Myanmar ralpak bawi a simi Min Aung Hlaing kong hi ka ruah lengmang tikah hin ka zaang lei khi a fak cang ko

MYANMAR AUTHAWNG ( Milungthawng cu Bawipa nih a duhmi a si lo caah Min Aung Hlaing kong ka ruah ah hin kei cu ka zaang a fak lei cang ko hih

Myanmar ralpak bawi a simi Min Aung Hlaing kong hi ka ruah lengmang tikah hin ka zaang lei khi a fak cang ko. Zeicatiah cun amah hi Adam sual in hrinmi le Jesuh Khrih nih a khamhmi a si ve ko nain zumhnak a ngeimi a si ve lo caah le milungthawng taktak a si caah hin a si. A ruang cu milungthawng cu Bawipa nih a duhmi thil a si lo caah khan a si fawn. Zumtu le si lo lung nih le thawng tuk fawn. A sual lomi mah duhduh in ui le ar bangin mi thah le lainawn a si rih fawn tikah hin nikhat khat ahcun Bawipa nih dan a tat ve lai tihi fian tein kan hmuh khawhmi a si..

Hi kongah Pathian bia a si mi Bible Cathiang bia in kan zoh a si ahcun Bawipa Pathian nih a thimmi Israel miphun hna hmanh kha milungthawng an si caah Bawipa nih Moses sinah hi tihin a ti. Cucu Cathiang nih, “Hi mi cu ka hngalhmi hna an si, milungthawng an si. Atu cu na ka onh ahcun, ka thinhunnak a alh in a alhmi in ka hrawh dih hna lai. Cun nangmah le na tefa cu miphun ngan ah kan ser hna lai,” tiah a ti. ( Exodus 32 : 9 – 10 ). Hika zawnah hin Israel miphun pawl cu Moses nih Bawipa Pathian sinah khan a nawl piak hna caah thihnak chungin an luat. ( Exodus 32 : 11 – 14 )..

Cu bantukin milungthawng si cu Bawipa nih a duh lo taktakmi a si caah le Min Aung Hlaing cu Moses bantukin Bawipa Pathian sinah nawlpiaktu zong kha a ngeih ve lo caah hin Bawipa dantatnak hi a chungah fak tukin a tlung dingmi a si. Cucaah cun zaangfak lei khi a si cang. Zeicatiah Cathiang zong nih a timi cu, “Mah hihi keimah nih ka khon i Ka ro kuang chungah ka hrenh chihmi a si lo maw?

An ke a nal tik caan caah phuhlamnak le teirul chamnak cu keimah ta an si, Zeitintiah an harnak ni cu a nai i An rawknak cu khulrang in a ra. Zeitintiah, an thawnnak kha a loh cang i Khihmi siseh, a luatmi siseh, Pakhat hmanh an tang ti lo ti kha Bawipa nih a hmuh tikah, A mi cu thiam a coter hna lai i A sal hna cungah zaangfahnak a ngei lai. Cu tikah, ‘An pathian hna, an i dornak lungpi cu, Khuazei ah dah an si kun, An raithawinak thau a ei i An thlet pekchanhnak mitsur hang a dingtu hna cu khuazei ah dah an si kun? Tho tuah hna seh law, in bawm tuah hna ngat seh, Na himnak si tuah hna ngat seh,” tiah a ti. Deuteronomy 32 : 34 – 38.

NOTE : Kan ram nih ralkap uknak chungin luatnak hmu seh tiin ralkap nih uknak a lakmi kongah duh lonak a langhtermi zumtu mi vialte hna Jesuh Khrih thawngin kannih cu Pathian fa taktak kan si cang bantukin milungthawng si hrimhrim hna hlah u sih. Hika ah milungthawng tiah a hmanmi hi kan fian khawhnak dingah cun milungkhong ( Chimh a ngai lomi ) tinak kha a si ko. Ralkap uknak kongah hin kan duh lonak langhter in lam kan zawk tik zongah hin hi nakin ralkap zong an sual kho menmi a si. Cu tik zongah kan thazaang siseh, kan hriamnam siseh zeihmanh hmang lo tein Jesuh Khrih lungput kha i ngeih zungzal rih ko hna u sih law dinnak lam khal zul in kan duh lonak tu kha langhter zungzal rih ko hna u sih. Zeicatiah Pathian chungah kan um, aa timi paoh nih cun Jesuh Khrih bantukin kan um awk a si. 1Johan 2 : 6

Milungthawng a simi Min Aung Hlaing tu cu a lung a thlen lo caah amah nawlngeihnak bakin mi zong tampi a thah cang hna. Kan lung zong a fak dih cio ko. Cu bantukin Min Aung Hlaing nih amah nawlngeihnak in a thahmi hna thisen nih hin Pathian an auh taktak tiah cun Min Aung Hlaing nih a calh ve hrimhrim lai loh. Zeicatiah Kain nih a nau Abel a thah i Abel thisen nih Pathian a auh tikah cun Pathian nih Kain cu dan a that bak ve ko.

Cucaah Kain nih a timi cu, “Hi dantatnak hi ka caah a fak tuk. Hi ram le nangmah hmaika in na ka thawl i kei cu mivakvai ka si cang lai i a ka hmumi paoh nih an ka thah lai,” tiah a leh. ( Genesis 4 : 13 – 14 ). Hi thil hna hi Min Aung Hlaing nih a theih lomi chungin a tuar hrimhrim te dingmi zong kha a rak si ve. Cu bantukin milungthawng cu Bawipa nih a duhmi a si lo caah Min Aung Hlaing kong ka ruah ah hin kei cu ka zaang a fak lei cang ko hih..By;Johnly Fambawl

Be the first to comment

Leave a Reply

Your email address will not be published.


*