Nikhat cu Nelson Mandela rawl dawr ah a congtu pawl he an thu.

Nikhat cu Nelson Mandela  rawl dawr ah a congtu pawl he an thu. Mah lio ah khat lei kam cabuai ah pakhat pa cu a mah te lawngin rawl a cahmi cu a hngak ve ko.  Nelson Mandela nih cun a congtu pawl cu a mah te lawngin rawl a cahmi ei dingin a hngaktu pa cu an mah he cabuai khat ah ei ti dingin va sawm dingin a fial hna. 

Mah pa zong nih cabuai pakhat ah ei ti dingin a lungtling ve i cabuai pakhat ahcun an thu ti hna. Mah pa cu bia ka khat hmanh chim loin rawl einak cabuai pakhat ahcun a thu ve ko, rawl cu a  ei, rawl a ei pah ah a kut a thir tuk ning ti awk tha loin a um. Rawl a ei dih bak in a chuah tak hna.

Nelson Mandela a congtu pawl nihcun a dam lo caah a kut a thir tuk kha asi lai tiin an ruah diam. Nain Nelson Mandela nihcun a thei tukmi pa a rak si.  Mah pa cu midang a rak si lo. A rak simi cu Nelson Mandela thong a rak tlak lio ah a rak hrem  taktak tu pa a rak si.

Hi rawl an rak ei lio caan ahcun Nelson Mandela cu ram uktu President a tuan cang.  Nelson Mandela nih cabuai pakhat ah rawl ei ti dingin a congtu pawl nih mah pa an rak sawm lio ah “ Thong a rak tlak lio ka hremnak cungah lehrul a ka cham lai , fak taktak in a ka hrem ve cang lai hi te aw “ tiin a rak ruah.  President a tuanmi nih a tuah duh ahcun a tuah khawh tukmi asi, nain Nelson Mandela nih a tuah lo.  Nelson Mandela nunnak ah mah pa nih a rak hrem ning le a cungah a tuahtonak chiakha pawl cungah lehrul cham than duhnak pakhat hmanh a um lo.

Nelson Mandela nih a chimmi cu “ Ahohmanh minung hi mi huat thiam cia in kan chuah lo, huatnak hi kan cawn chom mi tu a si , huatnak kan cawn thiam ahcun dawtnak zong cawn piak khawh kan si ko” tiin a chim.

Mi huat te hna , miphun thleidan te hna, biaknak dan rem lo te hna hi kan rak i chuahpimi cu an si hrim lo, nain kan icawn chom mi tu an rak si hna.

Nelson Mandela bantukin mi ngaithiam khawh nak nun ngeih ahcun kan nunnak ah kan mitku a thaw deuh lai, kan inuam deuh hrim lai, cun kan ngan zong a dam deuh hrim ko lai. Kan mah pumpak ca lawng thathnemnak siloin kan kiangkam le kan vawlei zong um a nuam deuh hrim ko lai.Credit-Salai Z T Lian

Be the first to comment

Leave a Reply

Your email address will not be published.


*