Pu Lian Uk, Dr Za Hlei Thang le Salai Kipp Kho Lian hna he hin kum 30 dengmang aa thihruai mi ka si tik ah a mah kong ka theih tawk hi a chuahni lawmhpinak le a mah upatnak ca ah ka rak tial.

Ka diary: January 4, 2021 Pu Lian Uk chuahni lawmhnak le upatnak
Note: Jan 4 cu Kawlram Independence Day a si i, zungzong an khar. Miranguknak in luatnak kan hmuh ni hi a sunlawi ding tluk hin a sung lawi tawn lo a ruang cu kan luatlo tiah kan i ruah ca ah a si hnga maw? Tlangcungmi tampi hna nih cun 1947 ah minsen kan rak thut i hnatlaknak kan ngeih bantuk in Kawl cozah hna nih an tuah lo tik ah, cu Panglong hnatlaknak minthut ni Feb 12 Union Day an ti mi zong siseh, cu minthut te ruang ah Kawl le tlangcung vialte an kan pek mi luatnak ni zong cu kan sunhsak kho lo. Cu ca ah cun, luatnak ni kong tiallo in, kan nih Chin miphun tuanbia ah philhawk thalo le kan philhsualnak hnga lo ding ca ah luatnak ca ah a nun chung a cawlmi, Pu Lian Uk, nihin ah a kum 84 birthday a si mi  upatnak ca ah ka rak tial.

Tuzing cu Par Tha nu he kumthar kuttlaih can ah Pu Lian chawnh ding kan i ceih I ka hei auh colh. A rak thawh hlan deuh te si kaw, a poh in kan va poh. Kan biaruah a thaw cu hlan tawn bang. Kan bia zong a sau cu hlan tawn bang. Kan bialak ah, bia le lam phan in  “Pu Lian, a tu hi kum zeizat dah na si hnga? Rangoon University RASU Kum 100 tlinnak ah kan mah Hakha, Thantlang kan pa le RASU graduate lak ah a dam rih mi kum upa bik an kawl hna ah khan na min an tial kha ka hmuh” ka hei ti. Thaizing hi kum 84 ka si cang lai a ka ti. Cuti a si ah cun, thaizing ah cun kan chawn ti lem lai lo. A tu hin Happy 84th Birthday! In ti ko ning ka hei ti. Par Tha nu he zong saupi an i chawn. Delhi ah hin kan rak um ti hna i a rak i daw mi le aa lengkai lengmang mi kan si tik ah, Par Tha nu zong nih Pu Lian cu a tlaihchan i a dawt fawn. Asia a herh theu i a hlam theu ve. Zeimawcan ah kan chawnh tawn.

Pu Lian Uk, Dr Za Hlei Thang le Salai Kipp Kho Lian hna he hin kum 30 dengmang aa thihruai mi ka si tik ah a mah kong ka theih tawk hi a chuahni lawmhpinak le a mah upatnak ca ah ka rak tial.

Kan hngakchiat lio deuh High School kan rak kai hrawng 1980s ah hin Hakha Keihsih sang ah hin Pu Lian nih in hmete khi a rak sak i a min ah “Vakok Bu” tiah a sak. Inka luhnak cung ah Vakok aa suai i a tang ah “Vakok Bu” tiah tial mi a tar chih. A mah hi cu zeimawchel ah hin Hakha a rak phan theu i, cansau a cam ballo. Amin cu kapa le hna sin hin ka rak theih lengmang cang. Voikhat cu Rangoon University siangin khar 1986 dah a si rua ka ti?  Yankin ah Pu Richard Shwe sin ah Pu Tin Peng he kan va um. Cu ah cun Pu Zing Cung zong Mizoram lei in a rak phan.

