Mindat ah Naypyidaw in aa Thawhmi SAC Ralkap Helicopter Pahnih an Phan

Mindat khua kahdohnak a fah hnu ah Naypyidaw in SAC ralkap helicopter pahnih an rak i thawh i atu ah Mindat khua Van ah an zuang cuahmah, tiah Mindat zatlang bu lei rinattuan pakhat nih a hcim.

“Helicopter pahnih nih Mindat khua an vel i an zuang cuahmah,” tiah a cunglei upa nih a chim.

Mindat mipi uknak lei bu thawngzamhnak nih, “Nichuahlei ah palik sakhaan zawn in le Nitlaklei ah SAC ralkap bu no. 274 nih CDF-Mindat an doh hna,” tiah atulio Mindat thil sining a langhter.

SAC ralkap lei nih Sniper le miakpi pawl an hman caah CDF lei hliamhma a pumi pawl khulrang in bawmhchanhnak an tuah khawh lo pin ah mipi nunhimnak ca zong ah ttihnung a si cang, tiah an langhter chih.The Chin Journal May 14, Hakha

CRT nih Yangon khua pawng ah aa dor mi Paletwa ralzaam hna sin tlawng in bawmhnak pek than.The Hakha Times, May 14 Chin Rescue Team (CRT) nih Yangon khua pawng, Myaingtakar ah aa dor mi Paletwa ralzaam hna umnak khua thum (Internally Displaced Persons-IDPs camp), May 12 ah tlawng in bawmhnak an va pek than hna, tiah kan theih.

Hi khuate camp thum ah a um mi hna hi camp 1 ah chungkhar 38 (milu 120) le camp 2 le camp 3 ah chungkhar 18 veve (milu 130 hrawng) an um i Chin Rescue Team nih an herh mi dinti siseh, zun-inn siseh, dinti khonnak asiloah tikhur zong an tuahpiak cuahmah hna, tiah kan theih.

CRT General Secretary Rev. NC Thawng Tha Thang @ Pastor TT nih, “Hika hrawng khuasa mi kan unau hna hi kan pa/pu JP. Biak Tin Sang nih a hramthok tein a rak tawlrel mi hna an si. A hnu ah kanmah CRT nih an herh mi tete kan tawlrelpiak hna. Cu zong cu ramchung ramleng in Chin miphun hna nih zawnruahnak he kut an samhnak thawng in a si. Thilri siseh, tirawl siseh, a herh mi dangdang bawmhnak tete kan pek mi hna lawng hin a za lai lo. Ngakchia sianginn an kai khawh nakding siseh, riantuan an thiam nakhnga, tahchunhnak ah kutzungthiamnak lettama, pazan le thiamtah tibantuk tiang in a thiam mi cawnpiaktu hlanpiak in chimh zong an hau rih. Chin miphun cu Pathian pakhat a biami kan sinak le kan nunphung ah aa dawh tuk mi thlachiatruahnak le zawnruahnak lungput he ramchung ramleng in kut a samhtu hna thawng in ralzaam kan unau hna zong an sican a tha deuh ngaingai cang. Asinain, an herh taktak mi riantuanpiak ding tampi a um rih ca ah kan kutsamh cio rih usih,” tiah a chim.

May 12 zong ah Rev. Dr. Victor Ceu Cung hawile Good Samaritan Group (Tuluk miphun a si nain Myanmar ram ah a chuak i a thanglian mi Saya Aik Yu le a nupi Sayam Esther, Kachin miphun le an hawinu Julia) hna nih tangka fang in sing 14 voi khat le sing 24 voi khat tiin a dihlak sing 38 bawmhnak an pek hna. Ramchung ramleng in zun-inn saknak ah tangka aa thawh mi zong tampi an um i zun-inn 30 renglo an sakpiak cang hna i 40 hrawng sak ding zong aa duh rih, tiah kan theih.

