Mindat Ralzam Ni 6 Bawhte Ramlak ah a Nunnak a Liam

Nihin (May 22) chun sml. 1:00 hrawng ah Mindat ralzaam hna lak ah aa telmi ni 6 bawhte cu ramlak ah a nunnak a liam.

May 21 ah Pukon khuate ah CDF-Mindat le SAC ralhrang kahdohnak a chuak i U Naing Thang le Daw Naing Li nih ni 6 lawng a si rihmi a fapate cu ramlak ah an zaampi ve.

Ramlak an umnak ah thli a fak, ruah a sur tik ah bawhte a cuap fak tuk in a hnorsuan i, nihin ah a nunnak a liam hi a si.The Chin Journal May 22, Hakha

Nunṭhan na duh maw? Hrinṭhanmi na si ahcun ṭuanvo na ngei!

Na nungak/tlangval nih na lung an fahter i nan iṭhen tikah a cung i na ngeihmi duhdawtnak le lungfahnak in na tei khawhnak dingah na tuah tawnmi tampi a um.

“A mui hmuh na hrial, nan nehnang photos, phones, messages tibantuk na hlonh. A kong ruah lo ding in le a tuahmi hmuh lo ding in naa zuam. Thil pakhat khat hmang in philh khawhnak naa zuam. Naa zuamnak thawng in caan a hun rauh tikah cu na tuarmi harsatnak le lungfahnak chung in luatnak le teinak na hmuh ṭhan.”

Na thinlung a dam hnucun na hmuhṭhan hmanh ah fahnak an pe ti lo i, thinlung thar, ruahnak thar duhdawtnak midang cungah ngeih khawh ṭhan asi.

Cubantukin hrinṭhannak na co hnu in vawlei nuamhnak, taksa duhnak, zu ding, zukhmawm, porn videos zoh, hmantlak thurhnawmmi zoh, nulepa sualnak tuah, thinlung le ziaza ṭhalomi tibantuk kha nangmah hrim nih na hrial ve i, na doh ve hrim a herh.

Ingaihchih timi hi ahlan ah na rak tuahmi thil kha tuah ṭhan ti lo. Kir hnawh ṭhan ti lo, ipehtlaih ṭhan ti lo, kaltaak, hlawt le duh tilo asi.

Cutikah Jesus Khrih min, Thiang Thlarau ṭhawnnak le thlacamnak in teinak na hmuh hnucun Bible rel le thlacam in Jesuh Khrih he ihawikomhnak na ngeih tikah Thiang Thlarau in na khat chinchin lai i, Thiang Thlarau theipar na par kho lai i, Jesuh Khrih muisam na lo chin lai.

Pathian fale hna tamdeuh hi hrinṭhanmi kan si ko buin, kan thlarau cu a luat ko hmanh sehlaw, kan thinlung ṭhatlonak le kan taksa duhnak a luat lomi, Thiang Thlarau nih a uk kholomi le a hruai khawhlomi, cun Thiang Thlarau theipar a par kholomi kan tam tukmi hi aruang cu…,

“Na rak tuah tawnmi na nun hlun, na ziaza, na thinlung put, na taksa duhnak, vawlei thilri, chawva hakkauhnak, na thinlung duhnak le na ruahnak kha na tei khawh lo caah Bible rel le thlacam loin, Jesuh Khrih ruat loin le ihawikomhnak ngeih loin, mah duhnak le mah ruahnak in nifatin na nun na hman i Bible bia na thinlung ah na ngeihmi a tlawmtuk caah asi.

Khrihfabu programs, events le pumhnak ah na tuahmi menmen mi nih na nun an ṭhanter kho lai lo. Nangmah pumpaaktein Jesuh Khrih he naa pehtlaih i, ihawikomhnak na ngeih i, na thinlung dihlaktein Bawipa na kawl hi biapituk asi.

Bawipa nih vawlei ah an ser sawhsawh hrimhrim lo. Thiang Thlarau laksawng an pekmi hi vawlei ah na ṭuan hnga dingmi rian an pekmi ṭuanvo asi. Khakha na kawl i na hngalh a herh i, vancung ah laksawng suiluchin na co khawh nakhnga zumhawktlaktein thih tiang na ṭuan aherh.

Hihi Pastors le Evans hna lawng siloin Pathian fale hna, hrinṭhanmi hna nih Jesuh Khrih pennnak ram chungah ṭuanvo kan ngeimi cio asi.

Thiang Thlarau laksawng Bawipa nih an pekmi naa hngalh rihlo ahcun tuni thok in kawl izuam! Hngalh loin le ṭuan loin ithihpi hrimhrim lai cih!Credit-James Vanneilian

Be the first to comment

Leave a Reply

Your email address will not be published.


*