Monday zanlei ahkhan, Mike Pence le Trump cu buainak a chuah hnu ah a voikhatnak an itong.

Monday zanlei ahkhan, Mike Pence le Trump cu buainak a chuah hnu ah a voikhatnak an itong. Trump le Pence cu Kum 4 chung nainiam tein rian an ttuan tti hnu ah zohchia in an itthen ko cang.

TRUMP nih Pence cu phunghrampi buar in Electoral colleges result cu “objection” tuah dingin a fial nain, Pence nih a al caah Mipi theih in Trump nih a thangchiat pinah a nunnak he pehtlaihmi security kong ah him lo ngai dirhmun in, Capitol building in zaam dirhmun a phak ve tikah, Trump cungah a lung a fak ngai tiah amah he nainiam nih an chim.

Pence cu, Democratic Party nih 25 amendment hmang in Trump cu a rian in ngolter ding hi an fial nain, a al hna. Cun, Jan 20 hlan chung, an rian a tangmi pawl thate in tuan aa timh pinah Joe Bidden Inauguration zong ah chuah aa timh tiah an langhter chih.

President Trump belte cu “Joe Bidden Inauguration ah ka chuak lai lo” tiah a chim i, US tuanbia ah Kum 150 hnu ah Inauguration a chuak lomi President a si lai tiah NBC nih an langhter.

Jan 6 sandahpiah lio ah hliam hma in a nunnak a liammi, Capitol Police officer chungkhar cu Mike Pence nih a va leng hna. Asinain, Trump tu nihcun a chawnhbiak rih hna lo tiah nbc news nih a langhter rih.

TRUMP hi a political career zoh tikah thingkung kai a thiam ngai nain a ttum lei a thiam ti lomi ka lawhter ngai. Teinak hmuhnak ahcun Mipi thinlung a lak khawh ngai ko nain, sungh a thiam ti lomi nih a thlak tthan.

Politics a khel ning zoh tthan tikah, Republican Party in Primary a rak icuh lio ah anmah Republican primary election system hrim hi “Rigged” a rak ti cang. Mah lio ahkhan rak sungh sehlaw, a cohlang lai lo. “Rigged” a si tiah Independent in a rak icuh lai i, Republican Party cu a khuai/a tthen lai. Asinain Republican party in icuh ding teinak a hmu ko caah, a dai.

2016 ah Hillary he President an icuh lio ahkhan “election is rigged” a ti lengmang thiam. Rak sungh sual sehlaw, Mipi vote cun ka tei nain Rigged/fir/ in a ka tei a ti lai ti kha, a campaign message in ah rak ifiang cia. Cucaah, Presidential Debate kip ah Election Result hi na cohlang lai maw? Tiah an rak hal lengmang nak kha a si.

2020 election ah Joe Bidden be an izuam tthan i, Election is rigged/stolen tiah a cohlang duh lo. Legal te in challenge khawhnak vialte ahcun, a challenge dih nain, a tei hlei lo. A donghnak, House le Senate Joint Meeting ah a Vice President tiang phunghrampi buar in Electoral college result objection tuah ding a fial. Sungh a thiam ti lo caah, a donghnak ahcun, amah he nainiam bik, A Vice President Mike Pence he lamdang zulh in an political tuanbia cu an dih ko.

“2020 election ah kan sungh zong ah 2024 ah izuam tthan ding caan tha a ra tthan lai” tiah ruah khawh ding a si nain, sungh duh lo ruang ah minung 4 nunnak a lak in a liam i, amah dirpitu nih meithal he sandah piah an itimh rih ti a si fawn tikah, a herh loin minung nunnak tampi a liam chap rih sual hnga maw tiah ruah a rem lo taktak khi a si ko. Apoi e!Credit-Zasang Cinzah

Be the first to comment

Leave a Reply

Your email address will not be published.


*