Mino hna nih nulepa ruahnak hal a biapitnak:

Kum 18 ka tling cang. Keimah tein khua ka sa kho, khua kaa khaan kho i ka cawlcang kho cang. Ka duhmi ka hngalh. Ka zulhmi lam kaa fiang.» tiin kanmah tein kal i kan thil tuahmi le duhthimmi ah nulepa i thlaknak hmunhma pek lo asilole nulepa ruahnak zeirel loin um hi ruahnak ttha a rak si lo. A ruang cu hihi a si:

Minung kan cal zawn i a ummi thluak hi «Prefrontal cortex» tiah an auh i, hihi kum 25 kan si hlan cu puitling tein aa sersiam dih rih lo. Hi thluak hi biakhiahnak (decision) ttha kan tuah khawhnak ding ah a kan bawmtu a si i, kan thiltuahmi le duhthimmi nih hmailei i a chuahpi dingmi thil (consequence) hngalhnak le tuak khawhnak lei zongah a kan bawmtu a si.

Zeitluk in caa kan thiam le kan mark a tthat zong ah kan thluak (prefrontal cortex) aa sersiam dih rih lo ruangah upa ruahnak ti lengmangmi, puitling khuaruahnak khi kan rak ngei kho rih lo. Kan lungthin duhnak kha hmai ah kan chiah i, ka tuah dingmi hi a ttha maw ttha lo, hmailei ah zeidah a chuak kho, ti khi thuk le kaupi in kan ruat kho lo i kan hmu kho lo.

Cucaah thil kan tuah lai, duhthimnak kan tuah lai le biakhiahnak pakhat khat kan tuah lai ah kan nulepa hna hi kan theihter hna i, ruahnak kan hal hna a herh. Cucu anmah nih duhthimnak le biakhiahnak an kan serpiak lai tinak siloin tuaktan khawhnak puitling a ngeimi hna ruahnak kha kan i thim dingmi lam le biakhiahnak kan tuah dingmi fiang deuh in zohnak mitbenh ah kan hman sicun kan caah lam ttha le biakhiahnak ttha i thim thiamnak le i thim khawhnak kan ngei deuh i, i ngaichihnak nun ton ding zong a tlawm deuh.MAH LUNG LAWNG I RINH CU PING SUKNAK A SI an ti ttheomi  kha a si.Credit– Roro Fambawl

Be the first to comment

Leave a Reply

Your email address will not be published.


*