NLD hruaitu Daw Aung San Suu Kyi hrim nih a pa sunparnak le a pa tuanbia cu a dirkamh zungzal lai.

Mah Le Tuanbia Dirkamh Usih Editor: 1. Kawl miphun nih zeiti hmanh in an tuanbia thlau an duh lo. Cucaah, sianginn kip ah Kawl siangpahrang hna an tuanbia le an miphun an lianngannak cu an kan cawnter. Kawl tuanbia kan cawn tikah an miphun an dirkamhnak, ral an teinak, an biaknak an sunghsaknak le an nunphung an kan cawnter. Hihi Kawl nih miphun pakhat an si nakin an miphun an dirkamh mi le an nunphung an kilven le thanchoter an duh ca ah a si.

  1. Boyoke Aung San cu Myanmar ram luatnak lakpiak tu, miphun dang uknak duh lo in Kawl mi zalonnak ca ah hriam a tlaitu a si. Kawl miphun dihlak nih Boyoke i a miphun a dirkamhnak le aa zuamnak cu an philh lai lo i ah tuanbia ah an thlau lai lo. Miraang chan ah Kawl in riansang, uktu tampi an um ko. Asinain, miraang kuttang ah miraang nih tuah uh, ti uh timi fialchuk fialcho in rian a tuantu an si ca ah cu pawl kong cu Kawl miphun nih an miphun dirkamhtu le philh lo ding mi ah an chia hna lo i an tuanbia an kilvenpiak hna lai lo.
  2. NLD hruaitu Daw Aung San Suu Kyi hrim nih a pa sunparnak le a pa tuanbia cu a dirkamh zungzal lai. Miphun ca ah aa peknak lawng si lo in a pa a sinak le a thisa a sinak in a pa tuanbia a hmun camcim nakhnga aa zuam zungzal lai. Amah zong a thih tikah a tuanbia tlau lo nak ding ah ro chiahta ding aa zuam lai. Cucu miphun lungput pical le mah tuanbia ven a si.
  3. Kanmah Chin miphun nih Kawl mi sin in i cawn awk tampi kan ngei. Zeitluk in kan caholh, kan nunphung le kan tuanbia kan upat i hngalh kan i zuam. Kan tuanbia a thar in kan theih than i kan miphun kilvennak ca ah zeitindah kan i zuam lai. Kan miphun tuanbia, kan nunphung le kan miphung sinak cu miphun dang nih an kan tialpiak lai lo, kilvenpiak lai lo i an thanchoter fawn lai lo.
  4. Daw Aung San Suu Kyi le Kawl nih a pa an dirkamh bantuk in kanmah Chin miphun nih tah kan pa le chung in tuanbia roling a kan tialpiak tu hna zeitindah an tuanbia kan dirkamh ve. Pu Khai Kam a tu le a fa le nih a pa tuanbia roling hi a chanchung kan hngalh nakding ah zeitluk in an dirkamh. Kanmah Chin miphun nih ta zeitluk in kan tuanbia kan i sunhlawih. Cu ve bantuk in Pu Lal Luai, Pu Con Bik, Pu Hrang Nawl, Pu Kio Mang, Pu Thawng Za Khup, Pu Thlur Hmung tbk kan miphun aiawh in rian an tuan mi an tulefa nih kan dirkamh hna maw? Miphun ca ah pum an i pek ning zeitindah an tufa le nih kan dirkamh, kan sunhlawi. Chin miphun nih tah an tuanbia zeitindah kan hngalh in kan dirhkamh hna.
  5. Chin miphun in kan pu pa miraltha le miphun ca ah thih ngamh in a rak dirkamh mi an tam tuk. Cu kan pa le miraltha hna an tuanbia dirkamh ding ah le an chiah ta mi ro, ralthat nak, miphun dirkamhnak, zumhtlak an sinak hi a tu fa le nih zeitin kan hmuh hna.
  6. Kan pupa nih miphun an dirkamhnak, nun pek in miphun ca ah tuanbia roling an tialnak hi an tu fa nih kan dirkamh a herh. Miphun an dawtnak ro kan nunter a herh. Kan cawisan in a hmun mi tuanbia ah kan dirkamh a herh.
  7. Aho miphun dang hmanh nih kan pu pa tuanbia, kan pupa hna chiahtak mi ro hi an kan cawisanpiak in an kan dirkamhpiak lai lo. Hi dirkamh ding hi Chin miphun nih, an tufa hna le techin hna nih tuanvo kan ngei.
  8. Kawl miphun nih Kawl an dirkamh i NLD ah an i fun bantuk in Chin miphun zong nih kan Chin tuanbia, kan pupa hna an kan rohtak mi tuanbia le kan miphun limhaang, hmelchunh le nunphung dirkamh in CNLD ah i fun ve hna usih.
  9. Kan ram khel hi miphun dirkamh i zuamnak a si. Kawl nih Kawl, Shan nih Shan, Rakhine nih Rakhine le Chin nih Chin dirkamh a herh. Chin miphun dirkamhnak ca ah CNLD thimfung thla cio hram hna usih.
    1. Panglong biahrennak thawng in Myanmar ram ah kan i fonh. Kan i fonhnak a ruang cu mahte in uknak nawl kan ngei lai timi hnatlaknak ruang ah a si. Chin nih Chin kan uk lai timi biakamnak ruang ah a si. Panglong hnatlaknak bantuk in Chin nih Chin kan ngeih nakhnga Chin miphun nih Chin Party CNLD thim hram ko hna usih.
      Credit-Chin National League for Democracy – Hakha-Thantlang

Be the first to comment

Leave a Reply

Your email address will not be published.


*