Pu Tler Ling Ruak Ralkap nih Kalay ah an Khangh

Hakha SAC palik nih an tlaih i, a nunnak a liammi Pu Tler Ling (kum 56) ruak cu Kalay ah kan khangh, tiah thawng kan theih.

Nihin zinglei ah Pu Tler Ling ruak lak ding in Hakha pastorte Rungtlang ah an vung kal i ralkap nih, “COVID-19 zawtnak a ngeih caah Kalaymyo ah a ruak kan khangh,” tiah an leh hna i ruak hlam ding in a kalmi pastorte cu an lawng in an rak kir.

Rungtlang ralkap nih COVID-19 zawtnak a ngei an ti nain May 12 chuak SAC thawngzamhnak Myanmar Alin nih cun “Pu Tler Ling hi Lung zawtnak a ngeih ruang ah a nunnak a liam” tiah an ttial.The Chin Journal May 12, Hakha Hmanthlak: Pu Tler Ling ruakhmuh ding in May 11 ah an timhtuah lio a si.

USDP Hluttaw candidate hlun Pu Phir Maung inn bomb an puah hnawh, fak ngai in hliam a tuar .Chin Ramkulh, Hakha Peng Hniarlawn khua um USDP Party in Ramkulh Hluttaw mee hmun ah aa zuam mi Pu Phir Maung inn cu 2021 May 11 suimilaam 11:00PM le 12:00AM karlak ah bomb an puah hnawh i amah zong hliam a tuar tiah thawng kan theih.

Hi kong he pehtlai in Pu Phir Maung nih, “Bomb a puah hi zinglei sang suimilaam 12:00AM ah a si. Thil cu a hman ning tein ka chim lai. Hi Bomb puah hnawh ruang ah lungrumh mi cu ka ngei hna. Keimah hi atu buainak kong he pehtlai in thim tia te zong sualnak palhnak a ngei lomi pa ka si. Asinain, keimah a ka duh lomi pawl nih atu hi caantha an rak laak a si. An minung zong hi Pathian nih a phozar te hrimhrim ko hna lai,” tiah The Hakha Post ah a chim.

Atu bantuk in bomb an puah hnawh ruang ah a motorcycle pahnih a rawk, a motor hmun 7 in a pem. Cun, amah zong a cal a tlek tiah theih a si.

Cun, “Keimah cu hohe poh aa daw ve mi ka si tik ah Pathian nih a ka pekmi chiatha thleidannak thluak hi ralring tein a hmang mi le a cawlcang mi ka si. Zeiruang ahdah an ka puah hnawh ti ka thei lo. Keimah leikap cun Pathian hmai le minung hmai ah sual ningzah ding ka ngei lo. Hi bomb puah hnawh ruang ah ka cal a tlek i hmun hnih in an ka thit,” tiah Pu Phir Maung nih a chimchap.

2021 May 11 zaan Hakha khuachung ah bomb puah thawng le meithal puah thawng mizapi lei nih theih lengmang a si.The Hakha Post

Be the first to comment

Leave a Reply

Your email address will not be published.


*