President Thar Thimnak. (US & Myanmar)

US le Kawlram hi zeithil hmanh ah kan i khat lo tuk i tahchunh awk kan tha lo tuk nain kan i thim kum aa khah caah tahchunh kan hau ve tawn i, thim kum ahcun kan ceihmi aa khat ve tawn. Mah hi aa khahmi hi a nuamh ngainak si ve. US ummi Laimi le Kawlram ummi lai mi nih a pahnih in kan ceih i kan ruahnak kan chim khawh ve caah a nuam ngai ngai. Mah ruahnak chim cio hmanh zeipi nih tluk hlah. US lei tu cu an president thim dingmi pahnih debate hram an thawkter cang i president a tuan ding an i fiang cang. Trump or Biden si ko. Kawlram democracy bel thim lio ah siseh thim dih in siseh kan president zong hi a fiang rih lo i kan ithim dih hnu thlanga hnu long ah a fiang te ding a si.

Zei party dah president tuan te hnga? US lei cu Trump or Biden an ti lio ah kan nih cu zei party nih dah a tuan lai ticu za ah za in chim awk a tha rih lo. Sihmanhsehlaw, NLD theu hi an si te ko lai dah. “Winner takes All” system kan hman ko caah anmah theu nih an thim khawh te ko lai. Ram dang cu an mah le party ah thimnak an tuah i teinak a hmumi nih president i cuh khawhnak an hmuh hnuah US ahcun party pahnih nih an thimmi hna pahnih kha an cuhter han i thim an si lio ah Kawlram cu president thim hlan ah Vice President (VP) pathum thim ta a si hoi. Thimning hmanh hi zapi nih i fian khawh ding a si lo.

President caah thimtu pakhat cu party kip le pengtlang kip nih Pyithu Hluatdaw caah kan thimmi hna palai hna nih an vun chuahpimi, rakkap pawl cu mipi nih thim an si lo caah hika zawn ahhin cun an i tel ve lo. Pahnih nak ding a vun chuahpi tu hna hi pengkip le party kip nih kan thimtlinmi hna Amyotha Hluatdaw palai nih an vun thimmi si ve. Amyota hlutdaw nih an vun chuahpi mi hi tlangcungmi si hrimhrim lai ti cu phunghrampi ah aum lo nain, a voikhatnak hlutdaw nih Shanpa Dr. Sai Mauk Kham an thimmi le a voi hnih nak hluatdaw nih Dr. Henry Van Thio an thimmi ruah ah a voi thumnak zong hi thlangcungmi a si thiam ko lai dah. Ralkap pawl hi hika zawnah an i tel lo kan ti nain an phunghram suaimi cu anmah ca bakah raksual hna kaw Pyithu le Amyota hluatdaw chungtel ralkap nih pakhat thimnak an ngeih caah anmah minung an vun chuahpi ve tikah pathum an si.

Pathum an ifian hnu ah zongah mipi nih thim si loin Hlutdaw kuzale vialte nih Secret Ballot in thim an si caah zawndamh in rak ruah chung ding a har ngaingai. Hlutdaw kuzale 664 nih anmah duhmi an thim lai caah kuzale tambik angeimi party nih anmah duhmi an thim lai i mahcu kan president thar a si ko lai. A hodah tambik a hmu ne hnga? 2015 thim lio kha cu i thlen kan duhtuk lio cio sikaw, ithlen caan a za cang ti in NLD nih a dihlak in aa hui dih an ti. Sihamnhsehlaw, a dihlak cun aa hui ngaingai lo. Mah le chuahpi mi cio kha vote pek si lai caah a hoadah tambik vote cu a hmu te ne hnga?

2015 thimnak lio ah NLD nih Pyithawsuh hlutdaw ah thutden 390 an rak hmuh caah president tlin khawnak ding ah an vote 333 hmuh hmnah hei herh sehlaw 57 tluk cu midang hmanh an thenh khawh rih hna tinak a si. 2020 hi NLD uarnak le zumhnak a zor ngaingai ve cang. Tlangcung party nih hin 2015 ah 56 lawng an rak teimi kha an i funtom deuh cang i an lungfim cio cang hna caah 100 lengkai an tei hrimhrim cang lai dah. Siangngakchia buainak lio ah an rak uarngaimi Ko Ko Kyi party le ramdang tiang nih an thanhca ah Kawlram ah Aungsan Suh Kyi a vun chawngtu site men lai an ti ve mi Thet Thet Khaing PPP party nih hin NLD party vote le thutden tamnawn cu a chuh ve theu lai. UDP party hi NLD changtu tlukin hmunhma an ngei lai tiah an vunt ti lio ah an hruaitu U Kyaw Myint an vun tlaihmi nih zeitiang dek a hnursuan te hna hnga.

