Sunghno Nu Țahnak Ram le miphun caah thih ka duh lo, nun ka duh deuh ee … ka fa

Bawino Salai Van Biak Thawng (Vanvan) A Donghnak Thlahnak
2000 June 19 ah a chuak.
2017 ah Taanghra a awng.
Monywa University ah Law a kai lio.2020 December thla ah CR training a kai 2021 February 1 i ralhrang nih mizapi nawlngeihnak an kan chuh hnu Hakha mino lamzawh (Sandahpiah) cawlcanghnak ah a hawile rual he hmaisuang hruaitu in an dir.

Hakha khuapi Saandah piahnak ah Chin National Flag CV in a tlunpi i hmaisabik Chin National Flag Hakha khuachung zatlang lam ah a thlai/putu a si. 2021 April 28 (Cacawn nithumni) ni ah ralhrang doh dingin sianghnuai meithal thlaih in raldoh ah ahawile rual he CV in an i thawh.2022 March 31 ah Bawino (CNA) a si.

Operation Pipa kalnak 1. Zinghmuh operation a voikhatnak ah a kal. 2. 2022 February Thantlang Palek sakhaan lak lio ah aa tel ve. 3. 2023 March 13 in April 14 ni tiang Zinghmuh Operation voihnihnak aa telnak in Chin ram le miphun caah a nunnak a pek.

A Tlaihtleng Chin ram cu Chin miphun (kanmah) nih kan ser a hau. Dohthlennak kan tei hlan lo khoika hmanh ka kalkho lo (Ramdang kal a duh lo).Midang bochan lungput a ngei bal lo.

A lungput Mi nawlngai, mi holh tlawm a si nain mi hawikomh a thiam. Chungkhar le hawikom sin ah mi tluangtlam, mi hmaipan te a si.Mi dingfel, mi ziațha nawlngaihnak aa sehchih …. nawlngaihnak lam thih tiang a zulh.

Lentecelh a cawnmi le thiammi
A Cawnmi 1. Guitar tum 2. Drum tum A thiammi le a zuammi Arhmul (Badmanton) celh a thiam. Fusal & Bawlung chuih, Valleyball bengh a zuam

A Thih Ni 2023 April 14 Zinglei Sml 6:15 ah a biakam bantuk tein Chin ram le miphun caah sian lo bu tein a chungkhar le a miphun a kan liam tak ee … Salute!

Sunghno Nu Țahnak Ram le miphun caah thih ka duh lo, nun ka duh deuh ee.ka fa

Ralram in midang tlun hlan ah na tlun chung ee na hawile he teinak hmuh tik ah na tlun ding a si țung ka fa nawlngai te na si lo maw … mi hlan ah na tlun chung ee …

Mi nih hnemhmi si kan duh țung lo, midang hnemtu si ding pei kan i hmaithlakmi rian a si cu … ka fa ( Vawlei cung Laimi vialte nih hnemhmi si kan duh țung lo, kanmah tu hi mi hnemtu si ding kan dirhmun a si lo maw … ka fa )
Ka fa vawlei ah na tlonlen caan a tawituk ee ralram na kalnak ah chungkhar he tlonlen caan zong a tlawmtuk ee, Vanvan, nang he lenți ka ciim rih țung lo … ka fa

Teinak kan hmuh tik ah kanmah lawng inmaw inn kan tlun te lai … kan chungkhar in na bau ruangmang te lai ka ruah ah ka celh lo ee … ka fa

Kanmah nakin ram le miphun na dawt deuh hi ta, run tuar hna seh tiah maw na kan ti ka fa … kan in dawttuk ko țung … maw ka fa … zeitin ah na zuun kan tuarkhawh lai … ka fa, ka sian lomi te, ka dawttuk mi te ka fa … Lung siaherh lo tein liam ai ko law … Vancung khua in rak kan dong te mu ka fa.

Hringtu Pa Țahnak Ka fapa keimah hrin fa lo bang (Kei hi miralchia ngai ka si, ka hmaika chuak hrial awk a țhalomi Dohthlennak rian a si caah pacan ka cuh) paralțha na si, kei cu hi tiang hi ka ngamh țung lo na ka tei … kan upat ee ka fa.Mi lungțhawng le mi ralțha ka fa nangmah pei maw kan bochan cang cu, ziahmaw na kan kaltak tuan ee … na kan daw lo maw … ka fa

Na thih ni ah vawlei khuaza ummi Laimi nih an in țah ka fa, na nun lio mi sunglawi na si bang tein na thih ni cu vawlei khuaza Laimi umnak ah na thawng li bang aa hnin … an in dawt cio ee ka fa.

Na chungkhar na kan dawtnak kan lung a tling, na duhning in kan in dawtkho lomi cungah kan ngaithiam mu ka fa, kan in dawttuk …

Nang cu na chantawi nain Pathian nih a mah mui cuangin an serhnawh chan rian ah tlaam na tlinh ko ka fa … nawlngaihnak naa sehchihmi na lungput na chungkhar nih kan run zulh lai.
Hringtu na pa nih kan dawt, kan upat … Lungsiaherh lo tein i liam ai ko mu … Vancung khua ah kan i tong te lai … Ka fa mangțha … kan dawttuk … Bye.

Facebook chung i capar a post takmi lakah : SAL NUN Miphun phunkhat sinak phuntling tein a ngei mi miphun nih,midang miphun hna kut tang ah sal tan cu a phung si, nan mah sal an tan nak chung in aa chanhchuah kho lo mi miphun cu santlai lo mi miphun,sal ah ka tang ti hmanh aa thei lo mi miphun an si.Sal ah kan tan hi i thei hna uhsih[a hlei in Khaupi chung um mi kan unau pawl] kan mino hna nih nunnak pek in ral an doh lio ah miphun dawtnak kan ngeih ko ttung ah cun aa nuam ngam ding kan si loh,ka miphun ka dawt na ti ko tung I na um hmun in naa nuamh peng rih ko mi kha cu LIH si.Nunak pek in ral a do mi pawl khi thih an ttih lo ruang ah si lo,thih an ttih tuk lung tein ka ram le miphun caah cun tiah hmai an suang,ho hmanh nih fial mi an si loh,kan miphun kan Chinram nih a fial mihna an si.

Kan miphun zallennak ding caah ho poh fial cio kan si bantuk in Ram le Miphun nih fial mi rian ah i thawh cio hna uh sih.Sal tan nak chung in luatnak kan hmuh khawh nak ding caah tu loi caan hi Pathian nih can ttha a kan pek loi caan si.Freedom is not free ti phungthluk a um ban tuk in zalonnak cu a lak in hmuh khawh a si loh, kan can, kan thlen, kan thisen, kan nunnak tiang pek in kan lak hau mi si caah kan um nak hmun in kan si khawh nak ning cio in tu kan dohthlennak lohma ah hin i tel cio hna uh sih.Kan hmaika chuak rian cio a si keimah ka rian si lo ti ding a ttha lo. Kan sal nun kha hlauh in kan ram le miphun caah raltha tein hmai ah fong chin hna uh sih.

May 23,2022 khuaruah Ka fa Vanvan, na pekmi nunnak le thisen hi kan ram thlennak luatnak caah Bawipa Pathian nih cohlang sehlaw thlaici țha ah canter ko seh tiah Jesuh Khrih min in thla ka cam.Crd.Tluang Hre