Northern Alliance kan unau pawl an hrang cang

Nihin May31 Kawlram lei caan in nihin zing deilei suimilam 1 tluk ah Northern Alliance ralkap unau simi AA, TNLA le MNDAA nih Shan ram Kutkhai peng ralhrang tatzin 123 an kah hna ralhrang lei rallbawi 1 telh in 11 an thah hna i a dang pawl cu an zam. Hriamnam tamlak te an chuh khawh hna.

Fimthiam-cawnnak Zunceh Tia A Si Zongah…Minung cu amah tein a fim colh lo ti cu hngalh cio mi a si. Fimthiam-cawnnak (education) hi a nunnak ah bawmtu ttha, hram fek a ngeihtertu a si pin ah nuncan ziaza ttha zong a ngeihter khawh caah fimthiam-cawnnak hi a biapi tukmi a si. Covid-19 pulrai ruangah siseh, ram pumpi nih harnak nganpi a tonmi ruangah siseh kan fale sianginn kum 2 an kai kho ti hna lo.

Sianginn kai awk zong in a lamkip in harnak kan tong i fimthiam-cawnnak lei ah muihnak nganpi chungah kan tlak lio caan a si. Kan fale hna cu an catang lei cun a zeitihmanh in sersiam awk an ttha ti lo nain, fimthiam- cawnnak cu a lamkip in kan bawmh khawh hna a si ahcun fimnak chung in an tlau lai lo. Nangmah le keimah nih kan bawmh khawhnak hna kha zunceh mei-ceu tia te lawng zong a si kho men ko, asinain cucu muilak ahcun a ttha hnem kho tuk ve ko tiah ka ruah. Cucaah a lamkip in kan fale fimthiam-cawnnak hi kan si khawh tawk cio in, pumpak, sang le veng in khrihfabu nih ttuanvo (ta-vuan) lak khawh kan i zuam hna lai.

Israel miphun cu Babilon ram i kum 70 sal an taan ah khan an fimthiam-cawnnak kha muihnak nih a khuh lo, Daniel le a hawile kha thiamsang an phan kho, saltang hna nih pumhnak inn timi synagogue an ser i cu nih cun cathiam sang, tuanbia a philh lomi miphun ah a sersiam khawh hna i nihin ni tiang an synagogue nih an zeizong a hrampi in har an tonmi a teipi khawh rih hna.

Johnson siangbawite kha an fale cu tang sarih an si tiang inn ah ca an chimh khawh hna (home-education), amah belte US ram in cawn awk cauk kut-tlaih an ngei kho. Hakha khua ah a luancia mi kum 70 hrawng ah khan Betty Lue (Elizabeth Johnson siangbawinu) nih an inn ah an fale sianginn ttha tuk an rak tuah piak khawh ko hna. Ramthumnak um Chinmi kan unau hna nih kan fale cawn awk ca nan kan tawlrel piak khawh tukmi a si ko i, mah le inn cio in kan fale inn ah cachimh kan thok ve hna lai.

Internet hmuh khawh a sinak khua pawl ahcun on-linezong in kan fale ca cawnter khawh an si. Abiana ah Sayama Tha Chin Sung (Tete) zong nih mirang ca cawnnak on-linein a kan tuah piak ko, a cungah kan i lawm tuk. Nan theih bang, Youtube zong ah mah le herhning in kawl khawh an si ko. Khuate lei ahcun khuami hna nih a si khawh chung in ngakchia ca cawnnak kha tawlrel piak ding an si, a herh ning in khuate he khuapi he biakinn kha fimthiam-cawnnak hmunhma ah sersiam ding an si ko.

Miphun luatnak zawnruahnak in siang cachimh rian a kaltak mi upat awktlak kan saya/mah te tampi an um fawn ko i, anmah ruahnak cheuhnak le bawmhnak in kan fale fimthiam-cawnnak cu kan tuah khawh lai ka zumh ko. Himnak kong belte ahhin lungre cu a thei ngai ko nain, Thiang Thlarau nih kan veng sehlaw, fim kan chim sehlaw, kan fale nih an herh tukmi fimthiam-cawnnak cu kan tuah piak hrimhrim hna ding a si ko. Catang lei in an tthan khawh lo hmanh ah fimthiamnak taktak a hmu mi, aa manh lo ngai mi ah sersiam ko hna usih. Daniel le a hawile nih khan “Nihra te hin kan hneksak hmanh” an rak ti ngam bang khan, Bawipa nih kan thok ve ahcun an kan ven ko lai. Mah le inn cio le biakinn cio nih thok ve ko hna usih. A hme deuhmi synagogue tete awt cio ko hna usih. Malaysia zong ah aa pumpe mi kan naule cathiam sang mino hna nih CSO sianginn an kan tuah piak i a ttha hnem i hmual a ngei tuk!By-Lal Pek Lian

Be the first to comment

Leave a Reply

Your email address will not be published.


*