MZP President Le A Hawile Cu Central Cozah Upa Le Ramdang Palai Zung Upa Hna Ton Dingin Delhi An Phan Cang

June 19, cawn niruk ni ah Mizo Zirlai Pawl (MZP) President Pu Vanlaltlana, Pu C. Lalremruata (NESO), Abie J. Nothlia (NESO) le Myanmar MP pakhat cu India Central Cozah upa le India i ramdang palai zung (Foreign Embassy) upa hna ton dingin Delhi an phan cang tiah theih a si.

Myanmar MP hi Mon ramkulh in hlutdaw palai Tun Myint Aung a si. Amah hi ram a buai in Mizoram ah aa dor vemi a si. Mizoram in a si khawh chungin NUG, CRPH, CDM le PDF caah a cawlcang mi a si.

Tutan Delhi an kal hnawhchan bik cu India cozah nih NUG Cozah cohlan, dirkamh le Myanmar ralzam hna cohlan i bawmhnak pek dingin halnak le nawlnak tuah a si. Cu pinah Delhi i ramdang palai zung upa hna sin zongah anmah le ram cio nih NUG Cozah cohlan dingin halnak tuah an i tim fawn.

Ton an timh bikmi hna cu Prime Minister Narendra Modi, National Security Adviser Ajit Doval le Home Minister hna an si. Kan hnulei zongah MZP President hruainak in Delhi ah an kal i Central cozah upa an rak ton cang hna.

Nawlnak: MZP hi Mizoram ah aa dormi kan unau hna kongah biatak tein a cawlcangmi an si. Bawmhnak zong tampi an pek cang hna. Tulio cu kan theih bantukin Aizawl khuapi cu Total Lockdown a si. Tutan Delhi kalnak i a dihmi zong hi MP Tun Myint Aung nih a chuahmi a si tiah kan theih. Amah Tun Myint Aung telh lo, a dang pathum hna caah MZP nih an cam chung hman ding Rupee 30000 lawng a sanh khawh hna. Cucu US $ cun 450 tling lo deuh a si.

Minung pathum nih zarhkhat chung hman dingah cun a tlawm ngai ko. Anmah zong an lungre a thei ngai. Kan bawm u an ti lo nain an harnak an kan chimh tikah kan lung a tha lo ngai i siaherhnak he zaanghlei a cawi khomi hna kan um hnga maw tiah kan vun langhter chihmi a si. Hi kong he pehtlai in kutsamh a duhmi kan um ahcun page inbox le contact number ah pehtlaihnak kan tuah ulaw anmah he direct pehtlaih khawhnak le tangka kuatnak account zong kan in pek hna lai. US $ 500 tal hei bawm kho ve hna usihlaw an i lawm taktak ko hnga!The Chin Post

Be the first to comment

Leave a Reply

Your email address will not be published.


*