Kahdohnak chung ah a thi mi SAC ralhrang ruak 7 kan mit in kan hmuh i

Kalay peng Chaklei Kahdohnak Ah SAC Ralhrang (7) An Thi . Kalay peng Chaklei ah Vaute 30 in Vaupi 3 tiang SAC ralhrang le mipi ralkap แนญangแนญi phu hna kahdohnak ah SAC ralhrang pasarih an thi tiah CDF-KKG nih nihin Vaupi 5 ah cathanh a chuah.

Vaute 30 ah Chanthargyi sianginn ah umhmun khuar mi SAC ralhrang thazaang 30 hrawng cu CDF KKG le Chanthargyi Pahkahphah แนญangแนญi phu nih kan va kah hna. SAC ralhrang lei a thi le hliamtuar kan fehter kho lo, Mipi ralkap kan him tiah a langhter chih.

Vaute 31 ah Nansaungpu khua in rallam sialtu SAC ralhraang, pyosawthi le CDF-KKG cu Pyindawoo thlaanhmun ah sml 3 chung kan i kap. Cu hnu ah TCDF, CNDF, PDF Kalay, HNB, CR, PDA, LDF le CDM Siyin hna nih an kan bawmh hnu ah kahdohnak a faak chin i SAC lei hriamngan in kah an bawmh hna lawng si lo in raltuknak vanlawng hmang in vanlei kahdohnak a tuah tiah CDF-KKG nih an langhter.

Kahdohnak chung ah a thi mi SAC ralhrang ruak 7 kan mit in kan hmuh i MA 3 kuanbawm (1), 5.56 kuan 20, naam pakhat, bag pakhat le a dang thilri kan laak khawh, CDF-KKG lei in ralkap pakhat hliamhma (fak lo)a pu tiah an langhter.

Vaupi 1 ah rallam sialnak kan tuah i MA 3 Kuanbawm pakhat le 5.56 kuan 8 kan laakchap tiah an langhter.

Vaupi 2 le 3 zong ah kahdohnak a chuak i SAC ralhrang lei an fah caah vanlawng hmang in bomb a kan thlak. Mipi ralkap kan him dih i SAC ralhraang lei a thi mi le hliamhma tuarmi kan fehter kho lo tiah a langhter chih.

SAC ralhrang hi a tu ah Nyaungkone khua phungki inn le Pyindawoo khua kiangkap ah thazaang tampi he umhmun an khuar, cu ka hmun pawngkam khuate pawl ah rallam an sial ca ah zeitik caan poh ah kahdohnak a chuak kho tiah CDF-KKG nih an thanh.CCN

Be the first to comment

Leave a Reply

Your email address will not be published.


*