Pi Suu Cawnpiaknak ah CNLD ah thimfung thlak dih ding a si

2012 Canceo Thimnak an rak luh ah, NLD nih 2008 Phunghram remh khawh dingah ti in an rak lut. Kan MP milu an tlawm tuk caah hi tan ahcun kan remh kho lo, an rak kan ti.

2015 ah cun, a phunphun in bia an rak kan kamh. 2008 Phunghram kan remh lai, Hriamtlai he daihnak ser tehna cu a fawi tuk, Tlangmi vialte he daihnak kan ser cang lai,  Myitsone Dam project kong zong mipi hmai ah thlamlang in kan phozar lai, Kawlram cu kum 5 chungah Singapore tluk kan siter lai tbk in a phunphun in an rak kan kamh.

“Thlen Caan A Cu” an rak kan ti.Zeidah an thlen? An thlen khawhmi ngai um lo. Corruption an doh khawhnak hmun ah an doh khawh bantuk si nain, Anti-Corruption lultai an thimmi pa nih ziknawh eihmuar rian aa khinh hnu in Oo-Paing Company ah share tor lakte aa cawk khawh, ti si. Corruption dohtu dingah an thimmi minung lila nih ziknawh an ilaak tinak a si.

2015-2020 chungah NLD nih ralkap a ti ngam hnanak tampi a um. Mipi dirpi tuk lio caan ah thlennak cu a ran khawh chung rangin an rak tuah awk khi si. Nain, zei huaha an tuah lo. An iduadater.

USDP thil tuah khawhmi phun paoh an rak tuah ngam dih ve. Nain mipi le a bikin Tlangmi hna kan chungmang cu hnu ah an ichiit.An caan dih lai ceo ah, Phunghram remh kong cu an hrihhawh. USDP nih State Chief mante ithimnak onh usih an ti hna. Cucu NLD nih an duh lo. Hi zawn hrim ah NLD nih strategy aa palh diam.

Ralkap 25% MP an thian hnu lawngah State Chief mahte ithimnak cu kan cohlan lai, ti an si. An ti duhmi cu, Tlangmi hna nih party dang he ifonh in NLD an zuamcawh khawh sual lai tinak khi si ko.

“Cu State Chief mahte ithim khawhnak ding nan cohlan khawh dingah kum zeizat dah nan irauh lai,” tiah an Secretary Monywa Aung Shin bia an hal tikah, “kum 10 zong kho, kum 15 zong si kho” a ti men.

NLD nih a tlawm bik kum 15 tal cu uknak tlaihta an duh ti a lang. USDP thlanglamhnak in anmah nih teinak co peng an itim kan ti ko lai. Mah hihi Democracy ram ah cun ram rawhnak lam a si.  A rawkmi democracy lam panhnak khi si ko.

Korea nih zaleennak a rak hmuhka ah an mifim bik pa nih a rak hruai hna. Mipi an rak uar tukmi a si. Nitlak ram Univ sang bik pathum ah parzik degree la a rak si. Ramkip hruaitu le UN tehna lutlai pawl cu a hawikom an rak si tikah, Korea ram ṭhanchonak le iremhṭhannak caah ti in ramdang in phaisa a tomtom in a rak luhpi khawh.

Lam an co lo maw? An cawh tung ve ko. Ti an dil lo maw? An dil tung ve ko. Nain, an ram cu ziknawh eihmuarnak nih a khuh i cunglei ai khawt kho lo. Mi thurhnawm rum cronies pawl lawngte an rak chuak. Mipi zaran anmah ning peng an rak si. General Park Chung-hee nih uknak a va chuh hnu lawngin ram cu mipi can isersiamnak ah aa let. “The Miracle of Han River” ti in Han River kiang cu a cer in a cermi khuapi ah aa chuah.

Chin duhmi cu, democracy min ibunh in uknak itlaih ihum peng a duhtu NLD hi zumh tlak an si maw? ti khi si. Ramkhel party lam nihcun uknak itlaih peng ding cu an itinh awk cu si ko hnga. Nain, mipi le rammi, a bikin, Tlangmi hna caah cun iralrin taktak kan herh.

Tlangmi hna ca lam ah cun NLD cu zumhtlak an si kho hrim ti lo. Hakha ah NLD nih an party zungpi an sak. Uknak an lak hnu in khuapi kipah an party zung pipi cu an sak lulh hna.Ralkap chan lio Pi Suu bia kan rak ngaih tawnnak NLD HQ pi zong cu cunglei ikhawt zuk tleu lellul in an isak khawh.

Company nih an kan sakpiakmi a si an iti. “Zei company, ho company, zei phu hlutmi phaisa” ti in mipi nih theih si lo.Company pakhat nih Hakha NLD zungpi a sakpiak hna man ah cu company nih zei project dah a rak co i aa rak itlaih khawh ve ti kherhhlainak tuah um lo.

Korea tbk Democracy cawlcangh ning a ṭhat tuk cangnak ram hna ahcun “Khomchal” an timi “Sihni le Palik Fonh Kherhhlai Phu” nih an kherhlai hna lai. Khomchal nihcun President zong kherhhlainak nawl an ngei.
Preisdent Park Geun-hye cu Samsung chief he iziknawh, cu bantuk innlo isakpiak phunphai ruangah thong ah ngeu ko in an khumh hna.

Ziknawh eihmuar lei ah NLD cu zumhtlak an si lo. Chin State NLD lawng si lo. Kawlram pumpi ngawt an si. Ziknawh an lakmi khi ziknawh si maw si lo mipi nih kan ifian lomi tampi um rih lai.NLD cu Tlangcungmi hna hmailei kan techin fapar caah zumhtlak an si lo.

Pi Suu nih “Chin pawl cu anmah le an thuam, anmah le identity tein an um ve khi ka uar tuk. Cutincun an si awk si ko” tiah anmah Kawl pawl sinah biadawh ngai a rak chim.  Ne Win hmanh nih Tlangmi pawl kha hranhram in kan phung le kan lam hrawh aa tim lo. Kum fatin mah miphun thuam cio in Rangoon ah laam a sawm hna, rawl hrawn a rak kawh hna.

State Chief mahte ithim ding NLD nih an cohlan lo, kanmah thawng lawngin timi ruahnak an ngeih tikah, a nemnak in Tlangmi cu nawnnok dih timh he aa khat. Tilum te ah ciah hmasa hna i duhsah duhsah in an von ihngalh lo kar ah tizatlok in chumh pet ding ti khi si ko.

Cucaah, NLD nih Coalition Cozah a ser duh pek, a ser duh lo pek ah, Tlangmi nihcun kanmah miphun a aiawh khotu miphun party sinah kan thimfung burh dih a herh.

A lung ai khonter i Tlangmi caah strategy a thiam lo tukmi NLD cu cawnpiak hrim an herh. Kan caah an mit an ichinhternak khi auter ding an si. Miphun party a ṭhawng bik si paoh cun, Mipphun party cozah cu ser si ko lai.

CNLD nih khuazei ahdah phaisa a lak lai tiah maw nan thin phaang lai uci. A kuung cung ah buri tomtom in an kan ṭawhpiak te lai cu.Cu tikah, Pi Suu zong nih “Aw, hihi maw si, annih zong tang zoh in kan zoh hna awk si lo, kanmah he aa ruang le aa tluk in kan zoh ve hna awk a si,” timi lungput Kawl pawl sinah a vuih te hna lai.Credit-Salai C Alexander

Be the first to comment

Leave a Reply

Your email address will not be published.


*