Pu Lian zong Paletwa lei in a rak phan ve i, inkhat ah cun can saunawn kan rak um tti hna. Pu Lian nih University an kai lio an rak cawlcanghnak tuanbia te te hi a kan chimh tawn. Cun federal movement an rak thawknak le a mah nih a rak hruai hna nak kong le cu ruang ah thong an rak tlaknak kong cu kan mah zong nih heh tiah kan hal, lungsau te in a kan chimh ve. Hi lio can ah hin Pu Lian hi attorney (sihni) rak tuan lio a si i, a kan chimh mi thil pahnih te vunlangh ter ka duh.  Cu cu zeidah a si tiah cun, a mah hi Rangoon Law Firm pakhat ah a rak tuan i Thlanglei Laitlang ah hin thihnak tiang a phan kho mi dantatnak sualnak a ngei mi hna cu sihni lo in zung ah an bia ceihkhawh a rak si lo ca ah, cu hna cu le sihni hlannak phaisa an ngeihlo tik ah sautuk thong ah an chiah hna. Cu ca ah cun kan mah Lawform nih sihni kan va tuanpiaknak hna kha a si a ti. A tu Western ram ah cun Legal Aid pawl hi an si. Cutik a, thlanglei Laitlang cu a khua vialte tiawk in ka phan kho dih a rak ti.

Pu Lian nih hin thlanglei kan u nau hna an si ning thate in a va hmuh tik hna ah, khika hmun ah mission rian kan tuan a hau ti kha ka ruat i, cu lio ah Zomi Baptist Convention General Secretary Rev Hrang Tin Khum hi khual ka rak tlawnpinak in a mah zong nih khika hmun ah mission kan tuan a herhnak kong kha a hmuh tik ah CCOC hi an rak thawknak a si ti kha a rak kan chimh. Cu cu nihin zong ah thate in ka hal than i a ka chimh rih mi cu, hi CCOC (Chin For Christ in One Century) mission an rak thawk khawh hlan hrawng ah hin evangelical movement hi Laitlang chaklei zong ah a rak thawng ngai i, Baptist kha a rak hninh dih ko. Baptist hruaitu upa cheukhat hmanh kha an rak chuak i, cu tik ah khatlei ruah ah cun “Pathian thanghnak” bantuk a si tiah a ka chimh. Cutik ah ZBC nih CCOC mission a vun i awt in Baptist pi zong a dir a fek i (stabalized a hung si tiah amah chim ning te in) a thawng chin chin ee a ti.

1962 in Newin nih uknak a lak i cu lio an rak hmanmi 1947 constitution cu a hrawh. Pu Lian hi 1963 ah Rangoon University kai a rak i thawk. A hram thawk ah cun subject dang karak cawng ko na in, kum 2 nak in Law ah kaa thial i, cu zong cu an nih chan lio ah cun English hin rak chimh mi subject a rak si rua. 1968 ah LLB a rak ngah. Hi Law degree a laknak ding ah thesis a rak tial mi cu “The Chin Customary law of Inheritance and Succession as Practiced among the Chins of Hakha area” ti a rak si. Laiholh in leh ah cun Hakha peng nih Laiphung in kan roconak kong” a si ko.  Pu Lian a min a than biknak cu Rangoon sianghleirun sianghngakchia nih kan ngeih mi bu “Chin Literature and Culture Committee” ti mi chungtuan ah zapi nih an rak thim hnu in, siangin a dih kum 1968 in aa thawk i, kan Chin upa deuh ti mi vialte hna cu a mah nih a hruai hna i, “Chin Mino hna sin in cakuat”  “Chin Lunge a kyan pechet” ti mi ca an rak chuah.

Cu cu Newin cozah sin ah an rak pek i, cu nih cun kan mah Chin mi chung ah Federal cawlcanghnak aa thawknak a si ti uh sih law kan palh lem hnga lo. Newin ralkap cozah nih hin rammi hna sin ah hi bantuk in ruahnak kan pe uh ti mi hi tadinca in an sawm ko. Cu cu an thluakte an rak hman mi a si i, mizei hidah a kan duhtu an si , i mizeihidah a kan duhlo tu an si ti kha hngalhkhawhnak ca ah rak tuah mi sidawh a lo. Chin mino hna min in Pu Lian hruainak in an tial mi zong cu Kawlram hi Panglong Agreement in tuahmi Union a si lo le ramkomh a si ca ah Federal in kan i uk ah hin a tha bik lai. Cu cu Aung San le tlangcung mi nih an hna a rak tlak mi a si i kan ram he zong aa tlakbik ding a si ti kha a si ko. Hi ca uk nih Chin mino thinlung a thangh ti uh sih law kan palh lai lo. Cu ca cu kan mah chan tiang le a tu zong ah hin politics lei ah kan mit a kan au ter tu cu a si rih ko.

