Miss Thuzar Wint Lwin SAC phu nih tlaih ding in nawl an chuah,

Tha Tein Rel Ding: 1. Khuachia siseh, Khuavang siseh, Sehtan siseh, Muthla siseh pakhat hmanh ka mit in ka hmu bal hna lo caah tihnak ka ngei tuk lem lo caah ralkap kawngsi zong he tahchunh awk caah kaa harh ngai.

  1. Ka mit bak nih a hmuh balmi long si lo in ka cung ah harnak a ka pe balmi zong a simi lak ah ka fih bikmi le ka tih bikmi cu “Edum dum dawh nuam ah Eve le Adam a hlengtu hna Rul” hi a si.
  2. Cucaah rul bang fih le tih le huat a tlaimi ralkap kawngsi nih muidawh, pumrua tha, biachim thiam, mipi kan tuar innak a kan hrawmpi tu le Chin thilthuam dawh a cawisangtu cu tlaih ding in nawl an chuah hawi cang.

USA ram ah va tang beh hram ko seh. (1) US um Laipa hna nih va thi sehlaw special bak a si hnga ka ti. (2) Upat a tlakmi Chin media pakhat khat nih interview kan tuah piak uh. (3) Chin National Day ah sawm siseh. Credit-Thawng Za Pumpz

Sualnak A Tuah Bal Lomi Nih Chep Hmasa Bik SehPathian nih an soi nakhnga lo, mi va soi hna hlah. Midang na soi hna ning te khan Pathian nih an soi lai i midang cung i na hmanmi tahnak te kha Pathian nih na cungah a hman ve lai. (Matthai 7:1-2)

Minung hi pakhat le pakhat midang cungah sual va phawt le bia va ceihpiak hi kan hmang ngaingai hna. Atu lebang cu maivan, online cungin anih a dik, anih a palh, anih a sual tiah fb chungah komment in hehchat tiah sual kan i phaw i bia kan i ceih. Pakhat le pakhat kan i soi hna i fb hi midang sualphawtnak le midang soiselnak ah kan hman hna. Hihi Pathian nih a duh lomi thil a si. Midang sual a phaw i bia a ceihmi hna cu Pathian nih ni khatkhat cu an bia a ceih ve hna lai.

Cucaah Bawi Jesuh nih, “Pathian nih an soi nakhnga lo, mi va soi hna hlah. Midang na soi hna ning te khan Pathian nih an soi lai i midang cung i na hmanmi tahnak te kha Pathian nih na cungah a hman ve lai,(Matthai 7:1-2)” tiah a kan cawnpiak.

Johan cakuat chung i a sual lioah an tlaihmi nu kong kan zoh hmanh hna lai. Ni khat cu Bawi Jesuh kha zingkate ah biakinn ah khan a kal i mizapi kha a cawnpiak hna. Cu lioah cun phungbia cawnpiaktu saya hna le Farasi mi hna nih minu pakhat va cungin pa aa duh lio i an tlaihmi kha an run luhpi i zapi hmaiah cun an dirter. Jesuh cu an thawh i, “Saya, hi nu hi pa aa duh lio hrimhrim ah an tlaih. Kan Phung ah Moses nih nawl a kan pekmi cu, cu bantuk minu cu lung in thi lakin cheh hrimhrim awk a si lai, ti a si. Nang, zeitindah na ruah,” tiah an ti.

Phungbia cawnpiaktu saya hna le Farasi mi hna nih hi ti bia an hal cu Jesuh kha hneksak i sual phawt an duh ca le bia ngeihter khawh an duh caah a si. Chep hlah u a kan ti ahcun Moses nawlbia na buar kan ti lai. Chep ko u a kan ti ahcun ziah, misualmi hna khamh awk le an sualnak ngaihthiam awkah ka ra na ti ne lo maw tiah kan ti lai i a sualnak kan kawl lai timi lungput le ruahnak kha an ngei. Jesuh nih hi hna nih hin zei bantuk lungput dah an ngeih ti kha a hngalh dih. Jesuh cu an hal chih lengmang caah Jesuh nih, “Nan lak i sualnak a tuah bal lomi nih chep hmasa bik seh,”(Johan 8:7) tiah a hun ti hna. Cu bia an theih bak cun lung ai thlir i minu cheh a timtu vialte cu an lung an i hmu, an sualnak an i hmu cio i ahohmanh nih minu cu an chep ngam ti lo. An i putmi lung an hlonh țhan dih. Pakhat hnu pakhat in an i zukphiak dih, upa pawl kha an i zuk hmasa i Jesuh lawng kha a taang.

