Mindat mipi ralzam hna caah Kalaymyo ah phaisa thoh tu minung pakhat cu nizan ah phaisa sing 170 hrawng he palik nih an tlaih

Mindat mipi ral zam hna caah bawmhnak phaisa thoh tu cu Kalaymyo ah an tlaih…
Mindat mipi ralzam hna caah Kalaymyo ah phaisa thoh tu minung pakhat cu nizan ah phaisa sing 170 hrawng he palik nih an tlaih.
A thumh nak Kyutungpin (ကြုံ့သုံးပင်)veng
inn ngei tu U Thang Mang Ki cu tuzing
suimilam 10:00 hrawng ah palik nih an tlaih ve tiah a mah he neih niam mi chungkhar hña sin in theih a si .

Rallokap uk mi khua tiah tar langh mi Mindat khua mipi thong reng lo cu khuachung ah um ngam lo in ramlak ah an i dor hña caah ei ding le ngandam nak lei zoh khenh hau mi tampi an um ti zong theih a si.
20May,2021 Chin world The Chin Post

A Zaan Khatnak Ah Cun Mu.Voikhat cu khua pakhat ah aa țhium kami nuva hna pahnih an um. An i țhitumh a zaan khatnak a si caah an pahnih hnatla tein, “A zaan khatnak ah cun mu…, inn ah ahohmanh kan i lenter hna lai lo. Kan nu le kan pa, kaphnih chungkhar an si zongah innka kan onh bak hna lai lo,” tiah an nuva in lungtlinnak an ngei.

Zaan suimilam 08:35 pm hrawng a hung si ah khin pa lei, pa i a nu le a pa nih kan fale zeidah an lawh hnga tiah vun bih ta duak dingah an ra. An pa nih innka on a duh i an nu a zoh, an nu nih innka onh citcet hna lai cih kan biakam hrawk hlah. Innka an kingh len zongah i theihter hlah, kir ko hna seh a ti. Innka an onh duh hna lo ruangah tuan tein an it i a si ko hih an ti i pa i a nu le a pa cu an kir țhan.

Tlawmpal a rauh hnuah nu lei a nu le a pa an ra ve i innka an vun kingh ve. Nu nih innka onh a duh hna, a vapa sinah innka onh hna u sih, nu le pa innka onh duh lo cu a țha lo. Ka nu le ka pa innchung luhter lo i kirter cu a si kho lo. Nu le pa ngaihchiatter cu thluachuah hmuh lonak a si a ti pah in a mitthli ai tlakter i a nu le a pa cu innka a onh hna. Cu lioah an pa cu dai tein a um ziar ko.

Kum caan a vun rau i fapa pahnih zong an ngei cang. A pathumnak ah fanu te an vun ngei țhan i an pa nih innpa chakthlang le sahlawh rualchan, hawikom theihhngalh vialte a sawm hna i an fanu te caah Pathian sin lunglawmh thlacamnak, laibuhernak sunglawi taktak in tuahpiak a timh.

Cu tikah an nu a khuaruahhar tuk i, “Zeitin na si e kan pa? Fapa pahnih kan ngeih hna i an chuah lio ah atu bantuk hin sunglawi taktak in na tuahpiak hna lo. Atu fanu te kan vun ngei i sunglawi taktak in laibuhernak na tuahpiak. Zeiruangah kan fanu te vial na tuahpiak?” tiah a hal.

A vapa nih a lehmi cu, “Kan fanu te hi innka a kan onpiak ve te dingmi a si,” tiah a ti. Fanule hi fapale nakin nu le pa caah an rak țha deuh ko rua hih… Cu pinah nu nih hin, anmah nu lei chungkhat deuh hi dawtpiak le khurhawmhpiak an rak duh deuh ko rua hme hi. Dinnak kha a cat lomi tiva bantukin luanter camcin ko u (Amos 5:24).Salai K. Biak Lian Thawng

Be the first to comment

Leave a Reply

Your email address will not be published.


*