Min Aung Hlaing nih a tuah ngam lomi a um lo, aho an thih hmanh ah a poi lo. Keimah ka thih lo i keimah kut cungah nawl ngeihnak a um paoh ahcun a za timi lungput a ngeimi pa a si.

Dawtnak A Ngeih Ruangah Sianginn A On Tiah Ruat Hlah U.Hranhram in mipi nawl ngeihnak a chuttu ralhrang hruaitu Min Aung Hlaing nih zeiruangah dah sianginn on zokzok a duh?

A ruang ka țial lai i nan zumh le zumh lo cu nanmah nawl. Ralhrang serhsatnak le thahnawnnak chungin nan him khawh nakhnga a si kho dingmi le an tuah te khawh dingmi thil a hlankan in ralrinnak pek le țial keimah rian. Nan zumh le zumh lo cu nanmah rian a si ve.

Min Aung Hlaing nih zeiruangah dah sianginn hi on zokzok a duh ti ahcun nawl ngeihnak a lak hnuah a lam kip in an tla thluahmah i an țumchuk thluahmah. Ai ruahning bantukin thil a kal kho lo i a hlawh a tling kho ti lo. A rauh hlan ah zohchia in a nawl ngeihnak a tlak lai dingmi zong kha a hngalh cang. Cucaah a nawl ngeihnak a hmunh khawh nakhnga a hnu bik a ruah khawhmi le a thluak a chuah i a ngian a hman khawhmi cu sianginn on i hranhram in sianginn kaiter lawng kha a ruah khawhmi a si cang.

Nawl ngeihnak a laakmi le sianginn on cu zeidah aa pehtlai tiah a ruatmi zong nan um ko lai. Ruah phu si, ruat ko u. Nan mawh lo. Sianghngakchia sianginn an vun kai in siang cachim saya, sayama te le sianghngakchia an dihlak in sianginn chungah an um dih cang lai. Caan țha a si, a rem cang an ti hnuah an dihlak in an thah hna lai. Sianginn chungah amah lei țang hmai ai hupmi a minung pawl nih bomb an puah lai. Min Aung Hlaing minung hmai ai  hupmi mibu nih meithal he sianginn chungah an luhhnawh hna lai i an kah thluahmah hna lai. Ramchung sianginn kip ah bomb puah, meithal kahnak le a bubu in mi thah lainawnnak an tuah lai.

Cucu nawl ngeihnak a latu ralhrang hruaitu Min Aung Hlaing le a kuttang minung pawl le amah leițang nih an tuah lai i ram mipi nih asiloah tlangcung hriam tlai nih an tuahmi a si. Sianginn saya/sayama te le sianghngakchia pawl a bubu in an thah hna tiah vawleipi theih in thawngthanhnak tuah ding kha ai timhmi cu a si. Mah hi ruangah hin pei nawl ngeihnak zong hi ka laaknak a si cu tiah lih in vawleipi kha hlen a timh rih hna lai.

Cu bantuk tiangtiang cun thil an tuah ngam taktak hnga maw tiah na ruah men ko lai. Nawl ngeihnak ai hruhpi cang i nawl ngeihnak lawng a kut cungah um peng seh law hmun peng seh ti a duhmi nih cun an tuah ngam lomi thil a um lo. An pathian ah an ruah hna i an biakmi hna phungki hmanh an duh duh in an tlaih hna i thong ah an thlak mei ko hna. An duh ah an hrem hna i an thah huar ko hna. Cu bantuk lungput le ruahnak a ngeimi nih ram mipi thahnawn hna kha cu zeite hmanh ah khin a rel lai lo.

Nawl ngeihnak a la cangmi nih a kut cungah nawl ngeihnak a hmunh peng nakding ahcun zeihmanh tuah ngam lomi dang a ngei lo. A tuah ngam bak lomi le a țih bakmi thil pakhat bel a um. Cucu nawl ngeihnak mipi kut ah pek țhan ding hi a ngamh lo bikmi le a țih bikmi cu a si.

Cucaah Min Aung Hlaing nih ngakchia le mino sianginn kai loin lam kam i an vaivuanh ding cu ka duh bak lo. Sianginn ka on lai i sianginn ka kaiter hna lai tiah sianginn on a timhmi hi dawtnak a ngeih tuk ruangah le fim cawnnak lei kha biapi tuk ah a chiah ruangah sianginn on a timhmi a si tiah ruat len hlah u. Thil pakhatkhat tuah a timhmi a um ruangah hlenthawinak in sianginn on a timhmi tu a si deuh.

Nawl ngeihnak ai hruhpimi ralhrang ralkap nih dawtnak, zaangfahnak le zawnruahnak timi lungput hrimhrim an ngei lo. A kut cungah nawl ngeihnak a um peng i a hmunh khawh nakding tu ah sianginn on a timhmi a si.

Kawl nih, “Țachiat khoh hnichiat piat” (တစ်ချက်ခုတ် နှစ်ချက်ပြတ်) an ti. Sihmanhsehlaw atu Min Aung Hlaing nih a ruahmi ah cun တစ်ချက်ခုတ် အချက်အများကြီးပြတ် timi hi a si. Thil voikhat tuah ah tampi tuah khawh kha ai timh bikmi cu a si.

