Rusia nih Nuclear hriamnam a hmannak ding aruang phun 4 an langhter

Russia President hlun le a tu lio Russia Security Council lutlai changtu asimi Dmitry Medvedev nih a tu lio Ukrain tuknak kong ah le Nuclear hriamnam hmannak kong ah ralrinnak a pek. A chimmi cu Russia nih Nuclear hriamnam kan hman dingmi ahhin kan ral asimi nih cubantuk hriamnam hmang in an kan tuk hmasat a herh lo. Hriamnam sawhsawh a hmangmi sin zong ah kan hman khawh a ti. A chim rihmi cu Russia nih Nuclear hriamnam kan hman khawhnak hi phun 4 a um a ti. Cu hna cu:

  1. Russia hi Nuclear hriamnam in an kan tuk ahcun
  2. Russia le a hawikom ram hna cung ah a dang Nuclear hriam hmang in an hman ahcun
  3. Kan Nuclear hriamnam caah a herhmi thilri an kan kahpiak ahcun
  4. Russia le a hawikom ram hna khuasak tuntuknak rawhralnak an tuah ahcun

Russia President Putin nih Ukrain tuk hram a thok tlawmpal ah Russia Nuclear hriamtlai ralkap pawl cu timhcia tein um ding in a nawl a pek hna. President aiawh chimnak nawlngeitu Dmitry Peskov zong nih Nuclear hriamnam kan hmang bak lai lo timi hi zapi theih in a chim duh lo. Cun kan hnu cawn nili ni zong ah UN i Russia palai changtu zong nih Russia hi Nuclear hriamnam hmannak nawl kan nei tiah ralrin a rak pek.

Sinain Russia ah US ambassador hlun asimi Michael McFaul nih cun ahohmanh nih mah bantuk thil hi Russia cung ah an tuah lo i an tuah fawn lai lo a ti. Cun NATO zong nih nuclear hriamhmang in zeitik hmanh ah a kap hmasat bal lai lo tiah a chim.

Russia le Ukrain cu tonbiaruahnak zeimaw zat an nei lengmang nain a tutiang ah hlawhtlinnak an hmu kho rih lo. Thlakhat leng kahdohnak ah Ukrain nawlngeitu chim ning in cun Russia ralkap hi thong 10 in thong 15 an thi cang ti asi. NATO tuak ning ahcun thong 7 in thong 15 kar an thi ti asi. Credit-Ceumi LianCherhchan: Yahoo News UK

Be the first to comment

Leave a Reply

Your email address will not be published.


*