Min Aung Hlaing le ralkap humzual le khamh khi asi caah The Hague ah DASSK hi kan va support awk asi lo” tiah kan aupi tthan.

Aven Par Kan ngaithiam pah ko u. Sau deuh in ka nolh chap lai hi mu :- ) Winston Churchill bia a lar ngaimi cu: “The longer you look back, the farther you can look forward,” tiah ati. Hnulei thil ttha deuhin zohtthan khawh ahhin hmailei thil a fiangfai deuh tawn rua. History kan cawnnak sullam concept pakhat zong cu hnulei ah palhnak rak tuah sualmi kha hmailei ah kan tuah tthan tinak hnga lo le hmailei caah lamhmuh saktu le fimchimtu asinak hnga caah khan asi ko.

Cucaah HRW lubik catar ka hmuh i lungchuak ah tlawmte ka hun kir tthanmi khi asi. Kum sau pah ramkhel tiluan kalning hi kan zulhdoi (political commentator) pah ve cang i chim-awk hi a tam ko. 2004 CNF Camp Victoria, Chin Consensus Building Seminar ah 2003 PM Khin Ngunt “seven-step roadmap” kha a chuahka non a rak si i, National Convention (NC) kai le kai lo kong khi bia rak lumsa ngai. Tleicia Dr. Vumson le micheu khat cu “kai ve ko usihlaw a chungin chim khawhmi chim rel ve..” ti khi an rak dirpi. Nain, micheu nih cu ruahnak cu an rak ei kho bak hna lo. Kawl ralkap a dirpi dengin a hmumi tiang khi an rak um.

1996 in NLD nih NC a chuahtak tikah ralkap nih caanttha tu an laknak i, kum 14 tiang NC kan tuah an ti peng i uknak chan duh ti loin an rak tlaiter. Hnu ahcun “ceasefire armed groups” thazaang in 2004 in NC cu a pehzulh thotho ko. KIO hna cu a chung in an duhning cathluan hna an rak khin i an rak chimrel ve kha, an duhing in an ruahpiak duh hna lo zongah, hmual a rak ngeimi cu a rak um pah ko. Keimah pumpak zong athli tein ramri in Yangon tiang 2005 ah ka rak lut i NC a kai liomi Chinmi hruaitu he zong kan rak i tong ve i CCB Seminar biachah cu ka rak chimh hna.

Thil kalning cuanh tthan tikah “1990 teitu kutah uknak pek timi confrontation rumro siloin negotiation” lampi kha a rak tthat deuhnak a rak um len ko. NC chuahtak loin a chungin 2008 phunghram suainak ah chim khawhmi a chungin fakpiin chimrel ve kha a rak herhnak tete a rak um ko. 2008 Referendum a hun phan,

“2008 phunghram hi kan fehter ahcun kan hngawng a kan dittu asi te lai tiah Vote-No Campaign Movement khi Chin ramkulh pumpi kan rak hrih i kan cawlcang, hruaitu pakhat ka rak si ve. Matupi, Mindat, Paletwa le Kanpalet peng khi keimah tlaihmi le tuanvo lakmi a rak si. Kawlram pumpi level zongin kan rak tuah. Nain, “something is better than nothing. Zero nakin One a ttha deuh” timi bia in ramkhel hruaitu tampi nih “2008 phunghram fehter dingin mee thlak a hau”, tiah an rak kan doh. India ramri ahkhin “Campaign Kick-Off” kan rak ngei i, training ka rak pek, ramchung in ramkhel hruaitu pakhat cu, “Nargis phunghram” tiah ka chimmi kha a duh bak lo, leklak a dir zau i a rak ka al. 2008 Phunghram kha a rak duh pahmi upa khi an rak um pah ka ti duhnak asi.

