Pentecostal zumhnak le cawnpiaknak nihcun Thiang Thlarau rianttuannak le cawlcanghnak hi a cohlan.

Pentecostalism: trinitarian pentecostal & oneness pentecostal.Pentecostal zumhnak le cawnpiaknak nihcun Thiang Thlarau rianttuannak le cawlcanghnak hi a cohlan. Thiang Thlarau tipilnak silole tinconak hi “pentecostal tlaihtleng” biapi ngaimi si. Cheukhat nih Thiang Thlarau tinconak cu holh dang silole vanholh holh khawhnak hna tbk hi tehte le hmelchunhnak in an hman. Cun, cheukhat nih zumhnak ruangah nunning silole nunnak thlennak hi Thiang Thlarau tipilnak ah tehte in an hman ve. Thiang Thlarau laksawng, laamnak, kutbenghnak, kutthlirnak, ttulhnak, vanholhnak, damternak, amennak, halejluiahnak, hosananak tbk hna hi “pentecostal” ahcun hmualngei tukmi an si.

Pentecostal kong hi tuanbia mit in kan chim si cun, phun hnih in tthen khawh si. Voikhatnak pentecost cu lamkaltu zultu hna chan Jerusalem ah a rak cang. Lamkaltu chan a dih hnuin, vawlei ah “pentecost” hi chan le kum tampi chung a dai. Nain, kum zabu 19 donghlei le zabu 20 thawkka  ah “chanthar pentecost” cu a rak cang.

Cucu tuni kristian zumhnak ah thlennak silole tharchuahnak tampi umtertu zong si. Tuni ahcun pentecostal kristian zumtu zong million tampi an si ve cang. Thiang Thlarau cawlcanghnak in pumpak in Pathian hmuhton, pehtlaih le hawikomh hi pentecostal zumhnak ah biapi ngaingai.

Pentecostal kristian hi phun hnih in an um: trinitarian pentecostal le oneness pentecostal tiah. Thiang Thlarau tinconak/tipilnak cu biapi in an chiah veve. Cun, vanholh le laksawng tbk zong an zumh veve. Nain, dannak nganpi an ngei. An i-dannak le ralkahnak cu tihin van langhter khawh si:

Trinitarian pentecostal nihcun:1. Pakhat Pathian cu thumkomh in a zumh.2.Thumkomh min in tipilternak a tuah.3. Jesuh cu Khamhtu in cohlan hi khamhnak caah a zumh.

Oneness pentecostal nihcun:1.Pakhat Pathian cu Jesuh Khrih in a zumh.2. Jesuh min in tipilternak a tuah.3.Jesuh zumhnak, Jesuh min tipilnak le Thiang Thlarau tinconak cu khamhnak ah herhmi in a zumh.

Bultan ngai in “pentecostalism” kong ka van langhter. Kohhran min cu mah duhmi paoh sak le bunh khawhmi si, a biapimi cu kohhran muru nih “a zumhmi le tuahmi kha si”. Phun dang cun kohhran nih biatak le biadik in a zumhmi, cawnpiakmi le dirpimi chungril kha, thlarau khamhnak caah laireltu le tlangkawmtu si. Kohhran pakhat silole cawnpiaktu pakhat kong tbk chim, ceih le ttial tikah; a biapi cemmi cu “a zumhnak le cawnpiaknak muru le tlaihtleng” hi si. 

Note: Lairam ah oneness pentecostal cu UPC min in kum 1965 in ai thawk ve (Van Nun Lian ttialmi “UPC Zumhnak & Cawnpiaknak” cauk ah rel khawh si.Credit-Chin UPC Denmark

Be the first to comment

Leave a Reply

Your email address will not be published.


*