik Lian

“Kan nih khrihfa pawl nih kan doh ve awk a si maw?” timi ka hun peh tthan te lai.wemustwintogether stop_the_terrorist Nan miphun hawi, By-Hrambik Lian

Be the first to comment

Leave a Reply

Your email address will not be published.


*