Khualtlawnnak Dairy Kan ralkap pawl hna he an sining te ii hrawm in caan zei-maw-zat ka hman hnu ah ka kir tthan cang lai.
Caan zeimawzat an sin ka um chung ah ka hmuh ton mi a tam. Ka caah nun chung philh khawh hnga lo ding tuanbia ah an cang.
Tthennak timi hi cu aho ca hmanh ah a fawi lai ka zum lo, abik in keimah bantuk mi lunghno caah ahar khun. Hithluk in kan ralkap pawl an sining, an tuar ning le an nunnak dihlak pek tiang in an ii zuamnak kan hmuh kan ton cang hnu cun fawi tein aho nih dah a kal tak sian hna lai.
Kan ralkap hna pawng te um peng ii zingzan an din ei mi ii hrawm ve, an har ah har nak ii hrawm, ngaihchiat thihlo an ton caan ii an pawng tein ngaihchiat pi ve hna le keimah le ka sikhawh chung in thazaang pek hna le an sining te ii hrawm zungzal hi ka duh ko.
Asi nain, ka fian mi cu Pathian nih kan mah le kan dirhmun cio te ah chiah mi kan si, cu kan dirhmun cio te cun Ram le Miphun caah a ttuan kho dih ding in ah kan chiah ko timi hi asi.
Cu caah, kan ralkap pawl hna hi Pathian nih Ram le Miphun caah thim mi ralkap nan si ii, mipi hna zong hi kan ralkap dirkamh tu ding in thim mi kan si. Hi Pau Dothlenak kan tuah cuahmah lio ii, Dothlennak ah a tel kho ve mi kan si hi mivanttha tuk kan si ee, aho caa hmanh si lo in, nangmah keimah kan techin fapar caah lam kan sial piak hna kha asi ko.
Victoria Base ii Zarh 5 – 6 chung ka caam ah hin kan ralkap pawl he neihniam ngai iin caan kan hmang kho tti hna. Ralram in a lut a chuak mi an tam lengluang, Operation ruang ah thlah mi le, a dangdang ruang ah thlah mi an luh an chuah zong ka hmuh ko hna. Hliamtuar hma ruang ii rak kir tthan mi zong an um, sian lo tuk bu in a nunnak a liam mi hna zong an ruakkuang he rak tlunpi mi zong an um. Kan ralkap pawl hna hi 100 ah 80% hi kum 30 tang lawng te ansi, 80 chung ah 50% hi 25 tang ansi rih.
Cu ii ramleng um Mino nusal pasal ttha ttha hna hnipuan hrukaih tthat le mawtaw ttha le inttha lo ttha ah maw na thinlung um rih ko lai, nu le pa sin a ummi mino full-time income anei mi nan tamtuk lengluang, abik in nan mah mino pawl hna nih ChinLand Club ah 50% tel hi mino tthazaang lawng siseh law cu teinak hi kan taa a si hrim cang ko hnga mu. Cucaah Mino a ti mi pohpoh nih khuafak deuh in nan ruahnak lai kan sawm hna. A si kho deuh mi nih va tlung ve ulaw nan mah tein nan ii pek khawhnak ah ii pe ding in kan nawl fawn hna.
Hi kan revolution kan teinak ding ah a ralkap kan ii neih a thazaang kan ii neih hruaitu tthattha kan ii neih kan chambau mi cu hriamnam/weapon pakhat lawng asi. Nai CBCUSA an rianttuan nak vanchiat tlamtlinlonak ruang ah kan miphun nih hriamnam a million zeizat man kodah kan sungh mu, aho hmanh lungfah lo in kan umlo. Hi kan ton mi thil hi mivialte lungfim nak si ko seh law, abik in ramleng hruaitu pawl lungfimnak si ko seh! A chung in raldo an um ko bu ah leng lei in ralbawi dictator kan tamtuk ruang ah hithil kan ton tihi chim lo awk ttha lo asi,! Sa-ping palh, zapi thih kan sisual lai mu!!
Ramleng ummi nih bawmhnak kan pek tik ah thlacam bu tein pe tawn hna usih. Miding mi fel sin a phaknak hnga ding le, Ram le Miphun caah san a tlaimi bawmhnak asi khawh nak hna Pathian sin ah ap tawn hna usih mu.
Pathian nih kan Ralkap hna pakhat cio nan umnak ah in kilveng hna seh law, lam in hruai zungzal ko hna seh.
Ngakchia bik in Upa bik tiang Pathian nih Miphun caah thim mi ralkap nan si kha zeitik hmanh ah ii philh hlah ulaww.
Upatnak sangbik kan pek hna! Tonnak caan ttha Pathian tu nih rak kan ser piak tthan te seh law.
Crd.Mercy Sung Zaathang
Leave a Reply