Pathian nih Kawhhran (Church) a dirh i Minung nih Bu (Denomination) a dirh

KA KAWHHRAN (CHURCH) KA DIRH LAI
I WILL BUILD MY CHURCH.Mt. 16: 18
timi a peh

Pathian nih Kawhhran (Church) a dirh i Minung nih Bu (Denomination) a dirh

Minung nih a dirhmi Bu (Denomination) hna an i pumhnâk Biaknâk inn ( dik lo ngai in Biakinn tiah kan timi) lênglei vâmpang ah Pathian dirhmi Kawhhran (Church) timi cu ca in kan țial i Baptist Church, Methodist Church le a dang dang tiah ah kan târ.

Asinain cu biaknâk inn chungah aipum mi minung tam deuh an nunnâk asiloah an lungthin vâmpang ah Pathian dirhmi Kawhhran (Church) timi tu cu ai târ ti lo. Ai târmi zong cu an um ko lai.

Hi hi kan ral Khuachia asiloah  Sehtan hlennâk vialte lak ah a fakbik mi le a poi bikmi hlennâk a si.

Cucaah mitam deuh cu Pathian dirhmi Kawhhran (Church) tak tak si loin minung dirhmi Bu (Denomination) lawng kan si caah Pathian nih vulei ah a dirhmi A Kawhhran (Church) nih a țuanvo ngan bik rian hi kan tlolh i kan țuanvo a si lomi hna kha biatak tein kan i hmaithlak i kan țuan tawn.

A si ah Kawhran țuanvo ngan bik cu zeidah a si tiah biahalnâk kan tuah ahcun a lehnâk dik cu:-

A TLAUMI THLARAU KAWL I KHAMH
hi a si. Jesuh nih taksa in a nun lio ah a rak chimmi cu ‘. ..zeitintiah Mi Fapa hi a tlaumi kawl hi khamh ding ah a ra’ ti hi a si. Lk. 19:10

A thih i a thawhțhân hnu ah Lamkaltu hna an i pumhnâk ah mit hmuh khawh in ai langh i a voi khatnâk ah a rak chimmi zong:-

‘Pa nih aka thlah bangin kei zong nih kan thlah hna’ ti hi a si. Jn. 20:21.

Van i a kai lai te ah A dirhmi a Kawhhran sinah hmadung bik bia a cah asiloah nawl a pekmi zong:-

‘Vawlei vialte ah kal u law sermi vialte sinah thawngțha hi chim u’ ti hi a si. Mk. 16:15

Cucaah Pathian nih Fapa Jesuh nunnâk thisen sunglawi hmangin a Kawh i a dirhmi a Kawhhran (Church) țuanvo asiloah  rian ngan bik cu a tlaumi thlarau kawl i khamh hi a si.

Kristian (Khrihfa) kan sinâk he ai pehtlai in kan hmanmi Mirâng holh pakhat cu ‘Mission’ timi hi a si i anmah Mirâng lila nih Mission timi an hrilhfiah ning phun khat cu:-

‘Sent out for special task’ ti hi a si. Kristian Pathian cu mission Pathian a si. Eden dûm ah a tlaumi Adam le Evi kawl ah Pa Pathian cu Amah le Amah van khualipi in ai thlah i:-

Adam khuazeiahdah na um tiah a kawl i a khamh hna.Hra. (Gen) 3:8 le câng 21 zoh

Fapa Pathian Jesuh zong a tlaumi kawl i khamh dingah thlahmi le a ra mi a si. Lk. 19:10

Thiang Thlarau Pathian zong a tlaumi kawl i khamh ding ah, Tho țhân Fapa Jesuh nih Pentikost ni ah vanin a run thlah (Lam. 2:33 rak rel te) i kha ni ah khan thlarau tlau mi thongthum nih khamhnâk an hmuh.

Cu ri cun Lamkaltu chan i Kawhhran (Church) nih an pehzulh thluahmah mi rian cu a tlaumi thlarau kawl i khamh a si. Lamkaltu cauk dihlak hi rel law na hngalh lai

Pathian Pakhat ah Mi pathum, Pa, Fapa, Thiang Thlarau cu an pathum (1Jn. 5:7 NKJV in lehmi BaiBal Cathiang le Rualuk Study Baibal ah va zoh te) tein, pakhat hmanh bau loin a tlaumi thlarau kawl i khamh dingah thlah an si.

Cucaah Pathian dirhmi Kawhhran (Church) tak tak na si ah cun Pathian nih hi lei ah Kawhhran (Church) a dirh chan a țuanvo le a rian, thlarau tlau kawl i khamhnâk rian hi  nangmah nai hngalh i na fian tluk in na hngalh fian ko lai.

Cucaah Kawhhran (Church) timi sullam le tinhmi kan hngalh fian lo caah kan rian a simi thlarau tlau kawl i khamhnâk rian hi voi tamtuk kan rak tlolh i kan tlolh cuahmah i kan tlolh țhân lengmang ko lai.

Cucaah dah kaw Kawhhran (Church) chawva hna i a hmannâk zawn ah hmang loin a hmanlonâk ah kan hman tawn cu.

Thawngțha procuction nih online in bia anka halmi ka lehnâk an comment mi ah mi pa khat nih, tlângbawi (pastor) ei ding a simi cheuhra cheu khat kha Rual Uk le Evangelist dang nih an ei i motor cawknâk le innsaknâk hna ah an hman tiah a timi kha Baibal hi rel seh law cu kha comment ca kha a țial ngam theng lai lo.

FB hi duh pauh i pawtnâk hmun a si i zei ruatrat lo le hngal loin an paw tawn.Pathian dirhmi Kawhhran (Church) ah rianțuantu phun nga Baibal nih a chimmi chungah pastor hi a phunlinâk a si i Evangelist hi pastor hlan ah a phunthumnâk ah Baibal nih a chiah tihi kha pa nih khan a hngal lo i a fiang hrim hrim lo. Mi dang zong a hngal lomi le a fiang lomi kan um kho ko.

Efe. 4:11 hi Baibal Cathiang timi asiloah Mirâng Baibal in rak rel te.

Pathian dirhmi Kawhhran (Church) rian ngan bik le rian biapi bik cu thlarau tlau kawl i khamh a si caah cu rian a țuantu Evangelist le Pastor nih cun Kawhhran (Church) chawva cheuhra cheu khat le thawhlawm cu an ei hrim hrim ding a si.

Pastor nâk hmanh in Evangelist nih a ei hmasat lai. Zeicatiah Baibal nih Evangelist kha hmai ah a chiah i Pastor kha hnu ah a chiah. Efe. 4:11. zoh.

A poi bikmi cu Pathian dirhmi Kawhhran (Church) kha kan lungthin vampang ah târ loin minung dirhmi Bu (Denomination) hna pumhnâk biakinn vâmpang lawng ah kan târmi hi a si.

Cu nih a chuahpi mi cu Kawhran (Church) rian ngan bik thlarau tlau kawl i khamhnâk rian kha tlolh in Kawhhran (Church) Chawva le thazâng kha kan țuan ding a si lomi ah hlan lio upa bia bangin ‘Khuaivah zang bawngh’ in kan bawngh tawn.

Pathiah nih Kawhhran (Church) a dirhmi hi mit in hmuh khawh mi le kut in tongh khawhmi, a hmun lomi hi leiram pennâk caah dirhmi a si lo.

Mit in hmuh khawh lomi le kut in tongh khawh lomi thlarau ram, zungzal in a hmunmi pennâk caah dirhmi a si. Ka pehțhân te lai. Evan Rual Uk

Be the first to comment

Leave a Reply

Your email address will not be published.


*