Ngaihchiatnak Tuarpinak 2020 Election

Thlaza kan rak cam tawnmi ah khua le ram miphun caah bochan awk tlak kan khua-ram chung in kan laimi chung in an chuah khawhnak hnga le, namneh mi sinak in a kan hruaichuak tu fa nau kan ngaih khawhnak caah tiin thlaza kan cam tawn.

Hmanhseh, khuachung in mifim mithiam an rak chuak taktak. Pathian thluachuah kan ti. Khua caah, ram le miphun caah tiin riantuan aa vun thawh tikah thla a rak cam piaktu nih an doh. An dirkamh ti lo. Miphun dang pa tu an dir kamh cang ai. Miphun dangpa tu an zumh deuh. An i bochan deuh.

Mah khua chuak, mah khua chung in MP aa cuh mi hmanh, mah khua le tlang nih dir pi loin mi phundang nih an hmanmi midang kuyale tu an dir kamh deuh. Thlaza an rak campiak mi tu kha hnu ah an chiah i, thla an rak cam piak lomi tu hmai ah an fawnter.

Ruah ah ngaih a chia. Mah khua le ram hmanh nih mah khua le ram mi kan dawt lo i, mah miphun zeiah a rel in miphun dang a uar mi miphun kan si chung cu, mi hmai ah a fawngmi miphun cu zeitik hmanh ah kan si lai lo. Mi hnu a zul mi miphun kan si peng ko lai. Nan nehmi miphun kan si peng ko lai. Mi hmai ah khuk aa bil mi miphun kan sipeng ko lai.

Kan lai mifim mithiam hna nih mihrut santlai lo hmanh hmunkhat teah an kan fawnhter kho lo. Vawlei lei in, biaknak lei in kan pa le mifim hna nih mihrut santlai lo hmanh thinkhat lungkhat ah umter kho loin, hmun kip kaa kip ah, bu kip ah an kan vah veih pi. Hi ka ah ra u law, bawmhnak a tam, khi ka kal hlah uh sahngar a um an kan ti. Biaknak lei in an mah thazaang le kutke i rinh loin ramdang thazaang le bawmhnak hmang in hruai chuah an kan timh. Ramkhel lei zong in mah tluk nam neh mi kan si timi theih ko hmanh ah, khan mah tein tan kan i tim lo. A kan namneh tu thazaang in, bawmhnak in thawn kan i tim rih. Namneh tu nih cun nan nehmi cu zeitik khuatik ah an sal sinak cun an kan chuah ter lai lo. An caah san kan tlaih ti lo hnu, rian kan tuan piak khawh ti lo hnu lawngah thi hlawnh in an kan hlawnh te lai.

Tualto laimi mihrut an kan vai vunh. Tualto mihrut faivunhnak lawngah maw an fimnak hi hmanh an timh hnga. Tualto laikhal mihrut pawl miphun dang man nehnak in chuahpitnak ding ah an fimnak hman a ngah lo ve lo maw?

Kan hawi miphun dang hna ruah ah ”hngar an um” hrinhran. An nih cu an mifim hna nih an funtom khawh hna. Thinkhat lungkhat tein an um. Thla an i cam piak. Tha an i pe. Teinak an hmu. Kan nih miphun cu thla cu kan i campiak. Nain tha kan i pe ti lo. Thla kan campiak mi hna nak in kan campiak lo mi tu tha kan pek deuh cang. Mah miphun nak in midang miphun kan zumh deuh hna. Kan i bochan deuh hna.

Mah le mah cu uico bang kan i bauh len nain, miphun dang cu kan bauh ngam hna lo.Thlachia loin hmailei ah nawrchin rih ko hna usih, an tanpi tu hna nih cun kan nin tanpi peng ko hna.CNLD
Credit-Chavy Tha Tin Kulh

Be the first to comment

Leave a Reply

Your email address will not be published.


*