Palik CDM Kong ah T’ial loin ka um hnga maw ka ti nain CDM hruaitu lei nih kau deuh in kan ruah khawh nakhnga ka rak t’ial t’han

Palik CDM Kong ah T’ial loin ka um hnga maw ka ti nain CDM hruaitu lei nih kau deuh in kan ruah khawh nakhnga ka rak t’ial t’han. Hakha le Thantlang lei i Laimi Palik tampi CDM ah an lut cang. Palik CDM le cozah rianttuan dang CDM ai khat lo. Palik cu zung an pelh (khunh hal loin um) ahcun thla 6 tiang thawng thlak khawh an si. (CDM a tuah mi palik nih an hngalh viar ko.

Tu kan dirhmun hi caan karlak boruak a si. Zei can kan kal lai hngalh a si lo. A kum zong maw a va rau te hnga kan hngal kho cio lai lo. Tikah palik CDM pawl ca harnak a chuak kho mi a um.

CDM an tuah ni in zapi sin umtlan a fawi ti lai lo. Tlaihkhih an ton sual ahcun Hren (lock-up) khawh cawlh an si. Tikah anmah khua hmanh ah zalong tein an um ngam hnga maw timi ruah awk a um. Anmah lawng hlah, nupi fate a ngei mi lebang cu an chungkhar in harnak a um kho dirhmun a si.

Hi bantuk dirhmun tiang an hngalh ko bu ah CDM an tuahmi a si. Mizapi lei nih “midang an nunnak hmanh pei a liam ko cu, teinak kan hmuh tikah nan rian kel nan ttuan ko lai cu ta,” kan ti sual khawh men. “Ram ca dawh a si ko cuh, caan a rau lai lo, Pathian nih a kan cawm ko lai,” a titu zong kan um lai.

Nain ralkap uknak teinak ding ca ah mah dirhmun vialte pah in CDM a tuahmi palik hi zoh sawh awk cu an ttha lai ka zum lo. Umtlannak kong ah, nuncan khuasaknak kong ah cozah rianttuan dang nakin harnak a tong kho mi dirhmun an si tikah ning le cang tein hruaitu nih timhlamhmi le khanmi kan ngeihpiak ko lai dah ka ti.CDM ciocio aa khah lonak tete a um kho mi a si. Credit-Salai Thawngpi

Be the first to comment

Leave a Reply

Your email address will not be published.


*