NLD nih hin thutden hi 100 tluk cu an sungh lai caah phithawsuh hlutdaw ahhin 280 pin an hmuh lai zumh um ti lo. Asine ahcun USDP nih maw president thimnak ah teinak an hmuh ne lai vun ti ah hmuh dawh an si hui lo. An rak zor ve thiam thiam lai. 2015 lio ah thutden 41 lawng an hmuh. 2015 thimnak ding caah anmah chung in U Shew Maan UBP ahung dir tikah USDP vote le thutden tlawmpal a beuh ding a fiang cang. Ralkap nih an rak ngeihmi thutden 166 le tukum i an hmuh dingmi hi fonh hmanh ah 200 a tlin khawh lo ding hi a fiang ngai cang. Tlangcungmi party in a rak kaimi nih USDP nih chuahpimi nak cun NLD theu ah vote an sanh rih lai caah NLD chuahpi mi theu nih president cu an tuan ko lai. Tlangcungmi nih kan vun chuahpi mi president caah hin 2015 lio ah Pu Van Thio nih a rak hmuhmi 79 kha cu a longh hrimhrim lai i 100 leng zawng hmuh khawh a si.

Zeiti a va si hmanh ah, tlangcungmi nih thimmi nih 100 hmu seh, Ralkap lei nih chuahpimi nih 200 hmanh hmu sehlaw, NLD nih hin 290 hrawng cu an ngeih ko lai caah tulio ah kan chim ngaimi coalition cozah kan timi hi NLD nih a herh lem rih lai lo. Prsident hmuhnak ding ah vote 333 a herh lem lo. Thimmi hi pahnih an si loh i pathum an si caah a si.

Mizeidah an vun chuahpi cio te hnga hnga? Ralkap lei nih hin Gen Min Aung Hlaing an vun chuahpi hnga maw? Russia a kal lio i a chimmi bia kha kan theih dih. Kawlram president tuah kho ding in ka sining nih a tlinh dih a rak ti kha mu. A tlinhnak kong a chimmi si ko lai tiah ka ruah. A tu i a dirhmun khi nawl a ngeih deuh ko caah a chuahtak sian lai ka zum lo. Thawngzamh cheu khat nih Min Aung Hliang nih party 36 a ton hna an timi le tuan deuh ah biaknak lei a bawmh len mi hna kha president tuan a rak duh ziar caah a si hnga maw? Kalwram president cu a min men tuan as i ko rih i asinain president ka ngah bak ko lai ti aa fian ahcun a tu a dirhmun cu chuahtak zong a sian ko lai nian NLD he lungtlinnak “give and take” an ngeih lo ahcun a tu i a dirhmun chuahtak tung in president a ngah lo ahcun viahvuanh le lohtlau lam a hrawn lai caah midang an chuahpi lai zumh a um deuh. Ral kap nih president an tuan bel ah cun president zong cu nawl ngei taktak si than ko hnga.

Minung pathum chuahpimi lak ah a tambik vote hmumi nih president pi sinak, a dang pahnih nih VP 1 &2 an si ko lai caah tlangcungmi nih hin a tulio ah a kan tuanpiak mi VP Pu Van Thio hi thlen duhnak lungthin an ngei hnga maw, uting nauzo cio in Kachin lei tibantuk hna nih midang an vun chuahpi ve hnga maw? NLD chung asi lomi cu an vun chuahpi ah teh, NLD lei nih an lung tling hnga maw? Atutiang ah cun a riantuannak ah minchiatnak a ngeih lemlo pin ah an uar ngai rih ko mi a lawh caah pehter khawh zong a si ko. President sinak ding thim fung a tlinh maw tlinh lo timi tahfung a thar in hman zong a hau ti lai loh i aa ning ngai hnga. NLD chugin Amyota Hlutdaw palai nih an dir kamh theo lai va si kaw. Amah an vun tar than ding zumh aum ko.

Presidenh pi zong cu NLD nih an vun chuahpi mi nih a tuan ko lai caah midang chuahpi len a har tiah U Win Myint theu an vun chuapi te hnga maw? Asi lo ah minung pakhat chuahter i tlawmpal ah dinhter i a dang thimthan ti phun in president a tuan bal ve tinak ah le an tuan paoh in thongtla chuahnak hna ah a tha ko an ti than hui hnga maw? Azei a va si hmanh ah atu ning cun NLD president tuan cu ASSK nawl ngeihnak tang ah um a si ko caah a biapi tuk ah ruah cio a si lo. VP sinak tu hi Pu Van Thio hna nih a tlaih khawh rih ahcun Laimi caah vanthat vialte le thluachuah a si rih ko lai.
Credit-Rev Dr.Tuan Peng Thang

Be the first to comment

Leave a Reply

Your email address will not be published.


*