Atu ah ralhrang ralkap nih tangka hman ding an ngei ti lo. Cucaah sianginn a on i ram pumpi in sianginn an kai a si ahcun sianginn luhnak man ah tangka tampi an hmuh lai. Cun nifatin hmun kip le khua kip ah duhlonak a langhtermi sianginn kai lio mino vialte sianginn chungah an um dih cang lai. Cucaah lam cungah duhlonak a langhtermi sianghngakchia le mipi an um ti lai lo. Lam cungah duhlonak a langhtermi hna kha va țhencheu len le va tlaihkhih len le pakhat tete in va kah thah len kha an herh ti lai lo. Cucaah sianginn on i voikhat ah zeizong te kha dai put seh ti a duh. (တစ်ချက်ခုတ် အခုတ်အများကြီးပြတ်) dingin. Mibu kha țhek cia si hna seh ti a duh.

Sianginn chungah sianghngakchia le saya te kha mibu hmai hup pawl nih a bubu in an luhhnawh hna lai i an thah thluahmah cang hna lai. Cu tikah sianginn ka onpiak hna i țha tein sianginn a kai komi sianghngakchia kha tlangcung hriam tlai le mițhalo pawl nih a bubu in an thah hna. Ram ka dawt ruang le ramchung mino ka dawt tuk hna ruangah sianginn zong ka onpiak hna.

Sihmanhsehlaw tlangcung hriam tlai le ramchung misual pawl nih buainak an tuah peng. Sianginn ah bomb an puah, hmai ai hupmi mibu nih an luhhnawh hna i meithal in an kah hna, a bubu in thahnawnnak an tuah. Dawtnak in sianginn ka onpiak hna, asinain ralhrang nih caan țha ah i laak zau in sianghngakchia le saya te thahnawnnak ah an hman.

Cucaah ram a dai kho lo i nawl ngeihnak hi ka thlah kho lo. Ram a daih khawh nakhnga nawl ngeihnak cu keimah nih ka tlaih chung, ka hruai chung ko rih lai tiah ram pumpi theih dingin le vawleipi theih dingin lih thawng kha a thanh colh lai. Mah hihi Min Aung Hlaing nih a ruahmi le ai timh bikmi cu a si ko. Zeidang cu a tuah ngam dih. Mipi kut ah nawl ngeihnak vun pek țhan dingmi tu cu a țih tuk i a tuah ngam lo.

Khah! Nu le pa hna, ralhrang ralkap nih an onmi sianginn ah na fanu na fapa kha sianginn kai seh ti a duhmi le a kaitermi na si ahcun a hnu i thil a can tikah a poi tuk e tiah thinhung le ngaihchia in um te hlah u. A hnu i ngaichih cu zeihmanh san a tlai ti lai lo.

CDM a tuah duh lomi saya/sayama te zong na nunnak na dawt le nangmah le nangmah nai dawt ko ahcun fak piin khuaruat tungmang ko rih. Inn lawngah um peng i ei ih, ei ih nih a ka simh tuk cang na ti si le ralhrang ralkap nih an onmi sianginn ah cun va kai ko. Mipi a that cuahmah i a kut ah thisen ai nehmi ralhrang ralkap nih an onmi sianginn ah a kai i ca a chimmi na si ahcun nangmah zong na kut ah thisen ai nehmi na si ve. Cucaah thisen ai nehmi na kut in ca na chimh cuahmah lio hna ah nangmah hrimhrim kha thisen lakah rilh bul ko i na thih ding kha cu na duh lai ka zum lo.

Hmailei ah thil a cang kho dingmi kan hngalh chung ko nain kan tuah a si ahcun kan ton taktak tikah kan i ngaichih lo ding a biapi tuk. Ralhrang ralkap nih an onmi sianginn ah kan fale kan kaiter hna lo ding hi atu lio ah nu le pa kan rian nganpi a si.

Ralhrang hruaitu Min Aung Hlaing nih tuah dingmi dang a hngal ti lo. A zeilei paoh ah a lungdong cang. Cakei mei tlaih a lo cang i zei ti um awk a hngal ti lo. Ai ruahning bantukin thil a kal khawh ti lo ruangah zei ti khuaruah awk hngalh lo ah sianginn on a timhmi a si.

Cucaah a kut cungah nawl ngeihnak a hmunh peng khawh nakhnga sianginn on i sianginn a kaimi sianghngakchia kha a thahnawn dih hna lai. Cu tikah ram a buai chinchin lai i ram a dai lo tiah nawl ngeihnak tlaih peng ding kha a duhmi le ai timhmi cu a si.

Min Aung Hlaing nih a tuah ngam lomi a um lo, aho an thih hmanh ah a poi lo. Keimah ka thih lo i keimah kut cungah nawl ngeihnak a um paoh ahcun a za timi lungput a ngeimi pa a si.

Cucaah cun atu ah sianginn on a timhmi hi, “Dawtnak a ngeih tuk ruangah sianginn a on,” tiah ruat hrimhrim hlah u. Dawtnak a ngeih ruangah si loin a kut cungah nawl ngeihnak a hmunh khawh nakhnga sianginn on a timhmi tu a si.By-Salai K. Biak Lian Thawng

Be the first to comment

Leave a Reply

Your email address will not be published.


*