Mah mibu lakah khan minu lung in a chep ngam dingmi pakhat a um. Sualnak zong a tuah bal lo i zei sualnak hmanh a ngei bak lomi pakhat a um. Cucu nang ahodah a si hnga tiah na ruah? A sual lioah an tlaihmi minu lung in thi lakin a chep ngamtu ding le bia a ceih ngamtu dingmi cu Jesuh a si. Jesuh cu zei sualnak hmanh a ngei lo i minu kha amah nih bia a ceih khawh. Jesuh Khrih lawnglawng nih minu kha bia a ceihpiak khawh i sual a phawt khawh. Sihmanhsehlaw Jesuh nih minu kha bia a ceihpiak in sual a phaw maw? Phaw hlah.

Jesuh cu ding tein a hung țhu i, “Minu, khuazei ah dah an si dih? Nangmah sual phawtu dingah pakhat hmanh an taang kun lo maw?” tiah a ti. Minu nih cun, “Bawipa ahohmanh an taang lo,” tiah a leh. Cu tikah Jesuh nih, “Kei zong nih sual kan phaw ve lo. Va kal law a sual bel va sual ti hlah,” tiah a ti. Biaceihnak nawl a ngeitu Jesuh Khrih hmanh nih minu kha bia a ceihpiak in sual a phaw lo. Nang le kei biaceihnak nawl le midang sual phawtnak nawl a ngei lomi chinchin nih cun ahohmanh an bia kan ceih hna in sual kan phawt hna awk an si lo.

Kannih cu biaceihtu le sual phawtu ding kan si lo, nain pakhat le pakhat kan um ți ah siseh, a bubu in kan um ți hna ah siseh, fb chungin siseh mikip kha bia kan ceih hna i sual kan phawt hna. Kan soisel hna. Nangmah le keimah nih mi va soi nakding le an bia va ceihpiak i sual va phawt khawh nakding nawl kan ngei hrimhrim lo. Zei sualnak hmanh a ngei lomi Jesuh Khrih hmanh nih pa aa duh lio ah an tlaihmi minu hmanh kha bia a ceih in sual a phaw lo.

Nang le kei chim lo, vancungmi lak i upa bik a simi Mikhael hmanh nih khuachia kha serhsat in sual a phaw ngam lo. Moses ruak kha aho nih dah a co lai tiah vancungmi lak i upa bik Mikhael le khuachia cu bia an i al len. Khuachia he bia an i al lioah khan, Mikhael nih cun Khuachia kha serhsat in sual a phaw ngam lo. “Bawipa nih an sik,” (Judas 1:9) ti tu in a ti.

Khrih ah hawi dawt, nang le kei cu atu ah hin midang a soisel ngam ding, midang bia a ceih ngam ding le sual a phaw ngam ding kan si lo. Cucaah cun atu ah maivan, online, fb chungin mi kan soiselnak lung kan i putmi le kan i thlirmi lung siseh, midang biaceihnak i kan hmanmi lung le sual phawtnak i kan hmanmi lung hna kha atu in hlonh cang hna usih. Midang kan soi hna le sual kan phawt hna a si ahcun Pathian nih bia ka kan ceih ve lai i a kan soi ve lai i sual a kan phawt ve lai. Midang cung i kan hmanmi tahnak te kha Pathian nih kan cungah a hman ve sual lai.Bawipa nih thluachuahnak kan pekpiak hraam ko seh.Dinnak kha a cat lomi tava bantukin luanter camcin ko u (Amos 5:24).Salai K. Biak Lian Thawng

Be the first to comment

Leave a Reply

Your email address will not be published.


*