Mino le upa thinlung lei dam a herh ning

A tanglei hmanthlak hi ngakchiate pakhat nih a suai mi a si.A suai dih hnu ah a nu le a pa nih an zohpiak i an lau tuk.A ruang cu “Ngakchia tete hri in an i awk mi hmanthlak” a si caah.An ruah mi cu “Kan fa lungrawhnak a ngei. Thih pei aa tim hi. A thinlung le a khuaruah a dam ti lo” tiah an ruah.A rannak in a nu le a pa nih thluaklei siibawi sin ah an kalpi colh.

Siibawi pa nih hmanthlak cu ţha tein a zoh.
A suaitu ngakchiate kha hitihin bia a hal, “Zeidah na suai mi a si?”Ngakchia: “Kan hawile he ti kan pilh lio hmanthlak a si. Tipilhnak suite ရေကူးဝတ်စုံ kan i hruk. Kan hngawng cung i a um mi khi thawhchuahnak pipe a si. A cung i um tete khi thaw kan chuahtik i a hung chuak mi thlipum tete an si,” tiah a leh.

Siibawi pa nih cun amah ţhi rual a dang ngakchia 10 a auh hna. Pakhat hnu pakhat hmanthlak cu a hmuhsak hna i “Zei hmanthlak dah a si?” tiah a hal hna. An leh mi cu a dikthlir in aa khah lo nain a tlangpi in “Ti chung ah an pil lio mi hmanthlak a si” ti cu aa khat dih.

A taktak ahcun a nu le a pa tuhi”lungretheih/tha baat/thluak lei tha a rak baa mi an si.” Fale sining kha “ngakchia mit” in an zoh kho ti lo i “anmah sining mit lawng in” mi an hmuhkhawh.

Cu caah; Mino le upa hi lungthin a dam mi si kan herh. Takpum ngandamnak le thlarau ngandamnak biapi bik ah kan chiah bantukin kan thinlung damnak zong biapi ah kan chiah a herh. Lungthin a dam lomi cu mah le mah fahnak an i pe deuh. Mi nih fahnak pek mi nakin mah le mah fahnak aa pe mi an si. Tch, ka hawipa nih biafak in a ka timi fahnak nakin cu bia nih ka thinlung ah a caamter i ka ruah lengmang tik ah fahnak a chuak chinchin.

Mino le upa cu kan khuaruah damter a hau.Zeipoh hi “kan khuaruahnak” in aa thawk.Mi kan lehrulh mi te hna, Lungrawh in kan um mi te hna,Santlai lo dirhmun ah kan um ruah tiah kan i ruah mi te hna hi kan khuaruahnak in a rak chuak mi a si.

Tch, hmanthlak a suai mi ngakchia kha a nu le a pa nih an hmuh ning le an ruah in phundang pi in a um. Asinain, a taktak ahcun a nu le a pa tukha an khuaruah ning ah an rak dam lo deuh.Mino le upa cu ” mah le nah aa cohlang mi” kan si a herh.

Ngakchia cu “a luancia mi ” kong ah buaibainak an ngei lo. Tch, nizan a thin a hung mi kha nihin ah a philh dih kho.Asinain, mino le upa cu “a luancia mi sining” in kan luat kho cio tawn hna lo.Cu nih cun mah le mah lungtlinh lonak, mah le mah i huanak, mah le mah man i ţhumhnak a chuahter.

Hi lio caan ah Pathian muisam keng kan sinak, Khrih thisen thawngin man ngei kan sinak, Thiangthlarau thawngin kan nunchung hmanh ah daihnak le hnangamnak kan hmuh khawhnak le ruahchannak a um peng nak kong hi kan philh lo a hau.

Thinlung a dam mi si cio hna usih.Khuaruah ning a dam mi si cio hna usih.Pathian nih a kan cohlan bantuk in mah le mah aa cohlang mi le midang a cohlan mi, aa bawm mi si cio hna usih. Credit-Abednego Cenhrang

Be the first to comment

Leave a Reply

Your email address will not be published.


*