Pu Biak Ceu Philhlonak Le UpatpekNak

CNF/A rak thawkkaa Champhai Camp rak um lio ahhin, har ngai in khua sak arak si, Paw khim tein rawl rak ei khawh asi lo, Mah lio caan ahhin Pu Biak Ceu nih anau le thing arak ah pi hna i, an miakmi phaisa in,Camp a ummi pawl an rak cawm hna, Bangladesh kan um lio ah kannak har ngai, Nikhat ah khuaittan in rawl tlomte lawng kan rak ei hna, Mah lio ahhin Pu Biak hi, ramri khua ah ‘rawl’ kawl hol tu supply ah an rak chiah, rawl cawknak phaisa arak neih lo caah a lungre a raktheih ngai ton,

Phaisa neih lo bu cun sipuazi tuahding arak kawl, Van that ah Vui ho cawkding arak hmuh, A si nain cawknak phaisa aneihlo caah awlokchong in arak um, Cu tikah Vui ho acawk duhmi hna akawl hna i ahmuh hna, Cutikah Vui ho cawk a duhmi pa sin ahcun phaisa cu alak i vui ho neihtu pa sinah cun ava cawk,Phaisa ahram’aziin’ um bak loin sipuazi arak tuah, A miakmi phaisa hi atam ngai, A miakmi phaisa hi fangkhat hmanh ilak loin facang cawknak ah acunglei upa hna sinah arak pek dih hna, Hi amiakmi phaisa te hin rawl kan cawk i, khim tein kan rak ei khawh hna, Amah thawngin kan paw arak khim tining law kapalh hrimhrim lailo,

Supply rian in ramri khua ah arak umnak hna hi, zawngsungtupung umnak le kawl ralkap luhchuahnak hmun asi caah ttih arak nung ngaingai, ‘cucaah ralring te in umkal le tthutdir hi arak biapi tuk, Abik in zan riah tikah mipi nih khoika dah an riak ti theihlo ding hi kan iralring bikmi cu arak si, Zanlei ni atla i khua amui lai ahhin athli tein ramlak ah a vakal i a va riak ton, A umnak khua pawl hna hi zunput an neih hna lo caah ramlak hi an zunput kalnak cu asi ton, Capo biatak in achim ttheumi cu, zinglei zunput akalmi nih ka riahnak ah an ka pauh ton i, ahnu ahcun zunput an kal lai ah Biak Ceu na um ma? tiin an ka auh hmasa lengmang ati, A rian hi ahnu ah keimah nih ka chawng i a chimmi pawl hna hi keimah pumpak hrimhrim nih ka rak ton vemi an si,

Pu Biak hi CNF/ A ah kum upabik asi nain, mino bantukin amar azang i aa liklak ngai mi asi, Vuikhat cu Lt Patrick Savang ho in zanlei sangah ralkap dingah kan ithawh hna i, zan khuabei ral cu kan bawh hna, Zinglei ah ral cu an ra i kan kah hna, Meithal zun 5 kan rak lak, Mah kan ikah tan ahhin ameithal arak puak khawh lo i, awlohchong ngai khin arak um, ral kan kah dih hnu ah aa lawmtuk i, Vok sum 5 in kan lawmh lai i keimah nih vorhla kaa thawh lai arak kan ti,

Pu Biak hi, atulio kan theih lar ngaimi Chin human right organization, CHRO ah secretary arak ttuan hmasa bik zong asi, Ramchung khualtlawn kan kal lai paoh ahhin ka sinah ara i Kawl ralkap nih nuhrin covo an buarmi thawngpawng na valak chih lai,narak tlun tikah na duhmi paoh kan dangh lai aka ti i thawngpang lakningcang le abiapideuh mi pawl Note aka ttialpiak ton, Capo in achimttheumi cu mah thawngpang kan lakmi nihhin Kawl ralkap headguarter khi miakpi in kan kah hna bantuk asi ti hi naphilh lai lo, Cun kanpu le ramdangah meeting anva kai tonmi zong hi mah thawngpang kan lakmi ruang ahhin dakaw asi ve cu tikhi achim chih ton,

CHRO arak tlaih hnu ah Chin rural deloloment asi rua]; ah an tlaihter tthan i, CHRO tu hi Mi chael nih arak tlaih, Mi chael nih CHRO arak tlaih lio ahhin abiapi ngaimi khual an tlawng hna i, Pu Biak nihhin aho hna, Thlakhat renglo an rauh hnuah anrak kir lei ah India le Kawlram ramri ah ral nih anrak kah hna i Mi chael hi a nunnak arak liam, CRDC arak ttuan lio ahhin NGO sinin bomhnak an rak hmuh i, ‘cu bawmhnak cun ramri khua tampi ah tthanchonak project phunphun arak tuahpi hna Cu pinah bawmhnak anhmuh mi phaisa in ‘sii’ a cawk i, ramri khua tampi ah alak in an vapek/ tlop ton hna,