CRT President Rev. Dr. Peter Za Hlun Thang nih, “A khiar lo mi le zeizongte ngeitu Pathian kan ngeih ca ah hmunkip kaakip in bawmhchantu tete nanmah thawng in nihin ahcun zun-inn zong tampi kan sakpiak cang hna. Zun-inn hi ngandamnak ca zong ah zeitluk in dah a biapit ti cu zapi hngalh mi a si ko. Ralzaam an si tik ah zun-inn pakhat kha an zapi i hrawm awk a tha lo. Chim ko ahcun, chungtlik caan le pawlei damlonak a ngei mi hna ca ah zeitluk in dah zun-inn a herh mu. Zun-inn pakhat ca ah hin tangka Ks. 200,000 a dih. Cucaah, inn khat nih zun-inn pakhat cio an ngeih khawh nakhnga le thluachuah hmuh a duh ve mi nih zun-inn saknak ah i tel cio khawh a si rih. Cun, tikhonnak/tikhur ca zong ah kutsamh khawh thiamthiam a si rih,” tiah a chim.

Hi kong ah Paletwa ralzaam chung in upa pakhat nih, “Hika kan hung phanhnak hi kum khat a reng ti lo. Miphundang sin ah ruahdamh in kan hung pok. Lungrethei taktak in kan um lio ah Chin miphun kan unau hna (miphundang tiang zong) nih a lamkip in an kan zuanhnawh i kan hnangam tuk cang. Atu kanmah umnak camp 1 (Pitouttann khua) ah hin minung 120 kan um i kumkhua upa kum 90 tar zong a um. Thikai, thithlum zawtnak ngei zong an um hna. Pumpawcawmnak pin ah ngandamnak lei zong hi kan herh ngaingai. Cun, kan fale sianginn kainak zong hi lungrethei ngai a si. Sianginn hi kan umnak in meng 2 renglo a hlatnak ah a um i motor (bus) a um fawn lo i kan lungrethei ngaingai. Zeidang kong ahhin cun, Pathian le miphun hawi nih an kan dirkamh i kan hnangam ko. Kan ram tha in thil sining a va ciankuan ko zong ah Paletwa ah cun kan kir ti lai lo. Hika ah hin khua kan tla/sa lan ko lai,” tiah a chim.

CRT Treasurer Saya Peng Hu nih, “Ramchung ramleng in bawmhchanhnak tangka tete hi a pechantu nih cu bantuk kha bantuk ah kan hmanpiak u, an tinak tete ah hman an si. Kanmah CRT lei nih kan thiamtawk in upatnak roca (certificate) te zong kan pek hna. Ralzaam an si bantuk in an herh mi a tam lengluang rih. Miphun hawi zawnruahnak he a zat rikhiah a um lo, ahopoh nih i tel le kutsamh khawh peng a si,” tiah a chim.

“Tutan hi camp 3 ah kan kal. Camp 2nak hrawng hi inn hmun man leiba tampi an rak ngei. Inn hmun pakhat ah hin tangka Ks. 1,000,000 (sing 10) a si i cu zong cu ramchung ramleng in inn hmun cawkpiaknak siseh, leiba champinak lei ah siseh, i tel le kutsamh cio khawh a si i samh ding zong ah kan in sawm hna,” tiah CRT Vice President Rev. Dr. Cho Om Ngai nih a chim.

Tutan ralzaam hna sin tlawnnak le bawmhnak pek ah hin CRT lei in minung 20 hrawng motor 5 in an kal kho. Bawmhnak pek lawng si loin Pathian bia in thazaang peknak zong an ngeih hna. Rev. Dr. Victor Ceu Cung siseh, Rev. David Thang nih siseh, Tuluk miphun Saya Aik Yu le anupi nih siseh, CRT lei in upa dihlak nih siseh, Pathian bia in thazaang peknak biatawi an chimh cio hna, tiah kan theih. The Hakha Times

Be the first to comment

Leave a Reply

Your email address will not be published.


*