Na tuahmi thil maw i chor lai cih.

Matthai 7:22-23 “Cu Ni cu a phak tikah, mi tampi nih keimah cu, ‘Bawipa, Bawipa! Na min in Pathian bia kha kan chim i na min in khuachia kha tampi kan ṭhawl hna i khuaruahharnak tampi kan tuah hna,’ an ti lai. ” “Khi tikah annih cu ka thawh hna lai i, ‘Nannih cu aho nan si kha kan hngal bal hna lo. Kal ko u, ṭhat lonak a tuahtu hna,’ tiah ka ti hna lai.”

Minung hi thil tha kan tuahmi paoh chimh than a hmangmi kan si zia, kan tuahmi thil i chor kan hman zia le kan tuahmi thil midang sinah hei chimh chin kan duh zia kha a cunglei bible caang nih fiang tein a langhter. An rak tuahmi kha minung hawi hmai lawng hmanh si loin Pathian hmai hmanhah an chim ngam. An ning a hngal ngai ti khawh asi.

Asi, minung nih a tuah khawhmi thil hi a minung hawi teinak ah an hman theo tawn. Pathian pi hmanh kha “cucu ka tuah ko ţung, khakha ka tuah ko ţung” an ti ngam ko.

Minung tampi he riantuannak khrihfabu zongah hin kan tuahmi hi i cinken, mi nih vun theihpi, vun hngalhpi hi kan duh ngaingai ko. Kan khrihfabu ah cucu ka tuah, khakha ka tuah, keimah chimmi, keimah ruahmi dawh asi cu vun ti khi a nuam ngai in ruah khawh asi.

Asinain a tanglei kan vun rel tikah minung nih kan tuahmi thil hi Pathian hmai ah i chimh tlak thil an si lo zia kha a lang ngaingai. Kannih nih cun kan khrihfabu caah kan chimrel tawn mi, khua kan khan tawn mi, kan tuah khawhmi hna hi sang tuk ah cawi thlir kan hmang. Mi teinak hei hamn sual zong a fawite.

Asinain bible kha tha tein vun rel than hmanh, khrih le khrihfabu caah na tuahmi thil hna hi chim tlak an si rih lo hih. Cucaah khrihfabu chungah rian a tuanmi pastor in, khrihfa upa in, nu upa in, mino upa in, member dihlak tiang kan tuahmi thil hi kanmah in kan i chim tuk awk asi lo. Kan tuah khawhmi thil an tlawm tuk rih hih.

Ka tuah, ka chim, ka ruah i len loin kan tuan ding rian tu hi fel tein tuan deuh hna usih. Cucu Pathian nih a lawmhmi asi deuh. Kan tuahmi hnihchun te a um hmanhah i hmaihngalpi tuk ding kan si hnga lo. Kan tuahmi thil kong ah bible nih ngeih ter a kan duhmi lungput cu Luke nih fiang tein a kan chimh.

Luka 17:10 “Nannih zong cu bantuk cu nan si ve ko, tuah u tiah fialmi rian kha nan tuah dih tikah, ‘Kannih cu sal santlailo kan si, kan tuah awk hnga rian a simi lawng pei kan tuah ko cu,’ va ti u,” tiah a ti hna.”

Pastor in Pathian rian kan tuannak ah siseh, khrihfa upa in kan tuannak ah siseh, nu bu le mino in kan tuannak ah siseh, i porhlawt le mi zeirellonak si hin loin kannih cu sal santlai lo kan si ti hi Khrih nih ngeihter a kan duhmi lungput asi.

Na tuahmi thil hna in maw Khrih le khrihfabu teinak ah hmang sual lai cih, i chor sual lai cih. Pathian duhmi an si lo.

Kan relmi bible caang kha ruat hmanh, Khrih min in an tuahmi thil cu an tha tuk nain an lungput a that lo caah “kal ko u, nannih that lonak a tuahmi hna” ati hna kha.Khrih le khrihfabu ca riantuannak ahcun sal santlai lo ka si i ti ko hna usih. Pathian kan cungah aa lawm ko lai.Credit-Biak Mawng

Be the first to comment

Leave a Reply

Your email address will not be published.


*