Mipi kan dirhmun :Mipi zong a tanglei bantuk minung kan si sual nakhnga lo kan i ralrin a herh ve.

2020 Thimnak Tlaihtleng: Kan ram ah rampumpi thimnak (general election) voithum (1990 ;2010 ;2015) tuah a si cang i rammi hna zong thimnak he pehtlai in hmuhton zeimawzat cu kan ngei ve cang.Atu kum thimnak ah kan mithlah (delegate) kan thim tik hna ah kan i palh sual nakhnga lo kan i ralring awk tete atanglei bantuk in hrawm(sharing) kan duh hna –

1.Cangai bantuk hruaitu kan thim sual nakhnga lo i ralring usih. Cangai bantuk hruaitu hna cu ding tein kal thiam loin an siarpahleng in an kal caah an hruaimi mipi hna kha zei tik hmanh ah tinhmi an phan pi kho hna lo .An chim mi le an tuahsernak aa lawh lo caah zumh awktlak hruaitu ttha an si kho lo.A hruaimi mipi kha a vaivuanh hna.

2.Cawtum bantuk hruaitu kan thim sual nakhnga lo i ralring usih. Cawtum bantuk hruaitu hna cu phung le phai ; dun le dan zong kha an tuaktan lem lo i anmah le siarem ning poah in rianttuan a hmang mi an si caah an hruaimi mipi kha chengpalang ah an tlakpi tawn hna.

3.Chungkuh / Chungchep bantuk hruaitu kan thim sual nakhnga lo i ralring usih.Chungkuh bantuk hruaitu hna cu mah zawn lawng a ruatmi an si.An nupi le caah; an fale caah le an chungkhat sahlawh rualchan hna caah an nawl ngeihnak le an thil ti khawh tthawnnak kha ningcang loin hman a hmang mi pawl an si.

4.Ramui bantuk hruaitu kan thim sual nakhnga lo i ralring usih. Ramui bantuk hruaitu hna cu a phunhawi sa ei a hmang mi an si i mi puarthau le mi hakkau an si fawn.Eihmuarnak kha din lonak a si tiah an ruat lo i tuahkel mi thil ah an ruah caah kan ram le kan miphun chung ah eihmuarnak a karhtertu an si.

Mipi kan dirhmun :Mipi zong a tanglei bantuk minung kan si sual nakhnga lo kan i ralrin a herh ve.
1.Laikeng / Kinglang bantuk mipi kan si sual nakhnga lo i ralring usih.Kinglang cu a umnak hmunhma hoih in a muici / arong aa thlen bantuk in mipi zong a sen lak ah kan um tik ah a sen; ahring he kan i cawh tik ah a hring ; sky blue he kan kal tti tik ah sky blue ti in a muici aa thleng lengmang mi lungrep ngeih lo mizuangzam kan si sual nakhnga lo kan i ralrin a herh ve.

2.Phai kung / Hluang kung bantuk mipi kan si sual nakhnga lo i ralring usih.Phai kung cu thli nih a hranhnak lei poah ah tluk a hmang mi a si ban tuk in kan nih mipi hna zong a chim kho le a rel kho an tam deuh nak lei poah ah tluk a hmang mi kan si sual nakhnga lo Pathian nih a kan pekmi kan chiattha thleidannak kha hmang in mizei party dah kan ram le kan miphun caah zumh awktlak in rian a ttuan lai i aho hi dah kan miphun le kan ram caah zumh awktlak sinak lei ah a kan hruai khawh lai ti tuaktan bu tein kan Mee pe hna usih tiah kan sawm hna.
Credit-Hrang Tum

Be the first to comment

Leave a Reply

Your email address will not be published.


*