President Win Myint Upatnak Mipi caah thih a tihlomi hruaitu tha paraltha a si

Kawlram President Win Myint cu ralkap nih nizan zingka 4:30am tluk 1 February 2021ni ah an tlaih i ralkap nih Win Myint cu President ka sinak rian in kaa ding cang timi minthut law tiah an fial chih nain, Win Myint nih a lehmi hna bia cu; “Nan duh ahcun ka that uh min ka thu kho lo a ti hna”.

Mipi caah thih a tihlomi hruaitu tha paraltha a si.President Win Myint hi parliament house speaker rian a rak tuan lio ah kawlram chungah nawlngeihnak a sangbikmi rian cu state councillor rian a si i mah rian cu, Daw Aung San Suu Kyi pekdingah ralkap nih an duh na loin, raltha ngai in a pah chih i State Councillor rian cu Daw Aung San Suu Kyi nih tuanding ah bia a fehtertu paraltha a si.Credit– Pa Hen Thang

Adang relthan:Ralkap Nih Uknak A Lak, Zeidah Kan Tuah Lai?A tanglei ca hi Kawlca in an tial mi a si i, original catialtu ka hmuh lo ca ah a min ka langhter lailo. Cun, keimah nih ka hun chap pah ko lai.

Zeidah A Cang Cang?Ralkap nih uknak a lak mi cu a hlawh a tling cang. An thluak cu rul bang cun zir kaw systematically tein an rak tuah mi a si. Ralkap pawl leng an rak chuahter hna lonak hi nihnih bak te a si an ti. Rampi TV Station, Hluttaw le Naypyidaw kan ti mi pawl hmunpi paohpaoh kha a lai ni te ah security reng taktak in an luh hnawh. Uknak a lak lai zaan ah ramdang taanzung pawl kha i thlak lo ding ah nawl a chuah. Nizaan ahkhan sandahpiah hlawhfa pawl an thlah hna.

Zing suimilam 4:00 am hrawng ah DASSK, President U Win Myint, NLD hruaitu dihlak an luhhnawh hna. Khoika ah dah an um ti kha an hngalh dih. Pyituh Hluttaw an kawh lai a si mi nih an tlaih duh mi le an control duh mi minung fawi tein an tlaih khawh hna. Ko MIn Ko Naing te zong an i tel.

Cu khawh bak cun TV Station an luhhnawh hngap ko khah. Avoikhatnak uknak an lak suimilam 6 chung hi a biapi taktak mi an nunnak a si. An mah chung lila in uknak lak a duh lo mi an um khawh lai kha an i chek cikcek. Tainghmu dihlak nih uknak lak ding an lung a tling dih tinak khi a si. Kawlram ah cun uknak lak ningcang hi protocol an i ngeih cia cang cu mu! Ralkap chung in zeihmanh lungtling lo an um lo.

Zeidah a cang than lai?88 buainak lio bantuk kha si ko. Uknak ai reng chinchin kho. A tu lio hi U Myint Swe khi zapi hmuh ah an toh sawhsawh mi a si. General MAH nih a duh ning tein rian a tuan cuahmah ko cang hih. Kumkhat hnu kumkhat in ai chap lai. 88 lio zong ah thimnak hlan caan tawite a ti le kum 27 a rau.

Ramdang Cozah pawl in zeidah a cang lai?An thli lawngte a si ko rih. Zei taktak hmanh an tuah kho lai lo. Zeiruang ah? Tuluk nih hin ralkap cozah kai a duh. A ruang cu Tuluk ca ah kawlram hi an kutka taktak a si. Kyauk Phyu rilikam khi an mit nih a hlan tuk. Malekka rili hrialnak ding ca ah Tuluk pawl an kua hi Kyaukphyu rilikam lawng dinhnak lawnglawng a si.

US ca ah kawlram hi a biapi lo ngai cang. An ram thilri zuarnak ca ah a biapi bik mi cu South China Sea in an lut kho cang. Cawleh phikharnak a tuah lai. Mahvial.

Daw Suu Teh Zeidah A Tuah Khawh?Daw Suu nih a chim peng mi cu “ka thazaang cu mipi nan si” ti a si. Mipi thazaang bak ai rinh mi a si. Kamkhat lei ah mipi tuar a duh fawn lai lo. Cu ruang ah ralkap he i rempaw ding in caan tampi ai zuam. Asinain, ri cu a ngei hme teh. Misual pawl i an zia cu a donghnak ah cun hi hmun (uknak lak thiamthiam) kha kan phan than ko. Hi lio caan ah pathian bang thawnnak a ngei ve lo mi Daw Suu nih zeihmanh a tuah kho lo.

