Ningcang loin thil a um ti an ruah caah U Soe Maung nih (Supreme Court) ah UEC le Acozah nawlngeitu cu taza a cuai hna.

MYANMAR RAM I THIMNAK A DIH RIH LO
Ramchung le Ramleng um Chin/Lai unau hna,2020 Myanmar General Election cu a dih cang. Union Election Commission (UEC) nih Thingfung (vote) petu le an pekmi cu an phuan. U.S. Secretary of State a ṭuan liomi H.E. Mike Pempo nih i thimning kong “Electoral Process” 5 ah U.S. acozah nih lunghrinhnak kan ngei timi ca November 9 2020 ni ah a chuah.

I thimning kong Electoral Process ah nawlngeitu rianṭuan ning Relevant Authorities, i thimnak ah duhmi pawl thingfung pekning (Tabulation of Votes), i thimnak ah lungtlinglo nih duhlo langhternak tawlrel ning (Resolution of Complaints) le, zapi theih in le dingfel tein a cunglei thil si ning pali kong hi chimfelnak (Undertaken in a Transparent and Credible Manner) kong ah ca a chuah colh. Laimi/Chinmi pa zeizat nih dah hi ca chung thil sining hi kan ruah i, 2020 General Election hi kan thlir timi hngalh a har ngai.

2020 General Election lioah Thimfung a thla kho hnga ding (Voter Registration) tuahning, A caan hlan ah thimfung pekning (advance voting), November 8, 2020 ni ah thimfung pek ning (voting on November 8, 2020), thimfung pek dih hnu ah pekmi rel ning le hlonh ning (vote Counting) le, thimfung pek dih hnu in (UEC) le (Acozah) nawlngeitu bia (statements) pawl he pehtlai in ruah awk thil tampi a um. Thimfung peknak kong lungtlin lonak a ngeimi nih (UEC – Local, State, Region, and Union) ah an lungtlin lonak pawl ni 45 chung ah langhter khawh a si. Cu lawng si loin, Myanmar chung in a sang bikmi Biaceihzung (Supreme Court) ah an lungtlin lonak kong kha mithmuh/kuttongh (tehte) he langhter in, biaceihpiak ding ah langternnak tuah khawh a si.

Cucaah, hlanlio (Judge Advocate General) a rak si balmi U Soe Maung nih (Supreme Court) ah UEC le Acozah nih 2020 General Election kong ah an rianṭuan ning a dik lo tiah ka hmuh/theih caah tlangtlaknak (Writ) ka chuahpiak ulaw, biakhiahnak ka tuahpiak u tiah a hal hna. USDP nih an hal ve i, Supreme Court nih 198-199/2020 in siseh, 230/2020 in siseh, a cohlan. UEC dan ah an ṭialmi cu thimfung peknak ni in ni 45 chung ah lungtlinlonak vialte UEC ah chuahpi khawh a si tiah ṭial a si. Ni 45 a tlin ni cu, nihin December 28, 2020 ni hi a si tiah UEC chungtel nih a kan chimhmi bia a um.

U.S. Department of States i, Secretary ca ning in 2020 General Election ah hin ruah awk thil tampi a um. Ruah awk thil tampi lak ah ruah a herh ngaimi pawl cu a tanglei pawl hi an si.

a. General Administration Department hi Home Ministry tang ah a ummi a rak si nain, President Office tang ah an ṭhial.
b. Immigration and Population Department hi Central nih tlaihmi a si nain, State le Region level ah Ministry an dirh.c. Thimfung thlaknak Catlap (ballot) hi zeizat dah an chuah timi fiang tein an chimh duh lo.

d. Tuandeuh i thimfung peknak (advance voting) ah ning le cang loin thimfung peknak tampi a um.e.Thimfung pek lio caan ah ningcang loin tuahnak tampi a um.

f. Thimfung relnak le thimfung petu milu relnak ah ningcang loin thil a kalmi a um.
g. Thimfung pek dih hnu ah, thimfung petu pawl kong he pehtlai in siseh, thinfung pekmi catlap kong siseh, thimfung peknak zohkhenhtu pawl rianṭuannak ah si seh, thil sining lo tampi a um.

h.A dang tampi a um nain, a hnu ah hngalh ṭhan awk lawng a si caah, ka ṭial ti lai lo.Hi bantuk in ningcang loin thimfung peknak kong ah sual i phawt awk a tamtuk caah, teitu caah siseh, teimi caah siseh zalong te (free) le ningcang tein (fair) thimfung peknak (election) a si maw? UEC nih an chuahmi a donghchuak (result) hi a dik maw? Hi kong ah aho nih bia a khiah (adjudicate) a tuah lai timi hi Myanmar minung vialte nih an hngahmi cu a si.

