Min Aung Hlaing, 2008 Phunghrampi Na Hrawk Ruangah Kan I Lawm

Myanmar ramchung mi dihlak nih si hna seh, tlangcung hriam tlai dihlak nih si hna seh kum tampi hrawh le remh țhan le sersiam țhan an i zuam i an hrawh khawh lomi le an remh țhan khawh lomi 2008 phunghrampi cu uknak ai hruhpimi mah zawn lawng ruat Min Aung Hlaing nih a hrawh dih cang.

Atu ah mi tampi nih cun kum 2008 phunghrampi cu CRPH nih a hrawhmi si tiah nan ti hrimhrim lai ti cu a fiang ko. A ruang cu nihin ah CRPH nih ram pumpi theih in kum 2008 phunghrampi kan hrawh cang tiah phungning in thawngthanhnak an tuah.

Atu ah Min Aung Hlaing nih hranhram in mipi nawl ngeihnak hi chut in rak la hlah seh law zeitikhmanh ah 2008 phunghrampi hi mi zeihmanh le zei bantuk hriam tlai hmanh nih an remh kho in an hrawk kho lai lo. Sihmanhsehlaw nawl ngeihnak ai hruhpimi Min Aung Hlaing nih nawl ngeihnak a laak hlan ah khua tampi a ruat ta ko lai, nain a ruah awkah a hngalh bak lomi nawl ngeihnak ka laak ahcun 2008 phunghrampi hi ai rawk te lai tiah a ruah bak lomi kha nawl ngeihnak a laak bakin a rawk colh.

Hihi midang, ahohmanh nih an hrawkmi a si lo i CRPH zong nih an hrawkmi a si lo. Mipi nih kum tampi hrawk le remh an timh nain an hrawk i an remh khawh lomi kha atu cu Min Aung Hlaing nih hranhram in nawl ngeihnak a laak ruangah 2008 phunghrampi cu a rawk cang. Nawl ngeihnak lawng a lak si loin 2008 phunghrampi zong a hrawk chih.

A taktak le a ngaingai ahcun kum 2008 phunghrampi a rawk khawh nakhnga rian a țuantu le a hrawktu taktak cu Min Aung Hlaing a si. Atu fakpi in ruat ta hmanh, Min Aung Hlaing nih hranhram in nawl ngeihnak hi rak la hlah seh law 2008 phunghrampi hi ahohmanh nih an hrawk in an remh kho hlei lai lo i kha hlan kel bantuk khan a hmun peng rih ko lai. Sihmanhsehlaw atu cu Min Aung Hlaing nih hranhram in nawl ngeihnak a laak ruangah a rawk cang.

Hranhram in nawl ngeihnak a latu Min Aung Hlaing nih 2008 phunghrampi a hrawkmi kha atu ah CRPH nih 2008 phunghrampi kan hrawk cang tiah thawng an thanh khi a si ko. A taktak le a ngaingai ahcun 2008 phunghrampi a hrawktu taktak cu Min Aung Hlaing a si.

Cucaah cun mipi nih, “Min Aung Hlaing, remh kan i zuam lengmang ko nain ahohmanh nih kan remh khawh lomi kum 2008 phunghrampi cu remh hau loin na kan hrawkpiak caah kan i lawm tuk,” tiah lawmhnak tu nan chim ding a si. By-Salai K. Biak Lian Thawng

Be the first to comment

Leave a Reply

Your email address will not be published.


*