Ralkap Meithal Ka Meithal

Ka chim voi hra, ka țial voi thongkhat ti a chuak cang. Rak chim lengmang le rak țial luaimai zongah a tak i rak ton ve lo cang ahcun lung a fiang in zumh a um kho lo. Sihmanhsehlaw atu ah cun Sagaing ramțhen Kalay-Kabaw in i thawk in Chin ramkulh Mindat, Halkha hrimhrim ah ton a hung si cang. A hnuah cun khua kip le peng kip ah mah le si khawhning cio in doh an hau cang lai.

Ka rak chim in ka rak țial zungzal, na ral kha na kah lo ahcun amah nih an kah lai tiah. An hnaa ah a kha i mi cheu nih cun an cohlang kho lo. Zumtu kan si, baibal nih na ral na dawt lai a kan ti an ti. An chimmi a dik, an palh lo. Sihmanhsehlaw zumtu kan si ai tiah na ral kha that loin na zoh sawh ahcun nangmah an thah ko lai. Zeiruangah? Na ral cu pe a si fam cu. Cuccah na ral kha na kah lo ahcun zeitik caan paoh ah amah nih an kah lai i na sung peng lai.

Bawipa bochan in ral a dohmi nih teinak an hmuh. Kannih cu zumtu kan si, kanmah nih kan ral doh a hau lo. Pathian kan i bochan ko i amah nih a kan dohpiak in a kan teipiak ko lai tiah zeihmanh tuah loin um hmanh zeitikhmanh ah ral nan tei lai lo. Cucaah um sawhsawh ti hlah, Bawipa bochan in na ral kha doh cang. Ralhrang he nan i kah laiah thlacamnak ngei ta, cun na ral kha kap hna. Bawipa nih an bawmh lai i teinak na hmuh lai. Teinak cu Bawipa sinin a ra lai. Teinak petu cu Pathian a si.

Ka dawtmi ka miphun hawile hna, atu ah mipi nih ralhrang ralkap nan tuk nan dohnak ah nan lung chungin nan i sehchih dingah ka duhmi cu…,

“Ralkap hriamham, ka hriamnam. Ralkap meithal, ka meithal. Ralkap sakhan ka sakhan. Ka thih lo ahcun ka hriamnam ralkap kut phan hlah seh. Ka thih lo ahcun ka khua ka ram ralkap kut ah tla hlah seh,” timi lungput le ruahnak hi mikip nih nan i ngeih cio dingah ka duh.

Dai tein duhlonak langhternak nih a tei kho ti lo. Kanmah lei kan dai ti hmanh ah anmah lei nih kah thah le fahnak peng țhiamțhiam a si ko. Cucaah cun anmah nih kan cungah an tuahmi fahnak nakin an cungah kan tuah ve caan a si cang.

Atu hna ah cun Chin ramkulh pengkip ah Chin ram Kilvengtu Ralkap {Chinland Defence Force} (CDF) a hung dir cio cang i mah le si khawh ning le mah le kuttlaihmi hriamnam cio kha hmang in ralhrang ralkap hi an hram in bongh dingah doh an hau cang. A herh ahcun inn tang thingai hmanh i zuh zau i kan ralpa tuk nakah hman a hau cang.

Cucaah atu nakin hmailei ah thil hi a zual lei a panh cang lai caah mipi kan caah a herh bikmi le kan tuah awk hrimhrim a si dingmi cu, “Ralhrang ralkap le palik a bu in an si ah, anmah lawngin an si ah kan hmuhmi hna le kan tlaih khawhmi hna paoh an hriamnam (Meithal, bomb, namte le a dangdang an thilri) chuh hna ding. Ralkap thazaang an i chap khawh lo nakhnga an rat nakding lam hrawh ding, thingkung lian pipi hauhnawh i lam kham ding. Lam khamnak zawn an phanh bakin kah colh hna ding le ralkap thazaang i chap kho lo dingin khua kip nih lam kip in rak bawh cio i kah ding. Kan kah hna tikah kuanfang pakhat ah minung pakhat kheng dingin kah a herh.

Ralhrang ralkap le palik nih an kan hngalh sual lai ti phan ah uniform hruk loin meithal, pistol he khualak ah an i chawk lai i umkal fawizaunak dingah mi mawțaw le mi mawțaw saikel chuh in an i la cang lai. Cucaah mipi nih nan lunghrinhmi hna paoh tlai hna u law an i kenmi paoh chut dih hna u. A herh ahcun a herh ningin tawlrel colh hna u.

Mipi nih ralhrang ralkap nan tei deuh hna le a thimi an tam deuh tik paoh ah ralhrang ralkap nih bia kan i ruah hna lai, daihnak kan ser lai tiah an in biakchawnh te hna lai. Asiloah thla khat chung kah dohnak kan ngol tiah an in ti hna lai. Hi zawn te ah hin fimkhur in um a hau, hlenthawinak a si. A rau lai lo a thaizing ah maw mipi an i relh lo lio caan a si tiah ngeihthlem in an in kah țhan colh hna lai.

Atu lio caan hi ram ai thlen i a țhat khawh nakding ah a biapit tuk lio caan a si. Cucaah ral le ral a si komi cu ahohmanh i zaangfah caan le i thlahdorh caan a si ti lo. Ral cu ral in zoh peng law, ralkap meithal ka meithal timi lungput ngei in Bawipa bochan bu he na ral cu doh ko cang. Teinak petu cu Pathian a si. By-Salai K. Biak Lian Thawng

Be the first to comment

Leave a Reply

Your email address will not be published.


*