CRDC a rianttuannak hi, ram chung ram leng pehtlaihnak hi abiapi tukmi asi caah, ram tangah um ti loin Saiha khua chungah an tthial, Saiha aum lio ahhin CRDC rian lawng siloin, kan tlun kalnak le kan herhmi vialte zong hi amah nih ttuanvo alak chih dih, Saiha aum lio ahhin India ralkap nih kan headguarter kan camp kah an rak timh, Kan camp umnak hi theih an duh caah Pu Biak Ceu hi ton dingin an rak auh, Akal lo asi ahcun a umnak inn le achungkhar hna hi

India ralkap nih an theih dih cang caah ahnu ah harnak nganpi an kapek lai ti hi aruah caah India ralkap ton ding cun aathawh, Aathawh lai ahhin khua aruatmi cu India ralkap nih kan sakhan umnak ah an ka kalpi lai i, zeitindah ka tuah lai timi le ka nunnak tiang an kalak khawhmi asi ti hi ka ruahmi cu asi e ati, cutikah an nu kha cawnnak puan kha rak funpiak law kaa ken lai kathi sual asi ahcun mah cawnnak puan tehin ka ruak rak ka hlom teh hna seh tiah kan nu sinah bia kacah ta aka ti, cuticun India ralkap he cun kan itong i ahramthok ahcun kan bia atluanglo caah therpangbu tein bia cu karuah hna i, ahnu ah duhsa tein kan bia atluang i vakal cang tiah an ka ti i an Sakhan leng kan van chuah cu kaalawmtuk nak ah ka mitthli atla thluahmah ati, Achimttheu mi cu CNF/A ka ttuan chungah kaphilh kho lobik mi cu mah India ralkap kan ichawnhmi hi asi e tiah aka chim ton,

Nikum ahkhan Pu Zing Cung hruainak in, Canada le US um CNF/A hlun pawl tonnak tuah kan itimh i .cu ahcun keimah hi aherhmi tawlrel dingin ttuanvo an ka pek, Mah lio ahhin ka dam pah lo caah Pu Biak hi kan inn ah ka auh i, nangmah nih ttuanvo nalak lai ka ti i phnag hlah keimah ka um ko arak ka ti, Tonnak kan tuah ni ah arak chuak tilo, Phone ka chawnh mi zong atlai ti lo, Tonnak kan tuah dih ni 2 hnu ah Ph arak ka chonh i,ka damlo i siizung kaa piah, cancer na si an ka ti e tiin arak ka chonh, Zarhkhat hrawng arauh hnuah ziah na rak ka zoh lo keimah tu karak leng lai hih tiin arak ka chonh tthan,

Mah hnu cun ka va zoh, A damlo chung vialte hi thlakhat vui 2 tal cu ka vakal peng, Voikhat cu chun 11 am hrawngah phone arak ka chonh i ka zual deuh caah siizung ah ka um tthan aka ti, Tlompal ah siizung ahcun ka kal colh ve, An chiahnak room ahcun ka va lut i akahmuh leh cangka in ka nau sau ka nung ti lailo, ka tai tang athi /zen cang e tiah aka ti, Suimilam 1 hrawng ka tthut hnu ah ka lawi cang lai ka ti i, amit thli atla thluahmah bu khin mangttha tuk aka ti, Kei zong lunghno ngaiin karak lawi ve, Ka va zoh ton ahhin kai harbik mi cu kalawi lai paoh ah angai achia pengmi hi asi, Hi ruang ahhin zoh ka duh ko nain ka kal duh ton lonak hi asi, Voikhat cu ka kawi pastor Jeremiah kai sawm i kan va zoh, bia zaza akan ruah, Kanrak ttin lai ah hman kan ithlak ta hna i akan ti i, keimah nih hman akan thlatu ding nurse nu ka va auh i hman cu akan thlak, Hi hi adonghnak bia kan iruahnak cu asi,

Bia achim tonmi kaphilh khawhlo mi cu. a ngaingai ti ahcun refugee sok atheih hmasa mi hi kan mah kan rak si, Kha lio ahkhan Delhi ah refugee sok pahin sianginn rak kai pah usilaw ‘khi hna pawl tluk tal khi cu ka si ve ko lai, ram kanrak dawttuk caah ramtang ah kan thazaang vialte kanrak hman dih i atu ahcun ‘zuu pu’ athawtnak vialte an din dih i, afei an hlonh mi bantuk ceo khi kan si ko cang ti hi achim ttheumi bia asi,

Pu Biak Ram caah na sinak vialte na rak pekmi hi na ttuanpi hawi nih kan philh lailoh, Nang cu ram ca le chungkhar caah pasalttha na si,By-Van Neih Thang
,

Be the first to comment

Leave a Reply

Your email address will not be published.


*