Miss Myanmar Sinin Thazaang Laknak

Zei ruangah dah mah hmanthlak thengmang te ka hman ti a si ahcun a hnuk zawn i hma pe te khin thazaang i lak cio hna u sih ti ka duh.

Miss Universe 2021 zuamnak ah top 21 tiang a phan i Laithil aa aih ruangah best costume (ai dawh bikmi a ṭha bikmi thuam zong a hmuh chih).

Thuzar Wintlwin hi kum 19 a si lio, model ṭuan aa thawk kaa kaa ah a hnuk ah a bomi a um i cucu a ngan chin lengmang ruangah siibawi te nih na hnuk hi na khuai lo ahcun cancer zawtnak ah ai cang lai tiin ralrinnak an pek i model a ṭuan cuahmah lio ah a hnuk cu an khuai piak. Nungak pakhat a sinak dirhmun in hnuk cungah hmape um timi cu a caah ngaihchia ngai ngai a sinak le a harnak kong pawl zong amah pumpak in a langhter.

Model cu kan theih cio bangin hnuk hi a biapi tukmi a si. Hmape pi he hnuk cung cun langh lengmang zong cu ningzak thil a si ko nain a lung a dong hlei lo. A donghnak ah cun hnuk cancer a ngeimi hna caah thazaang peknak (breast cancer awareness) zong a tuah chih beh. A tonmi zawtnak ṭha lo kongah a lung a dong bal lo i a donghnak ah cun Miss Myanmar a ngah i Universe ah top 21 a phan behnak a si.

Cun atu hi Kawlram buainak kongah biafak bakin vawlei cung ah Kawlram kong a thanh i Miss a sinak kha mah pumpak caah i lak loin ram daihnak caah a hman. A donghnak ah Ralkap cozah nih tlaih dingin nawl an chuahpiak beh.

Cun, a sunglawi tukmi Miss zuamnak zaan i a hruk dingmi thil pawl vialte cu vanlawng tawlreltu nih an thlaupiak i, aa hrukmi thil bak he lawng a tlunnak hotel a phan. Mah zaan i aa hruk ding thuam vialte cu a tlau dih tikah minung sinak in a ngaihchia in a lungre a thei lai ti a fiang tuk. Miss zuamnak thuam hna cu fawi tein tuah khawhmi a si lo tikah zaangfak tuk khi a si. A cheu nih ralkap cozah tuahsernak a si ko lai tiin a ruatmi zong an um len. Nain a lung a dong hlei lo. Hmaipanh tein a um zungzal i US Chinmi hna dawtnak ruangah Laithil dawh tak tak a rannak in an va chang i cuticun aa zuam kho i a donghnak ah best costume a ngah beh. Top 21 a phak tikah tuanbia thar zong a vun ser ṭhan.

Hi kum note a simi Myanmar Miss hi mirum pi zong a si lo. A nunnak ahhin harnak phun phun a ton ko. A nunnak himnak le a ngan dam lonak le a herh tukmi tlaunak nih a nunnak ah harnak a pek ko nain a lung a dong bal lo i za cang seh tiah a duhmi kha a ngol lo. Cu nih cun Kawlram miss lakah mipi thinlung a lak biknak a si.

Kanmah kan nunnak cio zongah caan tampi ngandamnak he a dang dang he hnahnawhnak kan tong ko lai nain lung dong lo tein hmai kal hi hlawntlinnak nganpi cu a si ko.Credit-Theitlei Le Cawnpiaknak

Be the first to comment

Leave a Reply

Your email address will not be published.


*