Hi kong ah Pu Lian he kumcan saupi rian a rak tuanti mi a hawipa Salai Kipp cu nihin ah ka hal than tik ah a ka chimh mi cu: “He is a true visionary who is way ahead of his time in his embrace of federal ideals and principles. He led a movement that was non-radical yet inspiring to so many educated Chin youths” Pu Lian cu a mah le achan lio ah federal ruahnak le dirhmun felte in a ngeimi kan rak ngeihchun Chin mino nih kan rak zumhtlak mi hruaitu a si ee a ti”. Chin upa le mino tamnawn sin ah federal uknak in kan i uklai ti mi ruahnak peknak cathluan cu min sen an thutter hna. An chimh hna i, an lungtlinnak an lak hnu ah an ca cu cozah sin ah an va pek.

Vanchiat kan ti lai maw!! 1972 a phak tik ah Newin cozah nih “White Elephant Operation” Vui rang awparation ti in Chin upa, sianghngakchia hruaitu hna chung in minung 70 tluk a rak tlaih dih hna i tazacuailo in kum 1 hrawng an hren hnu hna ah an thlah than hna. Sihmanhsehlaw, Pu Lian hi “Ye Kyi Eine” ti mi thong ah Political Prisoner in kum 3 thong an rak thlak. Hi ruang bik ah hin mizapi nih Sihni Lian Uk timi cu kan rak theih cionak bik hi a si.

Cuti sihni a tuan pah bu hin 1988 Kawlram a buai hnu ah ralkap cozah nih uknak an lak i, 1990 kum ah Parliament democracy thimnak a tuah than. Hi lio ah Pu Lian zong hi Hakha constituency in a rak i cuh i, MP ah a rak tling. Hi lio ah NUP Party in Pu Van Kulh zong Hakha in aa zuam ve na in, Pu Lian Uk nih a teitik ah a bia a roling ngaimi kan theih mi cu “Pu Van Kulh, nangmah kan tei bia si lo in, uknak system mipi nih an duh ti lo bia a si” ka ti a ti mi hi nizan nai zong ah Pu Bawi Lian Mang nih Pu Lian Uk kong a tial mi ah a telh mi ka rel. Vanchiat ah kan ti hoi lai maw? Ralkap cozah nih 1990 thimnak cu an cohlan lo ca ah Pu Lian zong hi tlaih ding min cazin ah an chuah than. A ruang cu cozah sin ah federal ramsernak kong ah  Chin State Constitution draft a tuah i cu draft cu Chin League for Democracy Party hotu chang sin ah a pek ti in an puh.

Cu ruang ah cun Mizoram ah a zam i, Aizawl ah kum cheu tluk khua a sak hnu ah Delhi ah 1992 ah a rak zam. Delhi a um lio ah cun keimah zong Delhi ah a phak hnu thla 2 hrawng ah ka phan ve i, USA a kal hlan 1995 tiang cu khua kan sa ti hna. Par Tha nu he zong hin thisa lei in aa tlaimi an si ca ah an i daw thiam i an i ngamhtlak fawn. Kan mah Chin mi UNHCR refugee a rak hmu hmasa bik pawl hi Pu Lian, Dr Za Hlei Thang le Dr Pa Cin hna an rak si i, Pu Lian hi BU-80 a si. kei hi BU-83 ka rak si. A tu ah cun BU thong zeizatdik a phak cang hnga!

1997 July ah a tu kan umnak Ottawa ah Par Tha nu he kan phan.  1998 May thla ah Canadian Friends of Burma nih Kawlram kong he pehtlai mi Seminar kan rak tuah. Cu meeting dih le cangka in Chin meeting tuah kan duh kan ti ca ah, a tu rian katuannak zung Euro-Burma Office nih hin National Reconciliation Program timi tang ah “The First International Chin Seminar” cu CNF hruainak in kan rak tuah khawh. Cu seminar nih cun Chin Forum ti mi kan rak dirh. Chin Forum a rak I tinh mi cu Chin miphun kan zapi rualremte in cawlcang hna uh sih law, a ralai mi kan ram federal a si khawhnak ah tuanchuah ding ti kha asi ko. Pu Lian zong hi seminar ah kan rak sawm i, Chinland Constitution Drafting and Convening Working Group hruaitu ah kan rak thiah. Lunglawmte in a kan cohlan i cu thawk cun a mah hruainak in Chinland Constitution draft cu 5th draft tiang kan tial lawng si lo in, vawleicung Chinmi kan umnak ram 12 tluk ah ruahnak halnak, i ceihhmainak zong kan rak ngei kho.