Ralkap Dirhmun Teh A Fek Cang Maw?A fek lo. Tutan uknak alak hi amah ca lawng bak a si. A pennak a hmunh khawhnak ding ca ah mitchinh kam seh in a tuah mi a si. U Ne Win, Saw Maung te chan he cun ralkap pi thinlung, an lungrualnak ti mi kha a dikcak ti lo. Kam khat lei ah Tuluk nih Shan ram canceo tiang a lak cang, Rakhine ram ah ai zuat mi AA le an um fawn. A tulio ah COVID siseh, a doh ngam taktak lo mi tlangcung hriamtlai, Rohingya, ICJ, ICC kongkau ahhin Tuluk lawnglawng hi ai bochan ngam mi a si. Cucu mipi le ralkap cheukhat zong nih an duh lo mi a si. A tulio general MAH dirhmun hi a kiak dengmang mi thutdan cung ah thih le nunri in a thu mi a si. Thli voikhat a hran ahcun a choi colh ding.

Mipi Teh Zeidah Kan Tuah Khawh?Hngah sawhsawh mi tlanhtu pakhat khat (Daw Suu, NLD, Ramdang cozah) pawl nih zei an tuah lo ahcun zeihmanh a chuak lailo. Zeihmanh tuah lo ahcun zeihmanh a chuak fawn lo.

Lamcung ah kan chuak lai maw? a har tak mi biahalnak asi. Zu nih Chizawh korong awih meeting an tuah ti kha a si ko. Buainak achuah ahcun hi cozah hi a tla lai a timi a fiang ngai fawn. Asinain, mipi tamtuk thih ding le a fawi fawn lo. Buainak a chuah ahcun nihlawh pek in ralkap fial mi banpawr puansen ttem hmang pawl he i tongh hmasa a hau lai.

Innhmai ah thantar sen he nak he thlai ah teh? — Thantar thlai in ralkap hi tla hna sehlaw uknak hi an la ngam lai lo. Thantar thlaitu inn pawl dah an luhhnawh lo ah. Practice taktak ah a si kho lo ngai fawn.

Zeidah A Phi Cu A Si Kun Ne? Kan mit in fiang tein hmuh khawh ding ah lam pakhat a um. Cucu Daw Suu nih a chim theo mi— thil dik lo le hramhram thil paoh doh ko uu ti kha asi.

88 buainak lio ah khan mipi an hlawh a rak tlinnak ding ca ah samfang telawng a rak i duh. Cozah rian an tuan khawh tilo ahcun cozah a thi bak. Zung, Bank, Mawtaw, Datsi dawr an khar dih i, an sungh lai dengte ah mipi thinlung kha an lemthulh, hro thulh bantuk in a rak tuah hna. Mipi rian an luh nakhnga tiah lem pah, hro pah in mipi thinlung an rak mawngh khawh hna. A hnu ah a tei hna.

Zeidah Kan Teinak A Si Lai— General Protest ti mi lam hi teinak hmuhnak lam pakhat cu a si. Mirang chan ah duhlonak au in an rak tei, 88 lio ah an rak tei deng te. A tu cu zeitin dah kan tei lai. Ralkap cozah a tlak khawhnak ding ca ah zeidah kan tuah lai tiah cun General Protest lam lawng hi a si ko rua.

General Protest ti mi cu lamcung ah chuah in au a si lo. Cozah riantuan paohpaoh rian kal lo, ralkap he i pehtlaih lo kha a si ko. Buainak ser lo in duhlonak langhter a si. Tahchunhnak ah thaizing thawk in cozah riantuan paohpaoh rian ah kal lo in um hna seh. Lamcung chuah a hau lo. Cozah riantuannak a zor cuahmah lai. Thlakhat a nguh hmanh ah sau a nguh lai lo.

Hi lam hi mipi ca ah tihnunnak a tlawm bik mi lam a si ko. Mipi i ruang tein cuti tuah ahcun hlawh a tling kho ngai mi lam a si. Ralkap cozah nih cozah riantuan paohpaoh an inn ah kal hnawh in an tlai kho thlu hna lailo.

Thawngpang chuak cheukhat chungin — smart 72 hrs tiah facebook cung ah thawng a chuak. Cucu a ralai mi suimilam 72 chung zeihmanh mipi lei in dai tein umpiak ti a si. Hihi a ngaingai tiah cun ralkap nih an duh mi cu uknak an lak in suimilam 72 chung a daih kha an duh mi a si. Uknak an lak in nithum a rauh ahcun an hlawh a tling tiah ruah khawh a si.

Vawleicung ramkip nih an zoh cio. Nithum a rauh tikah zeihmanh a can lo ahcun uknak a la tu ralkap hi mipi nih an cohlan hna tinak a si tiah an ruah ko lai.

NOTE: Hi ca hi laiholh in ai tlak ningin ka leh mi a si. Ka hlawt mi tete a um pah. Kai ranh pah ca ah cafang ka palh kho men. Hawi nih thei hna seh tiah SHARE rak ka bawm ve.By-Salai Tial Hram Ling
Yangon.

Be the first to comment

Leave a Reply

Your email address will not be published.


*