Nihin cu hawhra tamtuk a tla lai tiah ralrin pek kan si.

A kih ngai lai caah lumsa tein thil i hruk kan hau. Hawhra a tlak ahcun mawtor khalh ralrin kan hau fawn.  Atu lio covid zawtnak um lio ah i kih ter lo a herh ngai fawn.  Minung kan sinak in ralrin ding tete a tam ngai. 

Bible nih hawhra hmang in a kan cawnpiak mi hi ruat ti hna usih.Profet Isaiah sin ah Pathian nih a bia a phuan.  A hram thok in misual that lonak in a khatmi kan sinak a chim hnu ah, Bawipa nih aa thawh i, “Atu cu hi bia hi ṭhate in ruat ṭi tuah u sih. Nan sualnak cu a sen in sen hna hmanh seh law, hawhra bantukin an thiang hna lai; a dum in dum hna hmanh seh law tuuhmul bantukin an vaar lai. 

Ka bia nan ka ngaih paoh ahcun, ram nih a chuahtermi thil ṭha kha nan ei hna lai.  Sihmanhsehlaw ka bia kha nan ka al i nan ka doh ahcun nan thi ko lai. Hi bia cu Bawipa nih ka chim,” a ti Isaiah 1:18-20.Pathian bia a ngaimi kan si ahcun thluachuah lam a ong.  Bawipa a dohmi kan si ahcun kan donghnak cu thihnak a si. 

David nih a sualnak caah Pathian sin ah ngaihthiam a hal ve.“Sual cia in hrin ka si, ka nu nih a kan pawi ah khan misual ka si cang.  Zumh awk tlak lungthin hi na duhmi a si, ka lung chung hi na fimnak in khah ter ko.Ka sualnak cu ka hnawhpiak law ka thiang lai, ka tawl law hawhra nak in ka rang deuh lai” tiah a ti Salm 51:5-7.

Minung hi misual kan si ti cu kan hngalh dih.  Nain, Pathian hmai ah “Bawipa, keimah hi misual ka si” tiah kan ti kho taktak lo.  “Misual ka si” ti hi thinlung in kan cohlan taktak lo ahcun Pathian sin ah “ka sualnak hi ka hnawh piak ko” tiah kan ti kho lo.  Kan ti khawh ahcun Pathian nih hawhra nak in rang deuh in kan sualnak cu a kan tawlpiak.  Pathian nih A biatak hngalhnak kan pe ko seh. Amen.Credit-C Duh Kam

Be the first to comment

Leave a Reply

Your email address will not be published.


*