Naungcho Kahdohnak Ah Ngakchia Pahnih Hriamngan Hliamhnak In An Nunnak Liam

Naungcho Kahdohnak Ah Ngakchia Pahnih Hriamngan Hliamhnak In An Nunnak Liam.Shan ramkulh, chaklei Naungcho peng Hohko le Tanbo khua pawng ah SAC ralkap le Mandalay ramṭhen tualchung hriamtlai phu kar April ni 5, ah fak ngai in kahdohnak a chuak, SAC ralkap nih hriamngan thazaang hmang in kahdohnak an tuah tiah tualchung mi hna nih an chim.

April ni 5, zanlei Tanbo khuapawng kaphnih kar kahdohnak ah tualchung mi 5 nih hliamhma an tuar i, ngakchia 2 an nunnak a liam tiah khuami pakhat nih a chim.

“Khua pawng ah kahdohnak a chuah caah tualchung mi hna zong kuan hliamhma an tuar, hliamhma tuarmi 5 chung ah ngakchia 2 an nunnak a liam. April ni 5, kaphnih kar kahdohnak cu zanlei tiang ah fak tuk in an i kap” tiah a chim.

Nunnak liammi ngakchia 2 hi kum khat tluk ngakchia pakhat le tangriat a cawng liomi kum 14 ngakchia nu a si tiah tualchung mi nih an chim.

Kaphnih kar kahdohnak a chuah ruang ah Hohko(ဟိုခို), Hohke(ဟိုခဲ), Konekyi(ကုန်းကြီး) le Tanbo(သံဘို) khua hna in tualchung mi 1000 leng cu Naungcho khuachung le a pawng hrawng khua, phungki sianginn ah ral kan hrial tiah ralhrial dirhmun a phanmi Hohko khuami pakhat nih a chim.The Chin Post