Palai Khua Ah Umhmun Khuarmi SAC Ralkap Lei PDF Sakhan Umnak A Phuangtu Kah An Ton Caah 5 An Thi

Palai Khua Ah Umhmun Khuarmi SAC Ralkap Lei PDF Sakhan Umnak A Phuangtu Kah An Ton Caah 5 An Thi

Sagaing ramṭhen, Shwebo peng Palai khua ah umhmun a khuarmi SAC ralkap hna cu hriamngan in kah an ton caah 4 an thi, tiah Chindwin Attack Force in ṭuanvo ngeitu nih a chim.

February ni 15 zan suimilam 7:30PM hrawng ah Shwebo peng khuate a khangtu SAC ralkap cu an i dinh lioah 60mm lung 20 in kan kah hna caah 4 an thi. Hriamngan le hriamhme he an kan kah ve ko nain kanmah lei a thimi le aa hliammi kan um lo, tiah Chindwin Attack Force nih an langhter.

Cu kahdohnak ah Chindwin Attack Force Battalion 3, Companny 3, Kannung Net PDF, Myopyian Hlua LPDF le Red Dragon Minkyia LPDF hna i bawm in an kah hna, tiah theih a si.

Cu pin ah Tanintharyi ramṭhen Tayetchaung peng ah PDF sakhan umhmun a hlat i SAC ralkap thawng a petu Tin Lat cu Tayetchaung PDF nih an fimhlawm, tiah theih a si.

Tin Lat cu rubber cawk ding in U Toe khua lei ah a kal i, PDF an umhmun le sakhan vialte cu a hlathlai hnu ah SAC ralkap sin ah thawng a pek lengmang pin ah khuami zong a hrocer hna caah an fimhlawm, tiah theih a si.

SAC kuttang ah a ummi Tin Lat cu 2022 December 17 lioah SAC ralkap le pyusawhti hna he Khinshe um PDF ralkap an rak kawl hna lioah aa tel vemi a si, tiah theih a si.The Chin Post

KNU Brigade 5 Hmunram Ah SAC Nih Bomb An Thlak Caah Sianginn Le Tualchung Inn Tampi A Rawk.Karen ramkulh, KNU Brigade 5 hmunram ah SAC ralkap nih nihnih chung vanlawng 6 in bomb an thlak caah cacawnnak sianginn telh in tualchung mi inn tampi a rawk i a kaang, tiah KNU nih cathanh an chuah.

February ni 14 zan suimilam 10:00PM ah Jet Fighter 3 nih Luthaw peng Debuhnu khuachung ah bomb lung 6 a thlak caah inn 6 a rawk, tiah theih a si.

February ni 15 zan suimilam 11:30PM ah Jet Fighter 3 ṭhiamṭhiam nih KNU Brigade 5 hmunram Luthaw peng Pekede khuakomh, Htawhtipe(ထော့ထီးပယ်) khua ah bomb lung 6 a thlak ṭhan caah cacawnnak sianginn dihlak, dawr khan 3, tualchung mi inn 6, rawlbuk 2, leithuannak seh 4, motorcycle 2 le facang rialnak seh 1 an rawk, tiah KNU nih an langhter.The Chin Post