Minu Kong Upadi Biachimnak in Minu Limhang Zeirelpiak Lo

Minung hi kanmahle miphun hoih cio in nun ning kan rak ngei. Miphun pakhat le pakhat nun ning kan cohlanmi zong aa khat theng lai lo. Lai pa nih lai nungak dai len khi nu nih poi ah kan chia lo zong a si kho i Kawl nu ca cun phundang in an rak i ruah zong a si ve kho. Cu caah si ning, nun ning le miphun sinak aa khat lomi kan zatlang nun cio ah ralrin ding a rak um tawn.

Timhnak ngei in minu pakhatkhat i a limhang zeirelpiak lo timi hi upadi nih a khapmi a si. Limhang zeirelpiak lo timi hi a phunphun in a chuak kho. Biachimnak zong in maw, aw tuahsernak zong in maw, cawlcanghnak langhternak zong in maw asiloah thil pakhatkhat hmuhsaknak zong in maw a si kho. Mahti kan tuahsernak kha minu nih rak thei seh, rak hmu seh timi timhnak kan ngeih a si ahcun nu pakhat i limhang zeirelpiak lo timi ah a tla lai. Cun timhnak ngei in minu pakhat i limhang zeirelpiak lo timi ah pumpak himnak va buarhnawh in a cunglei tuahsernak tuah zong kha aa tel. Penal Code 509.

Limhang zeirelpiak lo le timhnak ngei timi kong hi a biapi ngai. Tahchunhnak ah lam pawng ah mipa 5/6 an t’hu i lampi ah aa choklemi ngaknu pakhat kha “na tawt’awk a t’ha ngai ee,” tiah mipa pakhat nih capo a rak saih hnawh. Cu lam pawng ahcun midang aa chokletmi zong an um len. Nu cu ningzak mithmai chia ngai in a va um hnga. Pa nih capo in ka chim tiah aa ruah ko lai. Nain hika zawn ah ruah awk a ummi cu mah tuahsernak kha timhnak ngei in minu limhang zeirelpiak lo timi ah a pil kho lai maw tikha a si.

Nu nih zapi hmai ah ka limhang a ka zorter, zei a ka relpiak lo, timhnak ngei in a ka tuahhrammi a si tiah rak i ruah selaw a cunglei upadi ning in a kalpi hnga. Penal Code 509 hi riant’uan um lo kum 1 tiang thawngthlak maw, tangka liamter maw, a pahnih fonh zong in maw sualphawt khawhmi a si. Remnak ser khawhmi a si fawn. Biaceih zung phak tik zongah biahrennak (aa-mah-khan) laak in um i biaceih khawhmi a si. Mah kong cu palik nawlngeihnak in tawlrel khawhmi a si lo ca ah biaceih zung ah kal i report ding a si.
Credit-Salai Thawngpi/Ramthlo

Be the first to comment

Leave a Reply

Your email address will not be published.


*