Cuticun, 2010 Kawlram cozah thlennak le daihnak lamthluan kong ah CNF nih Emergency Conference cu 2011 November thladongh lei ah ramri ah an rak auh i, cu thawk cun Chin Forum ah management board ah aa tel mi kanpa le Pu Lian Uk, Dr Za Hlei Thang, Pu Kipp Kho Lian, Pu Nang Lian Thang hna zong CNF Supreme Council ah an rak i tel. 2013-2014 ah CNF Chairman zong a rak tuan hnu ah a tu ah cun ruahnak petu adviser le chungtel sinak in a kan um pi pengtu kan pa a si.

Pu Lian a kong tlamtling te tial ding ah cun a sau ngai ngai ding a si ca ah, a tawinak in kan bia fun uh sih law, a mah hi kan Chin miphun a dawtu, a nun chung vialte miphun ca ah aa pe mi a si. Kum 28 renglo kan i thihruai i, Pu Lian nih miphun a dawt le a zawn a ruah hi keimah nih hin dah ka theih bik lai. Telephone a ka auh le ka auh vialte, email kan i kuat vialte le meeting kan i sik, kan i cak vialte, a ka hlemh i zeimawcan ah cun thazang a ka pek. Tialcawk a si hnga lo. Lai Forum a hung chuak. Pu Lian nih Chin mino hna nih thei ve hna seh tiah siaherhnak he a kan tialpiak mi ca vialte zoh than cio hmanh uh! A ho mizei nih dah kha vialte ram le miphun ca kong an kan tial piak bal? English in a tial chel, Laica in a tial chel a si.

Pathian nih a dawt. A ngan a dam. Mi tampi nih kan theihlo mi cu ei le din ah discipline “sii kan” a rak ngei tuk. Ih lo bal te in zan khuadei ca tial hna a hmang i cu belte cu a zawtnak pakhat bantuk a si. Hi bantuk miphun a dawmi pa kan ngeih hi Chinmi kan van a tha.

Hi hnu kum saupi kan dam pi rih ko seh. Nikum March thla ah CNF General Conference pi ah Pu Lian he kan va kai ti i, cu zong ah cun a kum a upa bik kan pa nih a kan telpi rih mi an hmuh cio tik ah thazang pakhat a si ko. Nihin ah Pu Lian cu hiti hin bia ka hal. Kan Chin miphun hruaitu hna lak ah hin a hodah na rak uar bik ka ti i, Captain Mang Tung Nung le Wan Thu Maung an si ee a a ti. A uar hna nak kong zong cu saulak te a ka chimh na in, mizeidah an si cu nan mah cio khan (mino deuh ti bia) rak hlat ve cio ko uh!

Pu Lian Uk tuanbia tawi: Chuahni: Jan 4, 1937 Nu le pa min: Pu Hmunawl le Pi Zingkawi Phun: Thangnget Cacawnnak: Primary: Leitak, Surgen le Aibur (1945) Middle School le High School: Hriphi le Hakha le Rangoon 1955 ah Tanghra a sung a ruang cu Kawlca chimtu an um lo ca ah a si.1956-57 : Tikir, Aibur ah Cawng saya a tuan1957-1958: Dr. Lehman (University of Illinois, Michigan) sin ah English to laiholh holhlet a rak tuan.

1959: tang 10 cu United Christian High School, Alane 4 Rangoon in a awng1961: Matriculation (University luhkhawhnak camipuai) cu Sittwe in a aung 1961-1963: Middle School Headmaster, Daletmee, Paletwa Cacawn pah, ca chimh pah.1963-1968: Rangoon University
1968-1990: Attorney (Sih Ni)
1972-1975: Thongtla (Ye Kyi Eyne)
1991-1995: Aizawl and Delhi cu Refugee
1995-2020: Washington DC, USA

Be the first to comment

Leave a Reply

Your email address will not be published.


*