Ral sunghnâk vialte hi zirit ruangah a si dih tinâk cu a si hrim hrim lo.

RAL RAM I ZURIT CU RALSUNGHNÂK PHUN KHAT A SI. 1Sia. 20:16.Kan duh zong duhlo zongah kan Lairam zong ralhmun ah ai cang cuahmah i hi raldohnâk hi ni zeizat, thla zeizat le kum zeizatdah a rauh lai timi chim khawh le fianter khawh a si lo lio ah RAL RAM I ZURIT CU RALSUNGHNÂK PHUN KHAT A SI timi biatlâng târ in Baibal Cathiang ah a rak cangmi thil le nihin Lairam ah a cang cuahmahmi thil he zohchih in thazâng hun la hna  u sih.

Miphun pahra hna pennâk ‘Israel Pennâk’ tiah timi cu minung serchommi milem (siasal) an biak ruangah Pathian nih milem a biami Assiria cozah kut ah BC 722 kum i a chanh hlan deuh ah khan Kanân ram hi an ramri a simi Siria cozah he an rak i do hma sa.

Hi lio ah hin Israel siangpahrâng cu Ahab a si i a nupi cu Baal milem a biami Jezebel a si i a nupi lungton duh ah Ahab nih Israel ram cu Baal milem biaknâk in a khahter.

Cucaah pawngkam ram milem a biatu hna he pehtlaihnâk a ser lio ah milem bia Siria siangpahrâng Benhadad nih Israel siangpahrâng Ahab pennâk cu la law law dingin a rak doh.

Ralkap thazâng tampi hlei ah bawmtu siangpahrâng 32 hna he Ahab do dingin an pok. 1Sia 20:1.

Asinain hi tan ah hin Siria siangpahrâng cu a sung. Zeicatiah Baibal nih ‘Chun lai fang ah an va chuak i cu cân ah Behadad le sianghrâng, amah bawmtu ding siangpahrâng 32 hna cu chawlbuk ah zu an rak ri’ tiah a ti. 1Sia 20:16.

Hi tan ah Siria siangpahrâng Benhadad ral a sungnâk chan kha ralkap thazâng tlawm tuk ruang le a ralchiat tuk ruang zongah a si lo. Cun Israel siangpahrâng le a ralkap an țhawn tuk ruang zongah a si lo.

A ruang um chun Baibal nih a chimmi cu ZURIT ruangah a si. Zeicatiah Ahab le a ralkap hna nih an va nam lio chun lai fang ah Benhadad le a bawmtu ding siangpahrâng 32 hna cu Zu an rak ri tiah Baibal nih a chim.

Ral sunghnâk vialte hi zirit ruangah a si dih tinâk cu a si hrim hrim lo.

Asinain hi tan i ralsunghnąk a chuahpitu thil cu zurit ruangah a si. Hi tan ah hin Israel mi hna nih tam tak tak an thah hna tiah Baibal nih a ti. ISia 20:21.

Zeicatiah an hruaitu vialte zu an rit lio i annam hna tikah hruaimi mibu tampi nih thihnâk an tong.

Taksa le thlarau tiang in Laimi phun kan zawtnâk ngan bik pakhat cu Zu a si ti cu mit hmuh kut tongh in a lang i a fiangmi a si.

Minung lungput hmanh an ngei ti hme maw tiah kan ruah ciomi kawl ralkap he doh hram kan i thawk lio ah hin Siria siangpahrâng Benhadad a rak sungh bang khan kan nau le mino hna hi an thazâng der ruang le ralchiat ruangah si loin zurit ruang hna ah an sung sual ve hnga maw ti hi kei ka thinphânnâk bik a si.

Zeicatiah zu nih hin pumpâk nunnâk siseh, chungkhar nunnâk siseh, kan zatlâng le mibu nunnâk le kan miphun le Pathian dirhmi Kawhhran (Khrifabu) nunnâk tiang a chiatchuah bangin dinfelnâk le a dikmi Democracy caah ralhrâng a dotu kan mino hna nunnâk zong hi zu nih a chiatchuah sual hnga maw timi hi ruah lo awk a țha lo.

Cucaah ral ram i sunghnâk a phâkpitu phunkhat a simi zuritnâk chungin ralhrâng a dotu kan mino le an hruaitu hna hi an luat khawh nâkhnga ram le miphun ca i kan thlacamnâk ah hin camchih peng hna u sih.
Zeicatiah ral ram i zurit cu ral sunghnâk phun khat a si.Credit-Evan Rual Ul

Be the first to comment

Leave a Reply

Your email address will not be published.


*