Ningcang loin thil a um ti an ruah caah U Soe Maung nih (Supreme Court) ah UEC le Acozah nawlngeitu cu taza a cuai hna. U Soe Maung hnu ah USDP nih taza an cuai ve. Myanmar Supreme Court nih taza an cuainak cu a cohlan. Supreme Court Procedure ning in Supreme Court upa pathum nih tazacuainak cu zoh hmasa a herh. Cu hnu ah taza an cuainak cu a dik ko an ti ahcun, tazacuaitu le taza an cuai mi hna auh in, biaceihnak tuah ding a si.

Taza An Cuaimi Hna:Atu lio i, Supreme Court ah taza an cuaimi (tazakhan) pawl cu Acozah le UEC upa vialte an si. Acozah lei ahhin aho pawl dah an i tel ti cu fiang tein hngalh khawh a si rih lo. Tazacuainak kong a si caah a leng ah an ca an chuah duh lo.

Tazacuaitu:Tazacuaitu (tazalo) pawl cu, U Soe Maung le USDP pawl an si. Taza an cuainak kong cu a cung lei ka ṭialmi (a to h) in siseh, Constitution of Myanmar 2008 ning in siseh, UEC dan le dun in siseh, 2010 lio i, SPDC nih an rak sermi dan le dun ning in siseh ai kalhmi a um tiah taza an cuai hna hi a si.

Thil Sining:Tazacuaimi hi, Acozah le UEC an si. Tazacuaitu cu U Soe Maung le USDP an si. Bia a ceihtu ding cu Supreme Court an si. Bia an ceih tikah Constitutionality kong ah auh a herhmi cu Constitutional Tribunal an si. Taza an cuainak kong ah kuttlaih le mithmuh an ngeihmi (evidences) a ngei biktu hi ralkap an si. Cucaah, 2020 General Election kong buaibainak ah ai telmi cangtu (actors) hi 1. Acozah, 2. UEC, 3. U Soe Maung, 4. USDP, 5. Supreme Court, 6. Constitutional Tribunal, le 7. Ralkap (Myanmar Armed Forces) an si lai.

Zeidah A Cang Kho:Supreme Court le Constitutional Tribunal kutchung ah 2020 General Election a phichuak le 2021 kum ah Myanmar rampi zei tindah a si lai timi cu aa hngat. Myanmar ram chung mi tampi nih an hngalh khawh lomi cu (Writ/Sachuandaw) kong a si. Supreme Court ah Sachuandaw chuahpiaknak nawl hal i, thimfungpeknak phichuak (election result) biaceinak an rak tuah tawn mi a hnu bik hi 1961 ah a si. Constitution of Burma, 1974 ah Writ a um ti lo. Constitution of Myanmar, 2008 ah a um ṭhan. Kum 50 renglo hnu ah, Supreme Court biaceih ning in 2020 General Election buaibainak cu biakhiah a si cang lai.

Ralkap Myanmar Armed Forces:Ralkap nih 2008 Constitution Article 6 le 20 ning in si seh, Chapter 7 ning in si seh, Emergency Provisions in siseh, nawlngeihnak laak khaw a si. Asinain, an duh lo. An duhmi cu, Election hlan ah an chim cang. Dan le dun ning tein tuah u an ti peng. Election lio zong ah dan le dun ning tein a kaimi acozah kan bawmh lai an ti. Atu lio ahcun, dan le dun ning in UEC rianṭuannak kha an langhter. Ramkhel (politics) a hngalmi nih cun, chimhfel a herh lomi an dirhmun an langhternak a si timi theihthiam a si ko lai tiah ka zumh.

Cu caah, nedia ah ka chimh lengmangmi bia a um. Dingfel tein thimfungpeknak tuah khaw a si ahcun, aho party hmanh nih ningcang lo in teinak hmuh khawh a si lo. Ningcang loin teinak a hmumi paoh cu, ningcang loin an cawlcangh caah a si. Myanmar rampi 2020 General Election a dih rih lo. 2020 General Election cangtu (actors) bu 7 i paihnak cu a nai cuahmah i, zoh nuam taktak cu a si lai. A hnubik i paihnak cu 1961 ah a si. Ka chuah hlan ah a si. Ka chan chung ah zoh nuam bik ram khel paihnak a si lai tiah ka zumh.Credit-Ngun Cung Lian
Camp Yangon

Be the first to comment

Leave a Reply

Your email address will not be published.


*