PMG nih “Christmas Lungput” kan ngeih khawhnak hnga kan rak tial mi chungin thazaang la ti cio dingin Bawih Khrih min in kan in sawm hna. ᴄʜʀɪsᴛᴍᴀs ʟᴜɴɢᴘᴜᴛ

PMG nih “Christmas Lungput” kan ngeih khawhnak hnga kan rak tial mi chungin thazaang la ti cio dingin Bawih Khrih min in kan in sawm hna. ᴄʜʀɪsᴛᴍᴀs ʟᴜɴɢᴘᴜᴛ

December thla Christmas caan cu mi vialte caah a sunglawi tuk mi le philh awk a tha lo mi ni le caan a si. Sihmanhsehlaw, Christmas sullam le Christmas lungput hngalh lo in nuamhnak menmen in caan a dih ter mi kan tam tuk cang. Kumtam pi Christmas kan hman, Christmas lawmhnak kan tuah ko nain Christmas lungput a ngeimi cu mi tlawmte lawng an si rih. Thil pakhat kan tuahnak ah a biapi bik mi cu kan tuah mi nak in a ruang a biapi deuh, cu ve bantuk in, thil a can minak in a biapi deuh mi cu a can tertu le zeiruangah dah mah thil a cang ti hi a si.

Cu caah, zumtu kan caah a Christmas nak in a biapi deuh mi cu Christmas lungput le Christmas sullam hngalh hi a si. Christmas lungput ngei lo in kan hmanmi Christmas cu dawtu kan Pathian caah rimhmui mi raithawinak ah cohlan khawh a si lo.

Christmas lungput kan ngeih khawh nak hnga, hngalh ding a si mi Christmas lungput hna cu:Peknak Lungput: Peknak te loin Christmas a um khawh lo bantuk in Peknak te loin Christmas hman hi Christmas lawmh a si lo. Pa Pathian nih a fapa ngeihchun Jesuh Khrih vawlei misual mi kan caah a kan peknak hi Christmas muru/lungput cu a si. Cu caah, Christmas ni le caan ah Pathian caah zeibantuk a sunglawi mi thil dah kan pek ve lai. Pathian caah Pek sian lomi thil kan ngeih chungpoah cu Christmas lungput kan ngei rih lo tinak a si (John 3:16).

Kaltak Lungput: Khrih caah Kaltak mi ngei lo in Christmas hman cu tuah mi sullam hngalh lo he ai khat. Khriht nih van sunparnak vialte a kaltak bantuk in, nang le kei nih ta Khrih caah zeidah kaltak mi kan ngei ve. Khrih nih van sunparnak a kaltak bantuk in Amah caah kan duh bik mi, kan dawt bik mi le kan herh bik mi hna zong kaltak caan a si ve cang. Khrih caah kaltak mi kan ngeih lo ahcun Christmas lungput kan ngei lo tinak a si (2 Cor 8:9).

Nawlngeinak Lungput: Christmas kan sunglawi tuk ko nain Khrih nawl kan ngeih tung lo ahcun santlaihnak a ngei lo. Mary nih a nu sinak kaltak in nawlngeinak a thim bantuk in kan sinak kaltak in nawklngeinak i thim hi Christmas lungput a si. Christmas ah zeitluk hmanh in i nuam ko hna hmanh u sihlaw, zeitluk hman in Pathian caah tiin thil lianngan tuah ko hmanh u sihlaw, Khrih nawl kan ngeih lo ahcun kan tuah mi hna hi Pathian caah pakpa lawnglawng te an si (Luke 1:38).

Zuan Ruahnak Lungput: Christmas lungput cu midang zuan ruahnak lungput a si. Joseph nih cu a hman mi dantatnak Mary in ter khawh a si ko nain, mihmai ah nizahter le mualpho ter a duh lo caah a thli tein an i hamnak cu hrawk aa tim. Christmas lungput a ngei mi cu Joseph bantuk in midang zuan ruahnak an ngei. A palh ko mi le a sual ko mi cung zongah zuanruahnak he minun sersiam an i tim peng. Na hmaan ko zongah midang zuanruahnak ngei hi Christmas lungput ngeih a si Matthiam 1:19

Diahnak Lungput: Christmas lungput cu daihnak a duhmi lungput a si. Khrih cu a daih zan ah a chuah bantuk in daihnak he Christmas kan hman lo ahcun Khrih kan sinah ai phuang lai lo. Christmas caan ah Pathian he dai tein hawikomhnak caan hman lo in mi vialte kan i manh lo caan le kan buai bik caan a si ruangah voitampi cu Christmas lungput kan khen lo caah, kan i nuamhnak cu rawhnak le buainak in a dong tawn. Christmas ni le caan ah daihnak he Khrih ton khawh i zuam hna u sih Luke 2:8-21.

Thangthatnak Lungput: Christmas caan ah hi a Christmas nak in dawtu Pathian cungah thangthatnak he kan i lawmhnak kan langhter caan tu a si awk a si. Christmas ni le caan ah kan i lawmh lo ahcun Christmas lungput kan ngei lo tinak a si. Christmas lungput le a sullam a hngaltu caah cun lawmhnak in Pathian a biak ni le an thangthatnak ni le caan sunglawi bik mi ni ah an hman Luke 2:13-14.

Cung lei Zohnak Lungput: Christmas caan cu cung lei zoh in kal nun a si. Vawlei lei zoh buin le vawlei thil he Christmas kan hman chung poah cu Khrih kan tong kho lai lo. Mifim hna nih Arfi zoh in an kal tikah an luh lonak ding inn ah an luh sual tikah ngeihchiatnak ram chung ah an tlun ter bantuk in a tlamtling lo minung zoh in le vawlei zoh in Khrih ton le Khrihfa si kan i zuam ahcun lam an in pial pi khawh. Sihmanhsehlaw, cung lei thlarau hruainak kan zulh ahcun a hmaan mi lam ah an hruai lai Matthiam 2:1-12. Khrih nih a ratpi mi dawtnak, lawmhnak, daihnak, le hnangamnak cu nan dihlak cungah tlung ko seh. Credit-Prayer Ministry Group

Be the first to comment

Leave a Reply

Your email address will not be published.


*