Phung Seh Ka Chim Ve Tuah Aih

Tukum X’mas ni pumh cu kan Khrihfabu ah keimah nih caan ka tlaih. Pumh lio caan tlaih nana cu NLD kong le USDP kong chim awk ṭha ti hlah kaw, Pathian kong bak ka chim ve. X’mas ni a si fawn tikah arfi zoh thiam nichuahlei mifim pathum hna kong le Herod Siangpahnrang pa kong, asiloah vancungmi le tukhaltu hna kong, asiloah Bethlehem khua le caw rawl einak kuang kong ṭheu cu chim a hau fawn ṭung i, keitu cu Merry kong le Joseph kong bak hen ta ka chim ve ko. Caantlaitu kan ti cu biatam chim awk ṭha fawn hlah kaw, a tawi khawh chung tawi in ka chim ka ti ko nain atu kha cei lak ka chim ko rua, Evangelist hna ka lo thulh hnga dek maw?

Pathian Thil Tuah:Pathian thil tuah le minung thil tuah hi aa lo bak lo. Phundang pi a si. A mak ngai. Minung a kan khamhning zoh tikah bia kaakhat chim sehlaw a dih komi cu minung ah hon i cang ta riangmang in a kan khamh ko. Minung ah hon i can ta hnuhnu cun nu nih thla kua chung bak pawi a hau cang i, hrin ngieingiei a hau cang. Cu tikah nungak Merry kha a pawitu ding “NU” ah a hman bak ko. Pawi le hrin lawng a za lo i, kum tling a si tiang zohkhenh le cawmken a hauh rih caah a zohkhenhtu ding le a cawmkengtu dingah Joseph kha “PA” ah a hman bak ve.

Hihi a sawhsawh a si bal lai lo dah. Merry le Joseph hi hawi nakin zeidek an pical deuhnak le an pipa deuhnak pakhat khat cu a um ko lai ti a fiang. Atulio i ahopaoh nih Jesuh kan ngeih lulh ciomi bantuk phun le thlarau kan ngeih lulh ciomi bantuk phun hi cu a si rua lo dah. Phundang in kan chim ahcun, Joseph le Merry hi Bawi Jesuh a nu le a pa an si ko i, Bawi Jesuh a ngeitu bak zong an si ko.

Merry:Merry ka uar tuknak pahnih a um. A pakhatnak cu, vancungmi nih fa na pawi lai an ti tikah ral ṭha taktak in a el ngammi hna hi a si. Minung hi i phuhrun pah bu cun kan ral a ṭha kho ngaingai tawn lo. A el hnanak a ruang zong hi a mah pumpak nungak thianghlim a sinak cherhchan bakin a el fawn hna. Ngaknu thiang ka si a ti bak ko(Mark, 1:34). Pathian fapa “nu” ding ciammam! Pastor te nih aa ṭhi-um dingmi hna kutsih lehthahnak an tuah tawn hna i, biakamnak an tuahter tawn hna.

Biakamnak an tuahter tawnmi hna belte cu, na nupi na vapa hi sifah dam lo tikah ka dawt ko lai tiah bia naa kam maw hei ti hrawnghrang khi a si ve tawn. A ngaingai tiah, “nungak thianghlim” le “tlangval thianghlim ka si ko tiah, bia naa kam maw” kan ti hna sehlaw, nu le va a si kho loding kan tlawmte men lai lo dah. Hika zawnte cu Pastor te hi “naa-le-hmuh” an ngei ngaingai ko.

A pahnihnak cu, fa na pawi dingmi hi thiangthlarau in a si lai an ti tikah “na chim bang cun ka cungah tlung ko seh” a ti colhmi hi a si fawn. Hika zawnah mi nunnem, mi lungthiang, mi toidor a sinak a lang. Merry hi Laimi siseh law, bia tampi a chim rih ko lai dah. Na chim bang cun si ko seh a ti hnu zongah voi tam tuk te aa leet ṭhan rih fawn lai dah.

Joseph:Baibal ca nih “a hamtu Joseph cu thil a hmaanning in tuah a duh zungzal mi a si”a timi hi ka uar tuk hoi(Mathai, 1:19). Pathian fapa “pa” ding ciammam! Hi Baibal bia nih Jesuh ka ngei ti hnuhnu le thlarau ka ngei ti hnuhnu ahcun zei thil paoh hi a hmaan lo ning le a si lo ningin  tuah le nawnnok phung an si ti lo zia a fianter ngai.

A ngaingai tiah, kan chungah a ummi Jesuh, asiloah thiangthlarau hi kan nuncan le kan ziaza a kan remhtu an si rua lo. Kanmah tu hi Jesuh asiloah, thiangthlarau a ngeitu kan si caah kan nuncan le kan ziaza aa remh deuhding kan si rua. Jesuh ngeih le thlarau ngeih hi Laimi lawnglawng nih ngeih sawhsawh in kan ngeih rua dah.credit-Perhkalh

Be the first to comment

Leave a Reply

Your email address will not be published.


*