2008 Phunghram cu a hun nung i tu ahcun kan dihlak huat bikmi le duh lobikmi ah a hun i cang tthan. “Vote-No” in rak thah khawhmi kha kan rak tlolh ka ti ko lai. Tutan buainak a chuahnak hram zong 2008 phunghram thotho ah hin hram a hun thlami kha asi, a poi ngaite. 2010 election a hun phan, “boycott versus contest” ah kan hun buai ngai tthan, “Hluttaw chungin khel khawhmi khel ve hi a ttha ko dakaw (internal struggle)” tiah kan rak aupi. Ca tampi khi kan rak tial. NLD nih a boycott tikah mitampi nih an kan al. “Opportunists” phun hna ah a kan phaimi khi an um pah, cartoon tiang khi an rak ka suai hnawh bal cu ta. Nain, 2012 by-election ah NLD thimnak a luh ve hnu cun a holhmi kha an um tthan ti hna lo, an tlaunak zong theih asi ti lo. 2015 thimnak ah cozah aser le bang cun boycott kha cu an philh manh tthan dih cang.

Cun, 2015 thimnak a hun phan tthan, “regime change nakin political change” hi kan zoh a herh deuhmi asi caah “post-election” hnu a ra dingmi tlangmi le Chinmi “political scenario” zohin mee thlak hi a biapi deuh – tlangmi party an tthawn hi a hau tuk ko, kan rak ti. Nain, mi tampi nih an kan al tthan. Chin party cu arti zong an hun khuai kho ve ti lo. Thil a hun ra colhmi cu ramkhel biaruahnak (UPDJC) cabuai in an kan tthawl colh i kum zabu 21 Panglong Conference kainak nawl an kan phih hnu lawngah kan lung a hun pem. Lungfah khi kan hun hngal tthan. Matupi by-election ah CLD teinak kan pekter tthan i ramkhel biaruahnak UPDJC ahcun kan hun itel kho tthan. The Hague ah ICJ tazacuainak a hun phan, ”UN International Fact-Finding Mission Report (FMM) he kalhin Chinmi nih dir lai hi tlangmi caah a tthami asi lo, Min Aung Hlaing le ralkap humzual le khamh khi asi caah The Hague ah DASSK hi kan va support awk asi lo” tiah kan aupi tthan.

Mi tampi nih an rak kan al tthan i, The Hague bak ahcun a va kalmi zong cu an um. Tu ahcun The Hague ah khamh cu chim lo, Min Aung Hlaing lila kha tazauai a duhbikmi ah kan hun i cang tthan cang. Rome Statute minthut in ICC ah tazacuai tiang kha kan duh tthan cang hna. Ngaingai ah cun: hlan ahcun Rome Statute a rak doh tukmi kha kan rak si. Nain, hnulei kan dirhmun kha cu tu ahcun kan philh tthan manh dih cang. Nai 2020 thimnak ah“NLD campaigner pakhat cu miphun cawlcanghnak le tlangmi cawlcangh dohthlennak kha ataih, a tetuai ngai khin a hmuh i zohniamnak undermine bia tete tampi khi a aupi, detah-suai, lu-myo-suai, ethnic feeling, a tetuaimi lungput” tiah a kan ti piak ko cu ta.

Saupi ka holh duh lo nain a chim tuk tikah, “tikhur um utlak nih a hun ra i, rilipi kong expert ngaiin a hun kan cawnpiakmi hna hi cu zumh awk asi lo rih ee..” tiah Kawlholh in ka khat te lawng khi ka tial. Politics ah a um bal lomi le aa phum ballomi nih tlangmi zeiruangah ral kan thawh i miphun le tlangmi politics hi kan dirpi timi ttha tein thei sasai loin ol tein mah tin “undermine” a tuahmi kha duh a nun deuh lo caah khin asi. Tu ahcun amah kha Tlangcungmi hruaitu hna dirpinak le komh dingah a vak tthan cuahmah rua. Tlangmi hruaitu hna kha hman a thlakpi hna i a komh cuahmah hna rua. Harnak chung kan tlak hnu lawngin tlangmi dirhmun a biapitnak le hlamnak hi kan hun hngalh tthan rua. Credit-
Salai Van Lian Thang

Be the first to comment

Leave a Reply

Your email address will not be published.


*